މިޑްޓަރމް އިންތިޚާބުގެ ކުރިން، ރިޕަބްލިކަން ޕާޓީގެ ކޮންވެންޝަން ބާއްވަން ޓްރަމްޕް ނިންމަވައިފި

މިއަހަރު އެމެރިކާގައި އޮންނަ މިޑްޓަރމް އިންތިޚާބުގެ ކުރިން، ވެރިކަން ކުރާ ރިޕަބްލިކަން ޕާާޓީގެ ކޮންވެންޝަން ބާއްވަން އެ ޤައުމުގެ ރައީސް ޑޮނަލްޑް ޓްރަމްޕް ނިންމަވައިފި އެވެ.

އެމެރިކާގެ މިޑްޓަރމް އިންތިޚާބު އޮންނާނީ މިއަހަރުގެ ނޮވެމްބަރު މަހުގެ ތެރޭގައި އެވެ. ޓްރަމްޕް ނިންމަވާފައި ވަނީ، އޭގެ ކުރިން ސެޕްޓެމްބަރު މަހުގެ ތެރޭގަިއ ރިޕަބްލިކަން ޕާޓީގެ ކޮންވެންޝަން ބޭއްވުމަށެވެ. އިންތިޚާބުގެ ދެ މަސް ދުވަސް ކުރިން ބާއްވާ މި ކޮންވެންޝަން އޮންނާނީ ޑަލަސްގައި އެވެ، 

އެމެރިކާގެ މައި ދެ ސިޔާސީ ޕާޓީ ކަމަށްވާ ރިޕަބްލިކަން ޕާޓީ އާއި ޑިމޮކްރެޓިކް ޕާޓީ އިން އާންމުކޮށް ކޮންވެންޝަންތައް ބާއްވަނީ ހަތަރު އަހަރުން އެއް ފަހަރު ބާއްވާ ރިޔާސީ އިންތިޚާބުގެ ކުރިން ކަމަށް ވިޔަސް، ޓްރަމްޕް މިފަހަރު ނިންމަވާފައި ވަނީ މިޑްޓަރމް އިންތިޚާބުގެ ކުރިން ވެސް ކޮންވެންޝަނެއް ބޭއްވުމަށެވެ. އެމެރިކާގައި ދެން ރިޔާސީ އިންތިޚާބު އޮންނާނީ 2028 ވަނަ އަހަރު އެވެ. 

ޓްރަމްޕް ވިދާޅުވީ ސެޕްޓެމްބަރު މަހުގެ ނުވަ ވަނަ ދުވަހާއި، ދިހަ ވަނަ ދުވަހު ޑަލަސްގައި ބާއްވާ މި ކޮންވެންޝަން ވަރަށް ފުރިހަމަ ވާނެ ކަމަށާއި، މިއީ ކުރިން ދުވަހަކު ވެސް ކޮށްފައިވާ ކަމެއް ނޫން ކަމަށެވެ. ޓްރަމްޕް ވިދާޅުވީ މިއީ އޭނާގެ ސަރުކާރުން ހާސިލު ކޮށްފައިވާ ކާމިޔާބު ތަކާއި، މުސްތަޤުބަލު އުޖާާލާ ކުރުމަށް ކުރަމުން އަންނަ މަސައްކަތުގެ ކާމިޔާބު ފާހަގަ ކުރުމަށް ތާރީޚީ ޙަރަކާތަކަށް ވާނެ ކަމަށެވެ. 

އެމެރިކާާގެ މީޑިއާ ތަކުގައި ބުނެފައިވާ ގޮތުން މި ކޮންވެންޝަން ބާއްވަން ރިޕަބްލިކަން ޕާޓީ އިން ނިންމާފައި ވަނީ، މިފަހަރުގެ މިޑްޓަރމް އިންތިޚާބުގައި އެ ޕާޓީ އަށް ކޮންގްރެސްގެ ބާރު ގެއްލި ދާނެ ކަމުގެ ބިރު އޮތުމުންނެވެ. އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައިގެ ސަބަބުން، އެމެރިކާގެ އިޤްތިޞާދަށް އެކަމުގެ އަސަރުކޮށް، އެމެރިކާ ރައްޔިތުންގެ ދިރިއުޅުމުގެ ޚަރަދުތައް ވަނީ އިންތިހާ އަށް ބޮޑުވެފައި އެވެ. އެކަމުގެ ސަބަބުން އެމެރިކާގައި ޓްރަމްޕްގެ މަޤުބޫލުކަން އަންނަނީ ވަރަށް ބޮޑަށް ދަށްވަމުންނެވެ. 

އުމުރުން 80 އަހަރުވެފައިވާ ޓްރަމްޕް ވިދާޅުވެފައި ވަނީ، އިދިކޮޅު ޑިމޮކްރަޓިކް ޕާޓީ އަށް ކޮންގްރެސްގެ ބާރު ލިބިއްޖެ ނަމަ، އޭނާ މަގާމުން ދުރު ކުރާނެ ކަމަށެވެ. އެހެންވެ، މިޑްޓަރމް އިންތިޚާބު ކާމިޔާބު ކުރުމަށް ޓްރަމްޕް ގިނަ މަސައްކަތް ތަކެއް ކުރައްވާނެ ކަމަށް މާހިރުން އަންނަނީ ބުނަމުންނެވެ.