އެމެރިކާ އާއި އީރާނުގެ ނުސީދާ މަޝްވަރާތައް ގަތަރުގައި ބުދަ ދުވަހު ބާއްވަނީ

މެދުވެރިންގެ ހާޒިރުގައި އެމެރިކާ އާއި އީރާނުގެ ވަފުދުތަކުގެ މެދުގައި ބާއްވާ ނުސީދާ މަޝްވަރާތަކެއް ބުދަ ދުވަހު ގަތަރުގައި ކުރިއަށްދާނެ ކަމަށް އަލް އަރަބިއްޔާގެ މަސްދަރުތަކުން އަންގާރަ ދުވަހު ބުނެފި އެވެ.

މަސްދަރުތަކުން މައުލޫމާތު ދޭ ގޮތުގައި، މި ނުސީދާ މަޝްވަރާތަކުގައި މައިގަނޑު ގޮތެއްގައި އަލިއަޅުވާލާނީ ހުރްމުޒް ކަނޑުއޮޅީގެ ސަލާމަތާއި، ސަރަހައްދީ އާންމު ހަމަޖެހުމާ ގުޅޭގޮތުންނެވެ.

މީގެ އިތުރުން، މި ހަފުތާ ނިމުމުގެ ކުރިން  ހިފަހައްޓާފައިވާ އީރާނުގެ ފައިސާގެ ތެރެއިން 3 ބިލިއަން ޑޮލަރު އެ ގައުމަށް ލިބޭނެ ކަމަށް މަސްދަރުތަކުން ބުނެ އެވެ. އަދި އެމެރިކާ އާއި އީރާނުގެ ވަފުދުތަކުން އަންގާރަ ދުވަހުގެ ވަގުތެއްގައި ދޯހާގައި ގަތަރުގެ ބޮޑުވަޒީރާއި ޕާކިސްތާނުގެ މެދުވެރިންނާ ބައްދަލުކުރާނެ ކަމަށް ބެލެވޭ ކަމަށްވެސް މަސްދަރުތަކުން ފާހަގަކުރެ އެވެ.

އީރާނުގެ ފޮރިން މިނިސްޓްރީން މީގެ ކުރިން ބުނެފައިވަނީ، ހިފަހައްޓާފައިވާ ފައިސާއާ ގުޅޭގޮތުން މެދުވެރިއެއްގެ ދައުރު އަދާކުރާ ގަތަރާއެކު ބުދަ ދުވަހު މަޝްވަރާ ކުރާނެ ކަމަށެވެ. ނަމަވެސް، ގަލްފުގެ އެ ގައުމުގައި އެމެރިކާއާއެކު އެއްވެސް ބައްދަލުވުމެއް ބޭއްވުމަށް ރޭވިފައިވާ ކަމަށް ބުނާ ވާހަކަތައް އީރާނުން ވަނީ ދޮގުކޮށްފަ އެވެ.

"މާދަމާ ދޯހާގައި ކުރިއަށްދާނެ ކަމަށް ބެލެވެނީ ދެ ފަރާތުގެ މެދުގައި ވެފައިވާ ފަހުމުނާމާގެ މާއްދާތައް ތަންފީޒުކުރުމާ ގުޅޭ މަޝްވަރާތައް. މީގެ ތެރޭގައި އީރާނުގެ ހިފަހައްޓާފައިވާ ފައިސާ ދޫކުރުމާ ގުޅޭ މާއްދާވެސް ހިމެނޭ. މި މަޝްވަރާތައް ކުރިއަށްދާނީ ގަތަރުގެ ފަރާތްތަކާއެކު،" ކޮންމެ ހަފުތާއަކު ބާއްވާ ނޫސްވެރިންގެ ބައްދަލުވުމުގައި ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވި އެވެ.

ބަޣާއީ އިޝާރާތް ކުރެއްވީ އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ބޭރު ގައުމުތަކުގައި ހިފަހައްޓާފައިވާ އީރާނުގެ ފައިސާއަށެވެ. މިއީ މެދުއިރުމަތީގެ ހަނގުރާމަ ހުއްޓާލުމަށް ތެހެރާނާއި ވޮޝިންޓަނާ ދެމެދު ވެވޭ އެއްބަސްވުމެއްގެ ދަށުން މަޝްވަރާ ކުރެވެމުންދާ މުހިންމު މައްސަލައެކެވެ.

މެދުއިރުމަތީގެ ހަމަނުޖެހުންތަކަށް ދާއިމީ ހައްލެއް ހޯދުމަށްޓަކައި އެމެރިކާއާއެކު އެއްބަސްވުމަކަށް އައުމަށް އީރާނުން ހުށަހަޅާފައިވާ ޝަރުތަކީ، ހިފަހައްޓާފައިވާ ފައިސާގެ ބައެއް ދޫކޮށްލުމެވެ.

މިހާރު ސޮއިކޮށްފައިވާ ފަހުމުނާމާގައި ހިމެނޭ ކަންކަމުގެ ތެރޭގައި، ތެހެރާނާ ދެކޮޅަށް އަޅާފައިވާ "ހުރިހާ ބާވަތެއްގެ ދަތިކުރުމުގެ ފިޔަވަޅުތައް" ނިމުމަކަށް ގެނައުމަށާއި، އީރާނުގެ ހިފަހައްޓާފައިވާ ފައިސާ އާއި މުދާ އެ ގައުމަށް ފުރިހަމައަށް ބޭނުންކުރެވޭނެ ގޮތް ހެދުމަށް އެމެރިކާއިން ވެފައިވާ އިލްތިޒާމު ހިމެނެ އެވެ.

1979 ވަނަ އަހަރު އީރާނަށް އައި އިސްލާމީ އިންގިލާބުގައި، އެމެރިކާގެ ތާއީދު އޮތް ޝާހު މުހައްމަދު ރިޒާ ޕަހްލަވީގެ ވެރިކަން ވައްޓާލި ފަހުން، އެމެރިކާ އާއި ހުޅަނގުގެ ގައުމުތަކުން ދަނީ އީރާނުގެ މުދާ ހިފަހައްޓައި، އެ ގައުމާ ދެކޮޅަށް ވަރުގަދަ ދަތިކުރުމުގެ ފިޔަވަޅުތައް އަޅަމުންނެވެ.

އީރާނުގެ ހިފަހައްޓާފައިވާ ފައިސާގެ ޖުމްލަ އަދަދާ ގުޅޭ ރަސްމީ ތަފާސްހިސާބެއް ނެތް ނަމަވެސް، މީޑިއާ ރިޕޯޓްތައް އަންދާޒާކުރާ ގޮތުގައި އެ އަދަދު އުޅެނީ 100 ބިލިއަން ޑޮލަރާއި 123 ބިލިއަން ޑޮލަރާ ދެމެދުގަ އެވެ.