އިންސާނުންގެ ޕްލެސެންޓާގެ ވިޔަފާރިކުރާ ބައިނަލްއަގުވާމީ ނެޓްވޯކެއް ޕާކިސްތާނުން އަތުލައިގެންފި

އިންސާނުންގެ ޕްލެސެންޓާ (މަސް) ބޭނުންކޮށްގެން އުމުރުން ދުވަސްވުން ހުއްޓުވައިދޭ ނުވަތަ "އެންޓި-އޭޖިން" އިންޖެކްޝަން އުފެއްދުމަށްޓަކައި، ހޮސްޕިޓަލްތަކުން އެތަކެތި ވަގަށް ހޯދާ ބޭރުކުރާ ނެޓްވޯކެއްގެ މައްސަލަ ޕާކިސްތާނުގެ ކަމާބެހޭ އިދާރާތަކުން ތަހުގީގު ކުރަން ފަށައިފި އެވެ.

ޕާކިސްތާނުގެ ފެޑަރަލް އިންވެސްޓިގޭޝަން އެޖެންސީ (އެފް.އައި.އޭ) އިން ތުހުމަތުކުރާ ގޮތުގައި، މި ގްރޫޕުން މަހަކު ގާތްގަނޑަކަށް 200 ކިލޯގެ ޕްލެސެންޓާ އެކި ހޮސްޕިޓަލްތަކުން ގަނެ އެވެ. އެފް.އައި.އޭ އިން ބީބީސީ އުރުދޫ އަށް މައުލޫމާތު ދިން ގޮތުގައި، މި ތަކެތި ހިއްކައި ޕްރޮސެސް ކުރުމަށްފަހު ގައުމުން ބޭރަށް ފޮނުވުމުގެ މަސައްކަތް މި ގްރޫޕުން ކުރަމުންދެ އެވެ.

މިދިޔަ ހަފުތާގައި އިސްލާމްއާބާދުގައި ހިންގި ރޭޑެއްގައި، ގަވާއިދާ ހިލާފަށް ޕްލެސެންޓާ ޕްރޮސެސް ކުރާ މަރުކަޒަކުން 500 ކިލޯގެ މަސް ފެނިފައިވާއިރު، މި މައްސަލައާ ގުޅިގެން ފަސް މީހަކު ވަނީ ހައްޔަރުކޮށްފަ އެވެ.

އެ އެޖެންސީން އާންމުކޮށްފައިވާ ފޮޓޯތަކުން ފެންނަ ގޮތުގައި، ޕްލެސެންޓާ ރައްކާކޮށް ޕްރޮސެސް ކުރުމަށް ބޭނުންކުރާ މަރުކަޒަކަށް ބަދަލުކޮށްފައިވާ ގެއެއްގެ ތެރޭގައި، ޓްރޮލީތަކެއްގެ މަތީގައި ހިއްކާފައިވާ މަސްތައް އަތުރާފައި ހުއްޓެވެ.

މީގެ އިތުރުން، ވިއެޓްނާމަށް ފޮނުވުމަށް ތައްޔާރުކޮށްފައި އޮތް 100 ކިލޯގެ މަސް، އިސްލާމްއާބާދު އެއާޕޯޓުން ބުދަ ދުވަހު އެފް.އައި.އޭގެ އޮފިޝަލުން ވަނީ އަތުލައިގެންފަ އެވެ.

ޕާކިސްތާނުގެ ހިއުމަން އޯގަން ޓްރާންސްޕްލާންޓް އޮތޯރިޓީގެ އޮފިސަރެއް ކަމަށްވާ ހީނާ ކަންވަލް ވިދާޅުވި ގޮތުގައި، ހައްޔަރުކުރި ފަސް މީހުން ޕްލެސެންޓާ ގަނެފައިވަނީ އިސްލާމްއާބާދާއި ރާވަލްޕިންޑީގެ ހޮސްޕިޓަލްތަކުންނެވެ. އެމީހުން ކޮންމެ ޕްލެސެންޓާ އެއް ގަނެފައިވަނީ ގާތްގަނޑަކަށް 800 ރުޕީސް (2.90 ޑޮލަރު) އަށެވެ.

އެފް.އައި.އޭ އިން ހާމަކުރި ގޮތުގައި، މި ތަކެތި ބޭރަށް އެކްސްޕޯޓް ކުރަނީ އުމުރުން ދުވަސްވުން ހުއްޓުވައިދޭ އިންޖެކްޝަން އުފެއްދުމަށެވެ. އަދި މިގޮތަށް އުފައްދާ ކޮންމެ އިންޖެކްޝަނެއްގެ އަގު 700,000 ރުޕީސް (2,530 ޑޮލަރު) އަށް އަރާ ކަމަށް އެ އިދާރާއިން ބުނެއެވެ.

