ހުރްމުޒް ކަނޑުއޮޅީގެ ކަންކަމަށް ބަދަލު ނުގެންނަން އެމެރިކާއިން އީރާނަށް އަންގައިފި

ދޯހާގައި ދެ ގައުމުގެ މެދުގައި ނުސީދާކޮށް ކުރިއަށްދިޔަ މަޝްވަރާތައް ނިމުމަކަށް އައުމާއެކު، ހުރްމުޒް ކަނޑުއޮޅީގެ މަސްރަހާ ގުޅޭގޮތުން އެމެރިކާއިން އީރާނަށް ސާފު މެސެޖުތަކެއް ދީފައިވާ ކަމަށް "އަލް އަރަބިއްޔާ" އަށް މައުލޫމާތު ދިން މަސްދަރުތަކާ ހަވާލާދީ ބުރާސްފަތި ދުވަހު އެ ނޫހުން ރިޕޯޓުކޮށްފި އެވެ.

މަސްދަރުތަކުން ބުނި ގޮތުގައި،ހުރްމުޒް ކަނޑުއޮޅީގެ މިހާރުގެ ހާލަތަށް އެއްވެސް ބަދަލެއް ގެނައުމަށް އެމެރިކާއިން ދެކޮޅު ހަދާކަން ވޮޝިންގްޓަނުން ވަނީ އީރާނަށް އަންގާފަ އެވެ.

އެ ސަރަހައްދުގެ މަސްރަހަށް ގެންނަ ކޮންމެ ބަދަލަކީ ދެ ގައުމުގެ މެދުގައި ވެފައިވާ އެއްބަސްވުމާ ޚިލާފުވުން ކަމަށް ބަލާނެ ކަމަށް އެމެރިކާއިން ތެހެރާނަށް އަންގާފައިވާ ކަމަށް އެ މަސްދަރުތަކުން ބުނެ އެވެ. އަދި ހުރްމުޒް ކަނޑުއޮޅީގެ މައްސަލައިގައި އީރާނުން ގެންގުޅޭ ސިޔާސަތަކީ، އެއްބަސްވުމަށް އަމަލުކުރުމުގައި އެ ގައުމުން ދޭ ސަމާލުކަން ވަޒަންކުރެވޭނެ ފުރަތަމަ އިމްތިހާނު ކަމަށް އެމެރިކާއިން ދެކޭ ކަމަށްވެސް މަސްދަރުތަކުން ފާހަގަކުރި އެވެ.

ސްޓްރެޓީޖިކް ގޮތުން މުހިންމު އެ ކަނޑުއޮޅީގައި އީރާނުން ހިންގާ ހަރަކާތްތައް އެމެރިކާއިން ވަރަށް ގާތުން ބަލަމުންދާ ކަމަށް މަސްދަރުތަކުން ބުނެ އެވެ. މީގެ އިތުރުން، އީރާނުގެ ހިފަހައްޓާފައިވާ ފައިސާ ދޫކުރުމުގައި އެއްވެސް ކުރިއެރުމެއް ލިބޭނީ، ދެ ގައުމުގެ މެދުގައި ސޮއިކޮށްފައިވާ ފަހުމުނާމާއަށް އީރާނުން ފުރިހަމައަށް އަމަލުކުރުމުން ކަމަށްވެސް އެ ގައުމަށް ވަނީ އަންގާފަ އެވެ.

އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ހުރްމުޒް ކަނޑުއޮޅީގެ ކަންކަމަށް އެމެރިކާއިން ނުފޫޒު ފޯރުވަން މަސައްކަތްކޮށްފިނަމަ، ވަރުގަދަ އަދި އަވަސް ރައްދެއް ދޭނެ ކަމަށް އީރާނުން ބުރާސްފަތި ދުވަހު ވަނީ ބުނެފަ އެވެ. އަދި އެ ސަރަހައްދުގެ ވައިގެ ސަރަހައްދުގައި އެމެރިކާގެ އަސްކަރީ މަތިންދާބޯޓުތައް ހަރަކާތްތެރިވުމަކީ މުޅި ސަރަހައްދުގެ ސަލާމަތަށް އޮތް ނުރައްކަލެއް ކަމަށްވެސް އީރާނުން ބުނެފައިވެ އެވެ.

އީރާނުގެ ހަތިޔާރު އެޅި ބާރުތަކުގެ އޮޕަރޭޝަންތައް ވިލަރެސްކުރާ "ޚާތަމް އަލް-އަންބިޔާ ސެންޓްރަލް ހެޑްކުއާޓާސް" އިން ބުނީ، ހުރްމުޒް ކަނޑުއޮޅިން ދަތުރުކުރާ ހުރިހާ ތެޔޮ ޓޭންކަރުތަކާއި މުދާ އުފުލާ ބޯޓުފަހަރުތަކުންވެސް ތެހެރާނުން ކަނޑައަޅާފައިވާ ރޫޓުތަކަށް އަމަލުކުރަން ޖެހޭނެ ކަމަށެވެ. އަދި ދަތުރުފަތުރުގެ އުސޫލުތަކާ ޚިލާފުވާ ނަމަ ވަގުތުން ފިޔަވަޅު އަޅާނެ ކަމުގެ އިންޒާރުވެސް އެ އިދާރާއިން ވަނީ ދީފަ އެވެ.

މެދުއިރުމަތީގެ ހަނގުރާމަ ހުއްޓުވުމަށް ކުރެވޭ ޑިޕްލޮމެޓިކް މަސައްކަތްތަކުގެ ތެރެއިން، އެމެރިކާއާއި އީރާނުގެ މެދުގައި ދެން ބާއްވާ ނުސީދާ މަޝްވަރާތައް އޮންނާނީ އީރާނުގެ ރޫހާނީ މީޑަރުގެ ޖަނާޒާއަށް ފަހުގައި ކަމަށް މެދުވެރިއެއްގެ ދައުރު އަދާކުރާ ފަރާތްތަކުން ބުރާސްފަތި ދުވަހު ބުނެފައިވެ އެވެ.

އިގްތިސާދީ ގޮތުން މުހިންމު ހުރްމުޒް ކަނޑުއޮޅި އަލުން ހުޅުވާލުމަށާއި ހަމަނުޖެހުންތައް ނިމުމަކަށް ގެނައުމަށް ވަގުތީ އެއްބަސްވުމަކަށް އާދެވިފައިވީ ނަމަވެސް، އީރާނުގެ ނިއުކްލިއާ ޕްރޮގްރާމް ފަދަ ބޮޑެތި މައްސަލަތަކުގައި އަދިވެސް މަޝްވަރާކޮށް ގޮތްތަކެއް ނިންމަން ޖެހެ އެވެ.