އައިވަރީ ކޯސްޓް ބަލިކޮށް، ޖަރުމަނު އަނެއް ބުރަށް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އީގައި އައިވަރީ ކޯސްޓާ ދެކޮޅަށް ކުޅުނު މެޗުން ވެސް މޮޅުވެ، ޖަރުމަނުން މުބާރާތުގެ ގަދަ 32 ވަނަ ބުރުން ޖާގަ ހޯދައިފި އެވެ.

ކެނެޑާގެ ޓޮރޮންޓޯ ސްޓޭޑިއަމްގައި ކުޅުނު މެޗު ޖަރުމަނުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އައިވަރީ ކޯސްޓް އިން ލަނޑު ޖަހައި ލީޑު ނަގާފައި ވަނިކޮށް، ދެ ވަނަ ހާފުގައި ދެ ލަނޑު ޖަހައި ޖަރުމަނު ވަނީ މެޗުން މޮޅުވެފައި އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި އައިވަރީ ކޯސްޓް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ކެޕްޓަން ފްރޭންކް ކެސިއޭ އެވެ. މެޗުގެ ފުރަތަމަ ހާފުގައި ވެސް ޖަރުމަނުން ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފައި އެވެ.

މެޗުގެ ދެ ވަނަ ހާފުގައި 68 ވަނަ މިނެޓުގައި ޑެނިސް އުންޑާވް ވަނީ ލަނޑު ޖަހައި ޖަރުމަނަށް ނަތީޖާ ހަމަހަމަ ކޮށްދީފައި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އޭނާ ވަނީ ދެ ވަނަ ލަނޑެއް ޖަހައި މެޗުން ޖަރުމަނު މޮޅު ކޮށްދީފައި އެވެ.

މޮޅާ އެކު ޖަރުމަނުން ގަދަ 32 ވަނަ ބުރުގެ ޖާގަ ހޯދީ މިހާތަނަށް ކުޅެފައިވާ ދެ މެޗުން ހަ ޕޮއިންޓާ އެކު، ގުރޫޕުގެ އެއް ވަނައިގައި އެވެ. ގުރޫޕު ސްޓޭޖުގެ ފަހު މެޗުގައި ޖަރުމަނު ނިކުންނާނީ އެކުއެޑޯއާ ދެކޮޅަށެވެ.