މި ނެޓްވޯކުގެ ހަރަކާތްތައް ވެރިރަށް އިސްލާމްއާބާދުގެ އިތުރުން ލާހޯރު، ޕެޝާވަރު އަދި ރާވަލްޕިންޑީ ފަދަ ބޮޑެތި ސިޓީތަކަށް ފެތުރިފައިވާ ކަމަށް އެފް.އައި.އޭ އިން ގަބޫލުކުރެ އެވެ. އަދި މި ޖަރީމާގައި އިމިގްރޭޝަން އޮފިސަރުންނާއި، ކުނި މެނޭޖްކުރާ ކުންފުނިތަކާއި ހޮސްޕިޓަލްތަކުގެ ބައިވެރިވުން އޮތްތޯ ބެލުމަށް ވެސް ދަނީ ތަހުގީގު ކުރަމުންނެވެ.

ވިޔަފާރީގެ ބޭނުމަށް އިންސާނުންގެ ގުނަވަންތައް ނަގައި ބޭނުންކުރާ ފަރާތްތަކަށް ޕާކިސްތާނުގެ ގާނޫނުގެ ދަށުން 10 އަހަރާ ހަމައަށް ޖަލު ހުކުމެއް އައުމާއެކު، އެއް މިލިއަން ރުޕީސްއާ ހަމައަށް ޖޫރިމަނާ ކުރެވޭނެ އެވެ.

އެފް.އައި.އޭގެ އޮފިޝަލަކު ބީބީސީ އުރުދޫ އަށް ވިދާޅުވީ، މީގެ ކުރިން ވެސް ގަވާއިދާ ހިލާފަށް އިންސާނުންގެ ގުނަވަންތައް ބަދަލުކުރުމުގެ މައްސަލަތަކުގައި ފިޔަވަޅު އަޅާފައިވާނެ ކަމަށެވެ. ނަމަވެސް، މިއީ އިންސާނުންގެ ޕްލެސެންޓާގެ ވިޔަފާރިކުރާ ބައިނަލްއަގުވާމީ ނެޓްވޯކެއް އަތުލައިގަނެވުނު ފުރަތަމަ ފަހަރު ކަމަށް އޭނާ ފާހަގަކުރެއްވި އެވެ.

ޕާކިސްތާނުގެ އަންހެނުންގެ ބަލިތަކާބެހޭ ޑޮކްޓަރެއް ކަމަށްވާ ސަދަފް ތާރިގު ވިދާޅުވި ގޮތުގައި، މަހަކީ ބަލިމަޑުކަން ފެތުރުމުގެ ނުރައްކާ ބޮޑު މެޑިކަލް ކުަންޏެއް ކަމަށްވާތީ، އެ ތަކެތި ނައްތާލުމުގައި ހަރުކަށި އުސޫލުތަކެއް ކަނޑައެޅިފައިވެ އެވެ.

ދުނިޔޭގެ ގިނަ ގައުމުތަކެކޭ އެއްފަދައިން ޕާކިސްތާނުގައި ވެސް އާންމު އުސޫލަކީ، ދަރިފުޅު ވިހެއުމަށްފަހު މަސް ކްލިނިކަލް ކުނީގެ ގޮތުގައި އުކާލުމެވެ.

މިފަދަ ތަކެތި ނައްތާލުމުގެ ހުއްދަ އޮންނަނީ ހަމައެކަނި ސަރުކާރުން ހުއްދަދީފައިވާ ކުންފުނިތަކަށެވެ. އަދި ހޮސްޕިޓަލްތަކުން މި ތަކެތި ނައްތާލާ ގޮތުގެ ފުރިހަމަ ރެކޯޑްތައް ބަލަހައްޓަން ޖެހެ އެވެ.

މަހަކީ މާބަނޑު ދުވަސްވަރު ރަހިމުގެ ތެރޭގައި އުފެދި، ދަރިފުޅަށް ބޭނުންވާ މުހިންމު މާއްދާތައް ފޯރުކޮށްދޭ ވަގުތީ ގުނަވަނެކެވެ. މީގެ މައިގަނޑު ބޭނުން ނިމުމަކަށް އަންނަނީ ވިހެއުމުގެ ތެރޭގައި މައިމީހާގެ ހަށިގަނޑުން އެ ބޭރުވުމުންނެވެ.

ނަމަވެސް، ޕްރޮޓީން، ދަގަނޑު އަދި ފެޓް ގިނަ އަދަދަކަށް އެކުލެވޭ ޕްލެސެންޓާ އަކީ ބޮޑެތި މީހުންނަށް ވެސް ފައިދާހުރި އެއްޗެއް ކަމަށް ބައެއް މީހުން ގަބޫލުކުރެ އެވެ. އަދި މަސް ބޭނުންކޮށްގެން އުފައްދާ ގުޅަ ބޭހާއި އިންޖެކްޝަނަކީ ހަށިގަނޑުގެ ސެލްތައް އާލާކުރުމަށް އެހީތެރިވެދޭ އެއްޗެއް ކަމަށް ބައެއް ފަރާތްތަކުން ބުނެ އެވެ. އެހެންނަމަވެސް، މިކަމުގެ ފަހަތުގައިވާ ސައިންޓިފިކް ހެކިތަކާއި، މިކަމާ ގުޅޭ ގޮތުން ދުނިޔޭގެ އެކި ގައުމުތަކުގައި އަމަލުކުރާ ގަވާއިދުތައް ތަފާތެވެ.