މިހަފްތާގައި އީރާނުން ދޯހާގައި އެމެރިކާއާ މަޝްވަރާކުރާ ޚަބަރަކީ ދޮގެއް

އީރާނާއި އެމެރިކާއާ ދެމެދު ދާދިފަހުން ސޮއިކުރި ފަހުމުނާމާގެ ދަށުން އުފައްދާފައިވާ ވޯކިން ގްރޫޕްތަކުގެ ބައްދަލުވުންތަކެއް ގަތަރުގެ ވެރިރަށް ދޯހާގައި މި ހަފުތާގައި ބޭއްވުމަށް ހަމަޖެހިފައިވާ ކަމަށް މީޑިއާތަކުން ރިޕޯޓްކޮށްފައިވާ ޚަބަރުތައް އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ދޮގުކުރައްވައިފި އެވެ. އޭނާ ވިދާޅުވީ މި ހަފުތާގައި އެމެރިކާއާއެކު އެއްވެސް "ޓެކްނިކަލް މަޝްވަރާއެއް" ބޭއްވުމަށް ތާވަލުކުރެވިފައި ނުވާ ކަމަށެވެ.

އީރާނުގެ މަޝްވަރާ ޓީމުގެ އިސް މެންބަރެއްގެ ގޮތުގައި ހިމެނިވަޑައިގަންނަވާ ޣަރީބްއާބާދީ ނޫސްވެރިންނަށް މައުލޫމާތު ދެއްވަމުން ވިދާޅުވީ، ދޯހާގައި ޓެކްނިކަލް މަޝްވަރާތަކެއް ވަރަށް އަވަހަށް ފެށުމަށް ހަމަޖެހިފައިވާ ކަމަށް މީޑިއާތަކުން ފަތުރަމުންދާ ޚަބަރުތަކަކީ "ކަށަވަރު ނުކުރެވޭ" ވާހަކަތަކެއް ކަމަށެވެ.

އޭނާ ވިދާޅުވީ ވޯކިން ގްރޫޕްތަކުގެ ޓެކްނިކަލް ބައްދަލުވުންތަކެއް މި ހަފުތާގައި ބޭއްވުމަށް އެއްވެސް ވަރަކަށް ތާވަލުކުރެވިފައި ނުވާ ކަމަށެވެ.

ޣަރީބްއާބާދީ އިތުރަށް ވިދާޅުވީ، އިސްލާމްއާބާދު ފަހުމުނާމާގެ ދަށުން އަނެއް ފަރާތުން (އެމެރިކާއިން) ވެފައިވާ އިލްތިޒާމްތައް ތަންފީޒުކުރުމުގެ މަސައްކަތްތައް ހިމެނޭހެން، ގަތަރާއެކު ކުރިއަށްދާ މަޝްވަރާތައް މެދުނުކެނޑި ކުރިއަށްދާ ކަމަށެވެ.

އީރާނުގެ ޑިޕްލޮމެޓް ވިދާޅުވީ، ކަނޑައެޅިފައިވާ ވޯކިން ގްރޫޕްތަކުގެ އޮނިގަނޑުގެ ތެރެއިން ބާއްވާ ޓެކްނިކަލް މަޝްވަރާތަކުގެ ފުރަތަމަ ބުރު ބޭއްވޭނީ، އެކަމަށް ބޭނުންވާ ޝަރުތުތައް ފުރިހަމަވެ، ބައްދަލުވުން ބާއްވާނެ ތާރީޚަކާއި ތަނަކާ މެދު އެއްބަސްވުމަކަށް އާދެވުމުން ކަމަށެވެ.

އަދި މި މައްސަލައިގައި މެދުވެރިންގެ ގޮތުގައި މަސައްކަތްކުރާ ގައުމުތައް މެދުވެރިކޮށް މަޝްވަރާތައް ކުރިއަށްދާކަން އޭނާ ފާހަގަކުރެއްވި އެވެ.

