ތެޔޮ ފީފާއެއްގެ އަގު 350 ޑޮލަރަށް އެރުން ހުއްޓުވީ އެމެރިކާ އިން: ޓްރަމްޕް

ހުރްމުޒް ކަނޑި އޮޅީގެ ސަރަހައްދުގައި އެމެރިކާގެ ނޭވީ ސިފައިން ހިންގި އޮޕަރޭޝަން ތަކުގެ ސަބަބުން، ތެލުގެ އަގު 350 އެމެރިކާ ޑޮލަރަށް އެރުމުން ހުއްޓުވިފައިވާ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް ވިދާޅުވީ އެމެރިކާގެ ނޭވީ ބާރު ތަކުގެ ޙަރަކާތްތައް ހުރްމުޒް ކަނޑު އޮޅީގައި ހިންގާފައިވާ ކަމަށާއި، ތެޔޮ ޓޭންކަރު ތަކަށް ފަސޭހަކަމާ އެކު ދަތުރު ކުރެވޭނެ މަގު ކަށަވަރު ކޮށްދީފައިވާ ކަމަށެވެ. ހުރްމުޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި އެންމެ މުހިންމު ދައުރެއް އަދާ ކުރާ ކަނޑު އޮޅި އެވެ. 

އެއާ އެކު ޓްރަމްޕް ވިދާޅުވީ، އެމެރިކާގެ ނޭވީ ބާރު ތަކުން ކުރިއަށް ގެންދިޔަ މި ހަރަކާތް ތަކުގެ ސަބަބުން ދުނިޔޭގެ ތެލުގެ ބާޒާރުގައި ބޮޑެތި ހަމަނުޖެހުން ތަކެއް ދިމާވުން ހުއްޓުވިފައިވާ ކަމަށެވެ. އެމެރިކާގެ ސިފައިންގެ މި ހަރަކާތް ތަކުގެ ސަބަބުން ތެލުގެ އަގު ބަލިކަށި ނުވެ، ދުނިޔޭގެ އިޤްތިސާދަށް ބޮޑެތި ނޭދެވޭ އަސަރު ތަކެއް ކުރުން ހުއްޓިފައިވާ ކަމަށް ވެސް ޓްރަމްޕް ވިދާޅުވި އެވެ. 

ދުނިޔޭގެ ތެލުގެ ވިޔަފާރީގެ ގިނަ ދަތުރު ތަކެއް ހުރްމުޒް ކަނޑު އޮޅިން ކުރަމުން އަންނައިރު، އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން މި ކަނޑު އޮޅިން ދަތުރު ކުރުން ވަނީ ދަތިވެފައި އެވެ. އެކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާ އަށް އުފުލިގެން ދިޔައިރު، މި ސަރަހައްދުގެ ރައްކާތެރިކަން ކަށަވަރު ކުރުމަކީ ދުނިޔޭގެ އިޤްތިސާދަށް ވަރަށް މުހިންމު ކަމެކެވެ. 

ހުރްމުޒް ކަނޑު އޮޅިން ދަތުރު ކުރަމުން އަންނަ ތެޔޮ ޓޭންކަރު ތަަކަށް ރައްކާތެރިކަމާ އެކު، އަދި ފަސޭހަކަމާ އެކު ދަތުރު ކުރެވޭނެ މަގު ފަހިކޮށްދިނުމަކީ އެމެރިކާ އިން ބޭނުންވި އަމާޒު ކަމަށް ޓްރަމްޕް ތަކުރާރުކޮށް ވިދާޅުވި އެވެ. އަދި އެކަމުގެ ސަބަބުން ދުނިޔޭގެ ބާޒާރުގައި ތެޔޮ ފީފާއެއްގެ އަގު 350 އެމެރިކާ ޑޮލަރަށް އެރުމުން ހުއްޓިފައިވާ ކަަމަށް ޓްރަމްޕް ވަނީ ފާހަގަ ކުރައްވައިފަ އެވެ. 

އެމެރިކާގެ ނޭވީ ބާރު ތަކުން މި ސަރަހައްދުގައި ކުރިއަށް ގެންދާ އޮޕަރޭޝަން ތަކަކީ ބައިނަލްއަޤުވާމީ ވިޔަފާރި ރައްކާތެރި ކުރުމަށް ކުރާ މަސައްކަތެއް ކަމަށް އެމެެރިކާ އިން އަބަދު ވެސް ބުނެ އެވެ.