ޖެހި ޖެހިގެން ތިން މުބާރާތުގެ ނާކާމިޔާބަށް ފަހު ވެސް ނާގަލްސްމަން ބުނީ، އިސްތިއުފާ ނުދޭނެ ކަމަށް!

ފީފާ ވޯލްޑް ކަޕްގައި ޕެރަގުއޭ އަތުން ބަލިވެ ޖަރުމަނު މުބާރާތުން ކެޓި ނަމަވެސް، މަގާމުން އިސްތިއުފާ ނުދޭނެ ކަމަށް ޖަރުމަނުގެ ކޯޗު ހޫލިއަން ނާގަލްސްމަން ބުނެފި އެވެ.

ވޯލްޑް ކަޕްގެ ގަދަ 32 ގައި ޕެނަލްޓީގައި ޕެރަގުއޭ އަތުން ބަލިވެ، ޖަރުމަނު ވަނީ ކަޓައިފަ އެވެ. ޖަރުމަނަކީ މިފަހަރުގެ މުބާރާތް ކާމިޔާބު ކުރާނެ ކަމަށް ބެލެވުނު ޓީމެކެވެ. 

ޖަރުމަނު ކެޓި މެޗަށް ފަހު ނާގަލްސްމަން ބުނީ، އޭނަ މަގާމުން އިސްތިއުފާ ނުދޭނެ ކަމަށެވެ. އަދި ޖަރުމަނުގެ ފުޓުބޯޅަ އެސޯސިއޭޝަން އިން 2028 ވަނަ އަހަރާ ހަަމައަށް އޭނާ ހުންނަން ބޭނުންވާ ނަމަ، މަގާމުގައި ދެމި ހުންނާނެ ކަމަށް ނާގަލްސްމަން ބުންޏެވެ. ނަމަވެސް، އެސޯސިއޭޝަން އިން އެގޮތް ބޭނުން ނުވާ ނަމަ މަގާމުން ދުރަށް ދާނެ ކަމަށް ނާގަލްސްމަން ވަނީ ބުނެފައި އެވެ.

މިއީ ނާގަލްސްމަންގެ އިރުޝާދުގެ ދަށުން ޖަރުމަނު ކުޅުނު ތިން ވަނަ މުބާރާތެވެ. 2023 ވަނަ އަހަރު ޖަރުމަނުގެ ކޯޗަކަށް އޭނާ ހަމަޖެއްސިއިރު، އޭނާގެ އިރުޝާދުގެ ދަށުން ޖަރުމަނު އެންމެ ފުރަތަމަ ނިކުތީ 2024 ވަނަ އަހަރުގެ ޔޫރޯ ފުޓުބޯޅަ މުބާރާތަށެވެ. ނަމަވެސް، މުބާރާތުގެ ކުއާޓާ ފައިނަލްގައި ސްޕެއިން އަތުން ބަލިވެ ކެޓީ އެވެ.

ނާގަލްސްމަންގެ އިރުޝާދުގެ ދަށުން ޖަރުމަނު ކުޅުނު ދެ ވަނަ މުބާރާތަކީ މިދިޔަ އަހަރު އަމިއްލަ ޤައުމުގައި އޮތް ޔުއެފާ ނޭޝަންސް ލީގެވެ. އެ މުބާރާތުގެ ސެމީ ފައިނަލްގައި ޖަރުމަނު ވަނީ ޕޯޗުގަލް އަތުން ބަލިވެ ކަޓައިފަ އެވެ. ތިން ވަނަ ހޮވަން ކުޅުނު މެޗުގައި ފްރާންސް އަތުން ވެސް ބަލިވެ، ޖަރުމަނަށް ލިބުނީ ހަތަރު ވަނަ އެވެ.

ތިން ވަނަ މުބާރާތަކަށް މިހާރު ކުރިއަށްދާ ވޯލްޑް ކަޕާ ކުރިމަތިލީއިރު، ޖަރުމަނުގައި އޮތީ ވަރުގަދަ ޓީމެކެވެ. މުބާރާތުގެ ފުރަތަމަ މެޗުގައި ކިއުރުސާއޯ ބަލިކޮށް، ދެ ވަނަ މެޗުގައި އައިވަރީ ކޯސްޓު އަތުން ވެސް ޖަރުމަނު މޮޅުވި އެވެ. ނަމަވެސް، ތިން ވަނަ މެޗުގައި އެކުއެޑޯ އަތުން ބަލިވީ އެވެ. އަދި ގަދަ 32 ގައި ޕެރަގުއޭ އަތުން ބަލިވެ މުބާރާތުން ކެޓީ އެވެ. 

ޖެހި ޖެހިގެން ތިން ވަނަ މުބާރާތުގައި ނާގަލްސްމަންގެ އިރުޝާދުގެ ދަށުން ޖަރުމަނަށް ނަތީޖާ ނު ނެރެވުނުއިރު، އޭނާ އަށް އަންނަނީ ޕްރެޝަރު ބޮޑު ވަމުންނެވެ. ކުރިއަށް އޮތް ދުވަސް ތަކުގައި ނާގަލްސްމަންގެ މުސްތަަޤުބަލާ މެދު ގޮތެއް ނިންމާނެ އެވެ.