ސެކިއުރިޓީ ދިނުމަށް ފުލުހުން އިންކާރު ކުރުމުން، މޭގަން އާއި ދަރިން ގޮވައިގެން ޤައުމަށް ކުރާ ދަތުރާ މެދު ހެރީ އަލުން ވިސްނަވަނީ

އަންނަ މަހު ޕްރިންސް ހެރީ އާއި އޭނާގެ އަނބިކަނބަލުން އަދި ދަރިން ގޮވައިގެން އިނގިރޭސިވިލާތަށް ކުރައްވަން އޮތް ދަތުރުފުޅާ މެދު، ހެރީ ދެ ވަނަ ވިސްނުމަކަށް ދާން ޖެހިއްޖެ އެވެ.

މިއީ ފުލުހުންގެ ރައްކާތެރިކަން ފޯރުކޮށްދިނުމަށް އެދި ހެރީގެ ފަރާތުން ހުށަހެޅި ހުށަހެޅުން ބަލައި ނުގަންނަން ނިންމުމުންނެވެ. 

ބީބީސީއަށް ލިބިފައިވާ މައުލޫމާތުގެ ދަށުން ޕްރިންސް ހެރީ އާއި އޭނާގެ އަނބިކަނބަލުން މޭގަން އަދި ދެ ދަރިން އާޗީ އާއި ލިލިބެޓް ހަތަރު އަހަރަށް ފަހު ފުރަތަމަ ފަހަރަށް އިނގިރޭސިވިލާތަށް ދަތުރު ކުރުމަށް ހަމަޖެހިފައިވެ އެވެ. 

ޕްރިންސް ހެރީގެ އާއިލާ އިން އިނގިރޭސިވިލާތުގައި ހުންނަ ދުވަސްވަރު ފުލުހުންގެ ރައްކާތެރިކަން ފޯރުކޮށްދިނުމަށް ރަސްމީކޮށް އެދިފައިވެ އެވެ. ނަމަވެސް ހުކުރު ދުވަހު އެމީހުންނަށް އަންގާފައި ވަނީ ޓެކްސްގެ ފައިސާ އިން ރައްކާތެރިކަން ނުދެވޭނެ ކަމަށެވެ.

ޕްރިންސް ހެރީގެ ޓީމުން އިންތިޒާރު ކުރަމުން އައީ ރޯޔަލް އެންޑް ވީއައިޕީ އެގްޒެކެޓިވް ކޮމިޓީގެ ރައްކާތެރި ކަމުގެ ރިވިއުގެ ނަތީޖާ އަށެވެ. މި ކޮމިޓީ އިން ނިންމަނީ ހޯމް އޮފީހަށް ރަސްކަމުގެ އިސް ބޭފުޅުންނަށް ދޭން ޖެހޭ ރައްކާތެރި ކަމުގެ މިންވަރެވެ.

އިނގިރޭސިވިލާތަށް ވަޑައިގަންނަވާނެ ކަމަށް ހުކުރު ދުވަހު އިއުލާން ކުރި ފަހުން، ހެރީގެ ޓީމަށް އަންގާފައި ވަނީ ރައްކާތެރިކަން ނުދެވޭނެ ކަމަށެވެ. 

މި ދަތުރުފުޅުގައި ރަސް ކަމުގެ އެސްޓޭޓުގައި ތިއްބެވުމަށް ރަސްގެފާނު ދެއްވި ދައުވަތު ހެރީ އާއި މޭގަން ވަނީ ޤަބޫލު ކުރައްވައިފަ އެވެ. ނަމަވެސް އެ ތަނުގެ މައުލޫމާތު އާންމު ކޮށްފައި ނުވެ އެވެ. އިނގިރޭސިވިލާތުގައި ތިއްބަވާ ދުވަސްވަރު ހެރީ އާއި މޭގަން އަމިއްލަ ޕްރައިވެޓް ތަނެއްގައި ތިއްބެވުމަކީ ވެސް އެކަށީގެންވާ ކަމެކެވެ. 

ރަސްކަމުގެ އެސްޓޭޓްގައި ތިބޭއިރު ފުލުހުންގެ ރައްކާތެރިކަން ލިބޭނެ އެވެ. ނަމަވެސް، އެހެން ތަންތަނުގައި ޕްރިންސް ހެރީ އުޅުއްވާނީ ކެލިފޯނިއާ އިން އޭނާ އާއެކު ދަތުރު ކުރާ ޕްރައިވެޓް ސެކިއުރިޓީ ޓީމަށް ބަރޯސާ ވެގެންނެވެ.

ޕްރިންސް ހެރީ އާއި އޭނާގެ އާއިލާ އިނގިރޭސިވިލާތުގައި ތިއްބަވާނީ ގާާތް ގަނޑަކަށް ފަސް ދުވަހުގެ މުއްދަތަކަށް ކަމަށް ބެލެވެ އެވެ. މި ދަތުރުގައި ލަންޑަން އަދި މިޑްލަންޑްސްގައި ބާއްވާ ބައެއް ޙަރަކާތްތަކުގައި ހެރީ އާއެކު މޭގަން ވެސް ބައިވެރިވެ ވަޑައިގަންނަވާނެ އެވެ. 

ޕްރިންސް ހެރީ އިނގިރޭސިވިލާތަށް ވަޑައިގެންނެވުމަށް ހަމަޖެހިފައި ވަނީ ޖުލައި މަހު އެވެ. މި ދަތުރާ ގުޅޭ ގޮތުން ކުރިއަށް އޮތް ތަނުގައި ޕްރިންސް ހެރީ އާއި މޭގަން ފައިނަލް ނިންމުމެއް ނިންމަވާނެ އެވެ.