ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ ފީއެއް ނެގުމަށް އީރާނުން ގެންގުޅޭ ޕްލޭނަށް އޮމާނުން ތާއީދުކޮށްފި

ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން "މެރިޓައިމް ސާވިސް ފީ" ނުވަތަ ކަނޑުދަތުރުފަތުރުގެ ޚިދުމަތުގެ ފީއެއް ނެގުމަށް އީރާނުން ގެންގުޅޭ ޕްލޭނަށް އޮމާނުން ތާއީދުކޮށްފި އެވެ.

އޮމާނުގެ ފޮރިން މިނިސްޓަރު ބަދުރު އަލް-ބުސައިދީ މިކަމަށް ތާއީދުކުރައްވާފައިވަނީ ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން ފީ ނެގުމާ ގުޅޭގޮތުންނެވެ.

މޮންޓެ ކާލޯ ޑައުލިޔާ އަށް އަލް-ބުސައިދީ ވިދާޅުވީ، އޮމާނުން އަބަދުވެސް އދ. ގެ ކަނޑުތަކާބެހޭ މުއާހަދާ (ޔޫއެންސީއެލްއޯއެސް) އަށް ފުރިހަމައަށް އިހުތިރާމްކުރާނެ ކަމަށެވެ. މި އިންޓަވިއު އޮމާނުގެ ފޮރިން މިނިސްޓްރީން އާންމުކޮށްފައިވަނީ މިދިޔަ ހޯމަ ދުވަހު އެވެ.

ކަނޑުއޮޅިން ހުރަސްކޮށް ދަތުރުކުރާ ކުރުމަށް އެއްވެސް ކަހަލަ ފީއެއް ނެގުމާ އޮމާނުން ދެކޮޅުކަން މިނިސްޓަރު ސާފުކޮށްދެއްވި އެވެ. ނަމަވެސް، ދަތުރުކުރުމަށް ނަގާ ފީއާއި، ތިމާވެށި ރައްކާތެރިކުރުމަށާއި ނެވިގޭޝަން ނުވަތަ ދަތުރުފަތުރުގެ ރައްކާތެރިކަމަށް ދެވޭ ޚިދުމަތްތަކަށް ނަގާ ފީއާ ދެމެދު ސާފު ތަފާތެއް ހުރިކަން އޭނާ ފާހަގަކުރެއްވި އެވެ. އަދި މިފަދަ ޚިދުމަތްތަކުގެ ފީއާ ގުޅޭގޮތުން އެ ޚިދުމަތްތަކުގެ ފައިދާ ލިބޭ ގައުމުތަކާއި ކުންފުނިތަކާއެކު އަމަލީ ގޮތުން މަޝްވަރާ ކުރެވިދާނެ ކަމަށްވެސް ވިދާޅުވި އެވެ.

އަލް-ބުސައިދީ އިތުރަށް ތަފްސީލުކޮށްދެއްވި ގޮތުގައި، މިފަދަ ފީތަކުގެ ސަބަބުން ކަނޑުދަތުރުފަތުރުގެ ރައްކާތެރިކަން އިތުރުވެ، ކަނޑުގެ ސަރަހައްދު ތަޣައްޔަރުވުމުން ސަލާމަތްކޮށް، ހާދިސާތަކާއި ކުއްލި ހާލަތްތަކަށް ތައްޔާރުވުމުގެ ގާބިލުކަން އިތުރުވާނެ އެވެ. މިއީ މަލަކާ ކަނޑުއޮޅިއާއި ސިންގަޕޫރު ސަރަހައްދުގައިވެސް ކާމިޔާބުކަމާއެކު އަމަލުކުރަމުންދާ މޮޑެލްއެއްކަން އޭނާ ފާހަގަކުރެއްވި އެވެ.

