ޚާމަނާއީގެ ޖަނާޒާގައި ޕާކިސްތާންގެ ބޮޑު ވަޒީރު ބައިވެރިވެ ވަޑައިގަންނަވާނެ ކަމަށް ހާމަ ކޮށްފި

އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ޖަނާޒާގައި ޕާކިސްތާންގެ ބޮޑު ވަޒީރު ޝެހްބާޒް ޝަރީފް ބައިވެރިވެ ވަޑައިގަންނަވާނެ ކަމަށް، ޕާކިސްތާންގެ ފޮރިން މިނިސްޓްރީ އިން ހާމަ ކޮށްފި އެވެ. 

ޕާކިސްތާންގެ ފޮރިން މިނިސްޓްރީ އިން މިކަން ހާމަ ކޮށްފައި ވަނީ ބުރާސްފަތި ދުވަހު އެވެ. އެގޮތުން އެ މިނިސްޓްރީ އިން ނެރެފައިވާ ބަޔާނެއްގައި ބުނެފައި ވަނީ، ބޮޑު ވަޒީރު މި ދަތުރުފުޅު ކުރައްވާނީ އީރާން އާއި ޕާކިސްތާންއާ ދެމެދު އޮތް ގާތް ގުޅުން ފާހަގަ ކުރައްވައި، އީރާންގެ ސަރުކާރު އަދި ރައްޔިތުންނަށް ތައުޒިޔާ ފޮނުއްވުމުގެ ގޮތުން ކަމަށެވެ. 

ޚާމަނާއީ އަވަހާރަ ވެފައި ވަނީ، އެމެރިކާ އާއި އިޒްރޭލް އިން މިއަހަރުގެ ފެބްރުވަރީ މަހުގެ 28 ވަނަ ދުވަހު އީރާން އަށް ދޭން ފެށި ހަމަލާ ތަކުގައި އެވެ. ޖެހިގެން އައި މާޗު މަހުގެ އެއް ވަނަ ދުވަހު، އީރާން އިން ވަނީ ޚާމަނާއީ އަވަހާރަ ވެފައިވާކަން ރަސްމީކޮށް އިއުލާން ކޮށްފައި އެވެ. އީރާންގެ ސަރުކާރުން ބުނެފައި ވަނީ އެ ޤައުމުގެ ތާރީޚުގައި ބާއްވާ އެންމެ ބޮޑު ދައުލަތުގެ ޖަނާޒާ އަކީ ޚާމަނާއީގެ ޖަނާޒާ ކަމަށެވެ. އދަި އީރާން އިން އަންނަނީ އެކަމަށް އެންމެ ފުރިހަމަ އަށް ތައްޔާރު ވަމުންނެވެ. 

ޕާކިސްތާން އާއި އީރާންއާ ދެމެދު އޮންނަ ގުޅުމަކީ، ގިނަ ޒަމާން ތަކަކަށް ދެމިގެން ގޮސްފައިވާ، ތާރީޚީ ގުޅުމެކެވެ. ދެ ޤައުމުން ވަނީ އިޤްތިޞާދީ، ސިޔާސީ އަދި ސަގާފީ ދާއިރާާ ތަކުގައި ގާތް ގުޅުމެއް ބަދަހި ކޮށްފައި އެވެ. ޚާއްސަކޮށް ސަރަހައްދީ ސުލްޙަ އާއި އަމާންކަން ދެމެހެއްޓުމާއި، ކުށް މަދު ކުރުމަށް ދެ ޤައުމުން ވަނީ ގުޅިގެން މަސައްކަތް ތަކެއް ކޮށްފައި އެވެ. 

ޕާކިސްތާންގެ ބޮޑު ވަޒީރު ޝެހްބާޒް ޝަރީފް އީރާން އަށް ކުރައްވާ މި ދަތުރުފުޅަކީ ދެ ޤައުމުގެ ދެ މެދުގައި އޮތް ގުޅުން އިތުރަށް ބަދަހި ކުރައްވައި، އެކުވެރިކަން ވަރުގަދަ ކުރެއްވުމުގެ ގޮތުން ކުރައްވާ ދަތުރުފުޅެއް ކަމަށް ޕާކިސްތާންގެ ފޮރިން މިނިސްޓްރީ އިން ބުނެފައިވެ އެވެ. 

ޚާމަނާއީގެ ޖަނާޒާގައި ދުނިޔޭގެ އެކި ޤައުމު ތަކުގެ ލީޑަރުން ބައިވެރިވެ ވަޑައިގަންނަވާނެ ކަމަށް ބެލެވެ އެވެ. ޕާކިސްތާންގެ ސަރުކާރުން ވަނީ އީރާންގެ ރައްޔިތުންނާއި، އެ ޤައުމުގެ ސަރުކާރަށް ތައުޒިޔާ ފޮނުވައި، މިދަތި ވަގުތުގައި އީރާން އާއެކު އެ ޤައުމު ދެމި އޮތް ކަމުގެ ޔަޤީންކަން ދީފައި އެވެ.