ޕާކިސްތާނުގައި މީހުން ތޮއްޖެހިފައިވާ ބަހެއް ފުރޮޅާލައިގެން ވެއްޓި 40 މީހުން މަރުވެއްޖެ

ޕާކިސްތާނުގެ ހުޅަނގު ދެކުނުގައި އޮންނަ ހައިވޭއަކުން ދަތުރުކުރި، މީހުން އިންތިހާއަށް ގިނަ ބަހެއް ވެއްޓި ހިނގި ނުރައްކާތެރި އެކްސިޑެންޓެއްގައި 40 މީހުން މަރުވެ، 8 މީހަކަށް އަނިޔާވެއްޖެ ކަމަށް އެ ގައުމުގެ އޮފިޝަލުން ހުކުރު ދުވަހުގެ ހެނދުނު ވިދާޅުވެއްޖެ އެވެ.

ބަލޮޗިސްތާން ސަރުކާރުގެ ތަރުޖަމާނު ޝާހިދު ރިންދު ވިދާޅުވި ގޮތުގައި، މި ހާދިސާ ހިނގާފައިވަނީ ބަލޮޗިސްތާނާއި ޚައިބަރް ޕަޚްތޫންޚުވާ ޕްރޮވިންސް ގުޅޭ ބޯޑަރު ކައިރީގައި އޮންނަ ދާނާ ސަރު ނަމަކަށް ކިޔާ އެކަހެރި ސަރަހައްދެއްގަ އެވެ. މި ހާދިސާ ހިނގީ ބަސް ކޮންޓްރޯލުން ނެއްޓިގެން ގޮސް ހައިވޭއިން ކައްސާލައިގެން ވެއްޓިގެންނެވެ.

ތަރުޖަމާނު ޝާހިދު ރިންދު އިތުރަށް ވިދާޅުވީ، އެކްސިޑެންޓްވި ބަހުގައި އެ އުޅަނދުގެ އަސްލު ފަސިންޖަރުންގެ އިތުރުން، މަގުމަތިން ހަލާކުވި އެހެން ބަހެއްގެ ފަސިންޖަރުން ވެސް އުފުލަމުން ދިޔަ ކަމަށެވެ. އެހެންކަމުން، އެކްސިޑެންޓްވި ވަގުތު ބަހުގައި ކެޕޭސިޓީއަށްވުރެ ގިނައިން މީހުން ތިބިކަން އޭނާ ފާހަގަކުރެއްވި އެވެ.

މި ހާދިސާއާ ގުޅިގެން ބަލޮޗިސްތާނުގެ ޗީފް މިނިސްޓަރު ސަރްފްރާޒް ބުގްތީ ނެރުއްވި ބަޔާނެއްގައި، ގިނަ އަދަދެއްގެ ބަޔަކު މަރުވި ހާދިސާއާމެދު ފުން ހިތާމައެއް ފާޅުކުރައްވާފައިވެ އެވެ. އަދި އަނިޔާވި މީހުންނަށް އެންމެ ފުރިހަމަ ސިއްހީ ފަރުވާ ފޯރުކޮށްދިނުމަށް ކަމާބެހޭ އިދާރާތަކަށް އޭނާ ވަނީ އަންގަވާފައެވެ.

މަރުވި މީހުން ދެނެގަތުމާއި، އަނިޔާވި މީހުންނަށް ފަރުވާ ދިނުމުގެ މަސައްކަތް ރެސްކިއު ޓީމުތަކުން މިހާރު ކުރަމުންދާ ކަމަށް ރިޕޯޓްކޮށްފައިވެ އެވެ.

ޕާކިސްތާނުގެ މަގުތަކުގެ ހާލަތު ދަށްވުމާއި، ޓްރެފިކް ގަވާއިދުތަކަށް އަމަލުނުކުރުމުގެ އިތުރުން، ފަރުވާކުޑަކޮށް ދުއްވުމުގެ ސަބަބުން އެ ގައުމުގައި ނުރައްކާތެރި އެކްސިޑެންޓްތައް ހިނގުމަކީ އާންމު ކަމެކެވެ. ހާއްސަކޮށް ފަރުބަދަގަދަ ސަރަހައްދުތަކުގައި މިފަދަ ހާދިސާތައް ހިނގާ މިންވަރު އިތުރެވެ.