ހުރްމުޒް ކަނޑުއޮޅިއާ ގުޅޭގޮތުން ކުރިމަގުގައި ނިންމާ ކޮންމެ ނިންމުމެއްވެސް ނިންމަންވާނީ ބައިނަލްއަގުވާމީ ގާނޫނުތަކުގެ އިމުގެ ތެރެއިން ކަމަށް އޮމާނާއި އީރާނުން ފުރިހަމައަށް އެއްބަސްވާ ކަމަށް މިނިސްޓަރު ވިދާޅުވި އެވެ.

ކަނޑުގެ ސަރަހައްދުގައި ހުރި މައިންތައް ނުވަތަ ގޮވާތަކެތި ސާފުކުރުމަށް ފަރަންސޭސިވިލާތާއި އިނގިރޭސިވިލާތުން ހުށަހަޅާފައިވާ ހުށަހެޅުންތަކާ ގުޅޭގޮތުން އަލް-ބުސައިދީ ވިދާޅުވީ، ކަނޑުއޮޅިއާއި ބައިނަލްއަގުވާމީ ދަތުރުފަތުރުގެ މަގުތަކުގެ ރައްކާތެރިކަން ކަށަވަރުކުރުމުގެ މައިގަނޑު މަސްއޫލިއްޔަތު އޮތީ އީރާނުގެ އަތްމަތީގައި ކަމަށެވެ. މިއީ އީރާނާއި އެމެރިކާގެ ރައީސުންގެ މެދުގައި ދާދިފަހުން ސޮއިކުރެވުނު ފަހުމުނާމާގައިވާ ގޮތުގެ މަތިންނެވެ.

މިނިސްޓަރު މިހެން ވިދާޅުވެފައިވަނީ ހުރްމުޒް ކަނޑުއޮޅި ބެލެހެއްޓުމާ ގުޅޭގޮތުން އަލަށް އުފެއްދި އީރާން-އޮމާން ޖޮއިންޓް ކޮމިޓީގެ ފުރަތަމަ ބައްދަލުވުމަށްފަހުގަ އެވެ. އިސްލާމީ ޖުމްހޫރިއްޔާ އީރާނަށް އަމާޒުކޮށް އެމެރިކާއާއި އިސްރާއީލުން ދާދިފަހުން ދިން ހަމަލާތަކާ ގުޅިގެން، އީރާނުން ވަނީ އެ ގައުމުގެ ދުޝްމަނުންނަށާއި އެމީހުންގެ ބައިވެރިންނަށް ހުރްމު ޒްކަނޑުއޮޅި ބަންދުކޮށްފަ އެވެ.

އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް ނިމުމަކަށް ގެނައުމަށްޓަކައި، ޕާކިސްތާނުން މެދުވެރިއެއްގެ ދައުރު އަދާކޮށްގެން ތެހެރާނާއި ވޮޝިންގްޓަނާ ދެމެދު ދާދިފަހުން ވަނީ ފަހުމުނާމާއެއްގައި ސޮއިކޮށްފަ އެވެ.

14 ނުކުތާގެ މައްޗަށް އެކުލެވޭ މި އެއްބަސްވުމުގެ ދަށުން، ވިޔަފާރި އުޅަނދުފަހަރަށް އެއްވެސް ފީއަކާ ނުލައި މަދުވެގެން 60 ދުވަހުގެ މުއްދަތަށް ދަތުރުކުރެވޭނެ މަގު އީރާނުން ފަހިކޮށްދޭންޖެހެ އެވެ. އަދި 30 ދުވަހުގެ ތެރޭގައި ހުރްމުޒް ކަނޑުއޮޅީގެ ދަތުރުފަތުރުތައް ފުރިހަމައަށް އިއާދަކުރަންޖެހެ އެވެ.

މި ފަހުމުނާމާގެ ފަސްވަނަ މާއްދާގައި، ދުނިޔޭގެ އިގްތިސާދަށް ނުހަނު މުހިންމު މި ކަނޑުއޮޅީގެ މައްޗަށް އީރާނުގެ ސިޔާދަތީ ބާރު އޮތްކަން ސަރީހަ އިބާރާތުން ބަޔާންކޮށްފައިވެ އެވެ.