ޖަރުމަނު ޤައުމީ ޓީމާ ކްލޮޕް ހަވާލުވުމުގެ ފުރުސަތު އެބަ އޮތް!

ޖަރުމަނުގެ ޤައުމީ ޓީމުގެ ކޯޗުގެ މަޤާމާ ހަވާލުވުމަށް، އެ ޤައުމުގެ ތަޖުރިބާކާރު ކޯޗު ޔާގަން ކްލޮޕް ހަވާލުވުމުގެ ފުރުސަތު އެބަ އޮތް ކަމަށް މީޑިއާ ރިޕޯޓުތައް ބުނެފި އެވެ.

ޖަރުމަނުގެ ކޯޗު ކަމުގައި މިވަގުތު ހުރީ ހޫލިއަން ނާގަލްސްމަން އެވެ. ނަމަވެސް، މިހާރު ކުރިއަށްދާ ފީފާ ވަރލްޑް ކަޕްގެ ގަދަ 32 ގައި ޕެރަގުއޭ އަތުން ބަލިވެ، ޖަރުމަނު މުބާރާތުން ކެޓުމާ އެކު ނާގަލްސްމަންގެ މުސްތަޤުބަލާ މެދު ވަނީ ސުވާލު އުފެދިފައި އެވެ. ނާގަލްސްމަން ވަނީ މަޤާމުން އިސްތިއުފާ ދިނުމުގެ ވިސްނުމެއް ނެތް ކަމަށް ބުނެފައި އެވެ.

އުމުރުން 59 އަހަރުގެ ކްލޮޕް މިވަގުތު ހުރީ ރެޑްބުލްގެ ހެޑް އޮފް ގްލޯބަލް ސޮކާގެ މަޤާމުގައި އެވެ. އޭގެ ކުރިން އޭނާ އިރުޝާދު ދީފައި ވަނީ ލިވަޕޫލް އަށެވެ. ލިވަޕޫލްގައި ކާމިޔާބު މަސައްކަތް ތަކެއް ކުރުމަށް ފަހު، ކްލޮޕް އެ ކުލަބު ދޫކޮށްލަން ނިންމީ އެވެ. އޭގެ ފަހުން އޭނާ ހޯދުމަށް ބައެއް ކުލަބު ތަކުން ޝައުޤުވެރިކަން ފާޅު ކުރި ނަަމަވެސް، ކްލޮޕް ވަނީ ކުލަބަކާ ހަވާލުވުމުގެ ވިސްނުމެއް ނެތް ކަމަށް ހާމަ ކޮށްފައި އެވެ.

ޖަރުމަނުގެ މީޑިއާ ތަކުގައި ބުނެފައިވާ ގޮތުން، ޖަރުމަނުގެ ޤައުމީ ޓީމަށް ކްލޮޕް ހަމަޖައްސަން އެ ޤައުމުގެ ފުޓުބޯޅަ އެސޯސިއޭޝަން އިން ބޭނުންވާ ނަމަ، ކްލޮޕް ހުރީ އެކަމާ ގުޅޭ ވާހަކަ ދައްކައި އަދި މަޝްވަރާ ކުރަން ތައްޔާރަށެވެ. ނަމަވެސް، މަޤާމުން އިސްތިއުފާ ނުދޭނެ ކަމަށް މިހާރުގެ ކޯޗު ނާގަލްސްމަން ބުނެފައިވާތީ، އެކަމުގައި ގޮތެއް ނިންމާނީ ޖަރުމަނުގެ ފުޓުބޯޅަ އެސޯސިއޭޝަން އިންނެވެ.

އެކަމާ ގުޅޭ ގޮތުން ކްލޮޕް ބުނެފައި ވަނީ، އެފަދަ ކަމަކާ މެދު އޭނާ ނުވިސްނާ ކަމަށެވެ. އަދި ޖަރުމަނުގެ ކޯޗުގެ މަޤާމަށް ގެންނަން ބޭނުންވާ މީހުންގެ ލިސްޓުގައި އޭނާގެ ނަން ހިމެނޭކަން އިނގޭ ކަމަށް ވެސް ކްލޮޕް ބުންޏެވެ. ނަމަވެސް، މިވަގުތު މިއީ އެކަމާ ވިސްނަން ވީ ވަގުތު ނޫން ކަމަށް ވެސް ކްލޮޕް ބުނެފައިވެ އެވެ. 

ޖަރުމަނުގެ މައިންޒުން ކޯޗިން ކެރިއަރު ފެށި ކްލޮޕް އަކީ، ދުނިޔޭގައި ތިބި ތަޖުރިބާކާރު ކޯޗުންގެ ތެރޭގައި ހިމެނޭ މީހެކެވެ. އޭނާ ވަނީ ޖަރުމަނުގެ ބޮރޫޝިއާ ޑޯޓްމަންޓުގެ އިތުރުން، ލިވަޕޫލް އަށް ވެސް އިރުޝާދު ދީފައި އެވެ. ލިވަޕޫލް އަށް އިރުޝާދު ދިން ނުވަ އަހަރުގެ ތެރޭގައި ކްލޮޕް ވަނީ އެ ކުލަބަށް އަށް ތައްޓެއް ކާމިޔާބު ކޮށްދީފައި އެވެ.