ޖަރުމަނުގެ ކޯޗުކަމުން ނާގަލްސްމަން ވަކި ކޮށްފި
ޖަރުމަނުގެ ފުޓުބޯޅަ އެސޯސިއޭޝަން އިން ނާގަލްސްމަން އަަށް އަންގާފައި ވަނީ، މަގާމުން އިސްތިއުފާ ދިނުމަށް. އެއީ އޭނާ އާއެކު އިތުރަށް ކުރިއަށް ދިޔުމަށް އެ އެސޯސިއޭޝަން އިން ބޭނުން ނުވާތީ. އެއާ އެކު ނާގަލްސްމަން މިހާރު ވަނީ ޖަރުމަނުގެ ކޯޗުކަމުން އިސްތިއުފާ ދީފައި ކަމަށް ރިޕޯޓު ތަކުގައި ވަނީ ބުނެފައި.
ޖަރުމަނުގެ ކޯޗަކަށް ހުރި ހޫލިއަން ނާގަލްސްމަން. | ރޮއިޓާސް
ޖަރުމަނުގެ ޤައުމީ ޓީމަށް އިރުޝާދު ދެމުން އައި ހޫލިއަން ނާގަލްސްމަން، އެ މަޤާމުން ވަކި ކޮށްފި އެވެ.
އުމުރުން 38 އަހަރުގެ ނާގަލްސްމަން، ޖަރުމަނުގެ ކޯޗު ކަމުން ވަކިވެފައި ވަނީ މިހާރު ކުރިއަށްދާ ފީފާ ވަރލްޑް ކަޕްގައި ޖަރުމަނަށް ކުރިމަތިވި ބޮޑު ނާކާމިޔާބާ ގުޅިގެންނެވެ. މުބާރާތުގެ ގަދަ 32 ގެ ބުރުގައި ޖަރުމަނު ވަނީ ޕެރަގުއޭ އަތުން ބަލިވެ ކަޓައިފަ އެވެ. އެއާ އެކު ނާގަލްސްމަންގެ މުސްތަޤުބަލާ މެދު އޮތީ ސުވާލު ތަކެއް އުފެދިފައި އެވެ.
ނަމަވެސް، ނާގަލްސްމަން ވަނީ ޖަރުމަނުގެ ކޯޗު ކަމުން އޭނާ އިސްތިއުފާ ނުދޭނެ ކަަމަށް ބުނެފައި އެވެ. ޖަރުމަނުގެ ފުޓުބޯޅަ އެސޯސިއޭޝަން އިން ނާގަލްސްމަން އަަށް އަންގާފައި ވަނީ، މަގާމުން އިސްތިއުފާ ދިނުމަށެވެ. އެއީ އޭނާ އާއެކު އިތުރަށް ކުރިއަށް ދިޔުމަށް އެ އެސޯސިއޭޝަން އިން ބޭނުން ނުވާތީ އެވެ. އެއާ އެކު ނާގަލްސްމަން މިހާރު ވަނީ ޖަރުމަނުގެ ކޯޗުކަމުން އިސްތިއުފާ ދީފައި ކަމަށް ރިޕޯޓު ތަކުގައި ވަނީ ބުނެފައި އެވެ.
މިފަހަރުގެ ވަރލްޑް ކަޕް އަކީ ނާގަލްސްމަންގެ އިރުޝާދުގެ ދަށުން ޖަރުމަނު ކުޅުނު ތިން ވަނަ މުބާރާތެވެ. 2023 ވަނަ އަހަރު ޖަރުމަނުގެ ކޯޗަކަށް އޭނާ ހަމަޖެއްސިއިރު، އޭނާގެ އިރުޝާދުގެ ދަށުން ޖަރުމަނު އެންމެ ފުރަތަމަ ނިކުތީ 2024 ވަނަ އަހަރުގެ ޔޫރޯ ފުޓުބޯޅަ މުބާރާތަށެވެ. ނަމަވެސް، މުބާރާތުގެ ކުއާޓާ ފައިނަލްގައި ސްޕެއިން އަތުން ބަލިވެ ކެޓީ އެވެ.
ނާގަލްސްމަންގެ އިރުޝާދުގެ ދަށުން ޖަރުމަނު ކުޅުނު ދެ ވަނަ މުބާރާތަކީ މިދިޔަ އަހަރު އަމިއްލަ ޤައުމުގައި އޮތް ޔުއެފާ ނޭޝަންސް ލީގެވެ. އެ މުބާރާތުގެ ސެމީ ފައިނަލްގައި ޖަރުމަނު ވަނީ ޕޯޗުގަލް އަތުން ބަލިވެ ކަޓައިފަ އެވެ. ތިން ވަނަ ހޮވަން ކުޅުނު މެޗުގައި ފްރާންސް އަތުން ވެސް ބަލިވެ، ޖަރުމަނަށް ލިބުނީ ހަތަރު ވަނަ އެވެ.
ތިން ވަނަ މުބާރާތަކަށް މިހާރު ކުރިއަށްދާ ވަރލްޑް ކަޕާ ކުރިމަތިލީއިރު، ޖަރުމަނުގައި އޮތީ ވަރުގަދަ ޓީމެކެވެ. މުބާރާތުގެ ފުރަތަމަ މެޗުގައި ކިއުރުސާއޯ ބަލިކޮށް، ދެ ވަނަ މެޗުގައި އައިވަރީ ކޯސްޓު އަތުން ވެސް ޖަރުމަނު މޮޅުވި އެވެ. ނަމަވެސް، ތިން ވަނަ މެޗުގައި އެކުއެޑޯ އަތުން ބަލިވީ އެވެ. އަދި ގަދަ 32 ގައި ޕެރަގުއޭ އަތުން ބަލިވެ މުބާރާތުން ކެޓީ އެވެ.
ޖަރުމަނުގެ ކޯޗަކަށް ނާގަލްސްމަންގެ ބަދަލުގައި ގެންނަން މަސައްކަތް ކުރަނީ، އެ ޤައުމުގެ ތަޖުރިބާކާރު ކޯޗު ޔާގަން ކްލޮޕް ކަމަށް ރިޕޯޓު ތަކުގައި ވަނީ ފާހަގަ ކޮށްފައި އެވެ. ކްލޮޕް ވެސް ވަނީ، ޖަރުމަނުން ދެން ގެންނަން ބޭނުންވާ ކޯޗުންގެ ލިސްޓުގައި އޭނާާގެ ނަން ހިމެނޭ ކަމަށް ބުނެފައި އެވެ.
