ހުރްމުޒް ކަނޑުއޮޅި ބެލެހެއްޓުމާ ގުޅޭގޮތުން އޮމާނާއެކު ފުރަތަމަ ފަހަރަށް އީރާނުން ބައްދަލު ކޮށްފި
ހުރްމުޒް ކަނޑުއޮޅި ބެލެހެއްޓުމާ ގުޅޭގޮތުން އީރާނާއި އޮމާނުން އެކުލަވާލާފައިވާ "ޖޮއިންޓް ހުރްމުޒް ކޮމިޓީ" ގެ ފުރަތަމަ ބައްދަލުވުން އޮމާންގެ މަސްކަޓުގައި ބާއްވައިފި. އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ބައިވެރިވެވަޑައިގެންނެވި މި ބައްދަލުވުމުގައި، ކަނޑުއޮޅީގެ މިހާރުގެ ހާލަތާއި ކުރިމަގުގައި އެ ސަރަހައްދުގެ ސަލާމަތީ ކަންކަން ބަލަހައްޓާނެ ގޮތްތަކާ ގުޅޭގޮތުން ދެ ގައުމުގެ ދެމެދުގައި ފުޅާދާއިރާއެއްގައި މަޝްވަރާކުރެވުނު.
އޮމާންގެ މުސަންދަމް ސަރަހައްދުން ހުރްމުޒް ކަނޑުއޮޅިން އުޅަނދުފަހަރު ދަތުރުކުރާތަން ފެންނަ ގޮތް - 26 ޖޫން 2026 | ރޮއިޓާސް
މެދުއިރުމަތީގެ ހަނގުރާމަ ހުއްޓާލުމަށް އީރާނާއި އެމެރިކާއާ ދެމެދު އިބްތިދާއީ އެއްބަސްވުމެއްގައި ސޮއިކުރި ފަހުން، ހުރްމުޒް ކަނޑުއޮޅި ބެލެހެއްޓުމާ ގުޅޭގޮތުން އޮމާނާއެކު ފުރަތަމަ ފަހަރަށް ބައްދަލުވުމެއް ބާއްވާފައިވާ ކަމަށް އީރާނުގެ ފޮރިން މިނިސްޓްރީން ހޯމަ ދުވަހު ބުނެފި އެވެ.
އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ އެކްސްގައި ކުރެއްވި ޕޯސްޓެއްގައި ވިދާޅުވީ، އޮމާންގެ ވެރިރަށް މަސްކަޓަށް ކުރެއްވި ދަތުރުފުޅުގައި "ޖޮއިންޓް ހުރްމުޒް ކޮމިޓީ" ގެ ފުރަތަމަ ބައްދަލުވުން ބާއްވާފައިވާ ކަމަށެވެ.
ޣަރީބްއާބާދީ އިތުރަށް ވިދާޅުވީ، މި ބައްދަލުވުމުގައި ހުރްމުޒް ކަނޑުއޮޅިއާ ގުޅުންހުރި މިހާރުގެ މައްސަލަތަކާ ބެހޭގޮތުން މަޝްވަރާކޮށް، ކުރިމަގުގައި އެ ސަރަހައްދު ބަލަހައްޓާނެ ގޮތްތަކާ މެދު ދެ ގައުމުގެ ދެމެދުގައި ޚިޔާލު ބަދަލުކުރެވުނު ކަމަށެވެ.
