ޖަރުމަނުން ގާނާ ވެސް ބަލިކޮށްފި

ބައިނަލްއަޤުވާމީ ރަޙުމްތެރި ކަމުގައި ގާނާއާ ދެކޮޅަށް ކުޅުނު މެޗުން ވެސް މޮޅުވެ، ޖަރުމަނުން ފޯމު ދަމަހައްޓައިފި އެވެ.

ހޯމަ ދުވަގުގެ ރޭ ގާނާއާ ދެކޮޅަށް ކުޅުނު މެޗު ޖަރުމަނުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޖަރުމަނުން ލަނޑު ޖަހައި ލީޑު ހޯދާފައި ވަނިކޮށް، ގާނާ އިން ދެ ވަނަ ހާފުގައި ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ޖަރުމަނު ވަނީ މެޗުން މޮޅުވެފަ އެވެ. 

މެޗުގެ ފުރަތަމަ ހާފުގެ އިތުރު ވަގުތުގައި ޖަރުމަނަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ކުރި ހޯދައިދިނީ ކައި ހަވާޓްޒް އެވެ. އޭގެ ފަހުން ވެސް ދެ ވަނަ ހާފުގައި ޖަރުމަނުން ވަނީ އިތުރު ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގެ 70 ވަނަ މިނެޓުގައި ގާނާ އަށް ނަތީޖާ ހަމަހަމަ ކޮށްދިނީ އަބްދުލް ފަތާވޫ އެވެ. ނަމަވެސް، މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް ޑެނީޒް އުންޑާވް ވަނީ ޖަރުމަނުގެ ދެ ވަނަ ލަނޑު ޖަހައި މެޗުން މޮޅު ކޮށްދީފަ އެވެ.

ގާނާ މެޗުގެ ކުރިން ސްވިޒަލެންޑާ ދެކޮޅަށް ކުޅުނު މެޗުން ވެސް ޖަރުމަނު ވަނީ މޮޅުވެފަ އެވެ. ގާނާ މެޗުން ވެސް މޮޅުވެ ޖަރުމަނުން އެ ޓީމު ފޯމު ދަމަހައްޓާފައިވާއިރު، ޖަރުމަނުގެ ކޯޗު ހޫލިއަން ނާގަލްސްމަން އަށް އޮތް އެންމެ ބޮޑު ހިތްހަމަ ޖެހުމަކީ އެ ޓީމުގެ ފެންވަރު ހިފެހެއްޓިފައި އޮތުމެވެ. އެގޮތުން ނާގަލްސްމަން ބުނީ ކުޅުންތެރިންގެ ފެންވަރު ދެނެ ގަނެ، ކުޅުންތެރިންގެ ކުޅުން ބަލާލުމަށް މި ދެ މެޗުގެ ބޭނުން ކުރެވުނު ކަމަށެވެ. 

އެއާ އެކު ނާގަލްސްމަން ބުނެފައި ވަނީ، މިއަހަރުގެ ޖޫން މަހު އޮންނަ ފީފާ ވޯލްޑް ކަޕަށް ޖަރުމަނު ނިކުންނާނީ ފުރިހަމަ އަށް ތައްޔާރު ވެގެން ކަމަށެވެ. އޭނާ ބުނީ ޖަރުމަނުގެ ކުޅުންތެރިންނާއި، އޭނާ އަށް ވެސް އެ ޓީމުގެ އަމާޒު އިނގޭ ކަމަށާއި، އެ އަމާޒަށް ވާސިލްވުމަށް ހުރިހާ އެންމެންނަށް ވެސް އޮތީ މަސައްކަތް ކުރުން ކަމަށެވެ.