ޣަރީބްއާބާދީ މިހެން ވިދާޅުވެފައި މިވަނީ، ހުރްމުޒް ކަނޑުއޮޅީގެ މައްސަލަ ހިމެނޭހެން ދެ ގައުމުގެ ދެމެދުގައި ހުރި ޚިޔާލުތަފާތުވުންތައް ހައްލުކުރުމަށްޓަކައި، ދެ ފަރާތުގެ މަންދޫބުން އަންގާރަ ދުވަހު ދޯހާގައި ބައްދަލުކުރުމަށް އެއްބަސްވެފައިވާ ކަމަށް އެމެރިކާގެ ބައެއް މީޑިއާތަކުން ރިޕޯޓްކޮށްފައިވާ ދަނޑިވަޅެއްގަ އެވެ.

އެމެރިކާގެ ރައީސް ޑޮނަލްޑް ޓްރަމްޕް "ޓްރޫތް ސޯޝަލް" ގައި ކުރެއްވި ޕޯސްޓެއްގައި ވިދާޅުވެފައިވަނީ، ދެ ފަރާތުގެ މަންދޫބުން އަންގާރަ ދުވަހު ދޯހާގައި ބައްދަލުކުރާނެ ކަމަށެވެ.

ޕާކިސްތާނުން މެދުވެރިއެއްގެ ދައުރު އަދާކޮށްގެން ޖުލައި 17 ވަނަ ދުވަހު އީރާނާއި އެމެރިކާއާ ދެމެދު ސޮއިކުރި 14 ނުކުތާގެ ފަހުމުނާމާގައި، ލުބުނާނު ހިމެނޭހެން ހުރިހާ ދިމާއަކުން ކުރިމަތިލުންތައް ދާއިމީކޮށް ހުއްޓާލުމަށާއި، 30 ދުވަހުގެ ތެރޭގައި އީރާނަށް ކުރިމަތިކޮށްފައިވާ ކަނޑުގެ ބްލޮކޭޑް ނުވަތަ ބަންދު އުވާލުމަށާއި، ހޯމުޒް ކަނޑުއޮޅި މެދުވެރިކޮށް ވިޔަފާރި އުޅަނދުފަހަރު ދަތުރުފަތުރުކުރުން އަލުން އިއާދަކުރުމަށް ވަނީ ގޮވާލާފަ އެވެ.

މި ފަހުމުނާމާގެ ދަށުން، ދެ ގައުމުގެ ދެމެދުގައި ފުރިހަމަ ދާއިމީ އެއްބަސްވުމަކަށް އައުމަށްޓަކައި 60 ދުވަހުގެ މަޝްވަރާގެ މުއްދަތެއް ވަނީ ކަނޑައަޅާފަ އެވެ.

އީރާނާއި، އެމެރިކާ އަދި މެދުވެރިންގެ ގޮތުގައި ހަރަކާތްތެރިވާ ޕާކިސްތާނާއި ގަތަރުގެ މެދުގައި ބޭއްވި ހަތަރު ފަރާތުގެ މަޝްވަރާތަކުގެ ފުރަތަމަ ބުރު ބާއްވާފައިވަނީ ޖޫން 21 ވަނަ ދުވަހު ސުވިޒަލޭންޑްގަ އެވެ.

ސުވިޒަލޭންޑްގެ ބާގަންސްޓޮކް ރިސޯޓުގައި ބޭއްވި މި މަޝްވަރާތަކާއެކު، 14 ނުކުތާގެ އިސްލާމްއާބާދު ފަހުމުނާމާގެ ދަށުން 60 ދުވަހުގެ މަޝްވަރާގެ މުއްދަތު ވަނީ ފެށިފަ އެވެ.

އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް އިސްކޮށް ހުންނަވައި، ފޮރިން މިނިސްޓަރު އައްބާސް އަރާގްޗީ ހިމެނިވަޑައިގަންނަވާ އީރާނުގެ ވަފުދުން ވަނީ އެ ފަހުމުނާމާ ފުރިހަމައަށް ތަންފީޒުކުރުމަށް ބާރުއަޅުއްވާފަ އެވެ.