ރައީސް މުއިއްޒު މަޝްވަރާގެ މޭޒަށް އަންނަން ޖެހޭ: ނަޝީދު
6 ޖުލައި 2026 | ހޯމަ 08:55ރާއްޖެއަށް ކުރިމަތިވެފައިވާ މާލީ ދަތިތަކުން އަރައިގަތުމަށް ބޭރުގެ އެހީތެރިކަމާއި ފައިސާ ހޯދުމުގައި މި ސަރުކާރު ނާކާމިޔާބުވެފައިވާ ކަމަށް އެމްޑީޕީގެ ޗެއަރޕާސަން ފާހަގަކުރެއްވި. ބޭންކުތަކުން ޑޮލަރު ލިބުން ދަތިވެ އިގްތިސާދީ ނުރައްކަލެއްގެ ތެރެއަށް ގައުމު ގޮސްފައިވާތީ، މިކަމަށް ހައްލެއް ހޯދުމަށް ސަރުކާރުން ސިޔާސީ ހުރިހާ ފަރާތްތަކާއެކު މަޝްވަރާގެ މޭޒަށް އައުމަށް އެ ޕާޓީން ވަނީ ގޮވާލާފަ. ރައްޔިތުންނަށް ދިމާވެފައިވާ މި ދަތި ހާލަތުން އަރައިގަތުމަށްޓަކައި އެމްޑީޕީގެ އެތެރޭގެ ކޮމިޓީތަކުން ވެސް ދިރާސާތައް ކުރަމުންދާ ކަމަށް އެ ޕާޓީން ބުނޭ.
އެމްޑީޕީ ގެ ޗެއަރޕާސަން، ކުރީގެ ރައީސް މުހައްމަދު ނަޝީދު އާދިއްތަ ދުވަހުގެ ނޫސްވެރިންގެ ބައްދަލުވުމުގައި | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ މި ސަރުކާރަށް ރާއްޖެއަށް ދިމާވެފައިވާ މާލީ މައްސަލަތައް ހައްލު ނުކުރެވޭނެ ކަން މިހާރު ސާފުވެފައިވާ ކަމަށާ އެމަނިކުފާނު މަޝްވަރާގެ މޭޒަށް ވަޑައިގަންނަވަން ޖެހޭ ކަމަށް އެމްޑީޕީގެ ޗެއަރޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އާދިއްތަ ދުވަހު އެމްޑީޕީ އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނަޝީދު ވިދާޅުވީ ރައީސް ޑރ. މުހައްމަދު މުއިއްޒާ މަޝްވަރާ ކުރުމަށް އެ ޕާޓީގެ ފަރާތުން އެދިފައިވާ ކަމަށެވެ. އަދި އަބަދުވެސް މަޝްވަރާގެ މޭޒުމައްޗަށް އައުމަށް އެދޭނެ ކަމަށާ ހަމަ މިހާރު ވެސް މަޝްވަރާގެ މޭޒުމައްޗަށް ހުރިހާ ބޭފުޅުން ވެސް ވަޑައިގަތުމަކީ ކޮންމެހެން ވެސްބޭނުންތެރި ކަމެއް ކަމަށެވެ.
އަދި މިއަދު ރާއްޖޭގެ މާލީ މައްސަލަތައް މި ހުރި ގޮތުން، މި ސަރުކާރަށް އެކަން ހައްލު ކުރެވެން ނެތް ކަން ވަރަށް ބޮޑަށް ސާފު. ހަމަ ވަރަށް ބޮަޑަށް ސާފު. ބޭންކް އޮފް މޯލްޑިވްސްގަ ހަމަ ނެތީ އިނގޭތޯ ފައިސާ. ޑޮލަރު. ބޭރު ފައިސާ. ނެތިގެން ވަރަށް ވަރަށް ކަންބޮޑުވެފަ ވަރަށް ގިނަ ރައްޔިތުން ތިބީ. އަދި ޚާއްސަކޮށް އިލްމީ ގޮތުން މިކަންކަމާ ގުޅޭ ގޮތުން ކަންކަން ދިރާސާ ކޮށް ބަލައި، ހަދާ ބޭފުޅުން، އެ ބޭފުޅުންނަށް ރަތް ބޮކި ދިއްލިފަ މިހާރު ވަނީ. އެހެންވީމާ އަޅުގަނޑުމެން އަނެއްކާ ވެސް ތަކުރާރު ކުރަން ސަރުކާރުން މޭޒު ދަށަށް އަންނަން އެބަ ޖެހެއޭ.އެމްޑީޕީގެ ޗެއަރޕާސަން، ކުރީގެ ރައީސް މުހައްމަދު ނަޝީދު
ރައީސް ނަޝީދު ވިދާޅުވީ މި ސަރުކާރަށް ބޭރު ފައިސާ އެއް ބޭރުން ގެނެވިފައި ނުވާ ކަމަށެވެ. އެގޮތުން ބޮންޑެއް ވިއްކައިގެން ވެސް ޑޮލަރެއް ނުހޯދުނު ކަމާށާ ލުއި ލޯނެއް ނަގައިގެން ވެސް އަދި އެހެން ކަމެއް ކޮށްގެން ވެސް އިތުރަކަށް އެންމެ ޑޮލަރެއް ވެސް ނުހޯދުނު ކަމަށެވެ. އެހެން ކަމުން އަބަދުވެސް މަޝްވަރާގެ މޭޒަށް ވަޑައިގަތުމަށް ހުރިހާ ފަރާތަކަށް ވެސް އެ ޕާޓީ އިން ގޮވާލާ ކަމަށް ރައީސް ނަޝީދު ވިދާޅުވި އެވެ.
އޭގެ އިތުރުން ރައީސް ނަޝީދު ވަނީ އެ ޕާޓީގެ ފަރާތުން ވެސް ރާއްޖޭގެ މާލީ ހަލާތާ ގުޅޭ ގޮތުން ބަލަން ޖެހޭ ކަންކަން ބަލަމުންދާ ކަން ފާހަގަ ކުރައްވާފަ އެވެ. އަދި މަޝްވަރާތައް ޕާޓީގެ އެތެރޭގެ ކޮމިޓީތަކުން ވެސް ކުރަމުންދާ ކަމަށް ވިދާޅުވި އެވެ. މިކަންކަމުގައި ރައްޔިތުންނަށް ލުއިފަސޭހަ ގޮތްތައް ހޯދައިދިނުމަށް އެމްޑީޕީ އިން ކެނޑިނޭޅި މަސައްކަތް ކުރާނެ ކަމަށް ވެސް އެމަނިކުފާނު ވިދާޅުވި އެވެ.
