މި ސަރުކާރު އައުމާއެކު ބޭރު ގައުމުތަކުގެ އެހީ ނުލިބޭ، މިއީ ހުރިހާ ކަމެއްގައި ވެސް ނާގާބިލް ސަރުކާރެއް: މެންބަރު ނާޒިލް
މި ސަރުކާރުގެ ޚާރިޖީ ސިޔާސަތު ބަލިކަށިވުމުގެ ސަބަބުން ބޭރުގެ ގައުމުތަކުން ލިބެންޖެހޭ އެހީތެރިކަން ނުލިބޭ ކަމަށް ވިދާޅުވެ، އެމްޑީޕީގެ ޕާލިމެންޓްރީ ގްރޫޕްގެ ލީޑަރު ނާޒިލް ސަރުކާރަށް ވަރަށް ބޮޑަށް ފާޑުވިދާޅުވެއްޖެ. ރައްޔިތުންގެ ޓެކްސް ފައިސާ ބޭނުންކޮށްގެން ރައްޔިތުންނަށް ލުއިފަސޭހަ ކަންކަން ކޮށްދިނުމުގައި ސަރުކާރު ނާގާބިލްވެފައިވާކަން ފާހަގަކުރައްވަމުން، ޑޮލަރު މާރުކުރުމުގެ ސިޔާސަތު ފަދަ ނިންމުންތަކަކީ އެއްވެސް މަޝްވަރާއެއް ނެތި ރައީސް ބޭނުންފުޅުވާ ގޮތަށް ނިންމަވާފައިވާ ކަންކަން ކަމަށް އޭނާ ތުހުމަތުކުރެއްވި.
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް ވާހަކަ ދައްކަވަނީ. | ރާއްޖެއެމްވީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު އައުމާއެކު ބޭރު ގައުމުތަކުން ވެސް އެހީތެރިކަން ނުލިބޭ ކަމަށާއި، މިއީ ހުރިހާ ކަމެއްގައި ވެސް ނާގާބިލް ސަރުކާރެއް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ނާޒިލް ވަނީ ރައީސް މުއިއްޒުގެ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ.
މިސަރުކާރުގެ ފޮރިން ޕޮލިސީއަށް އިޝާރާތް ކުރައްވައި މެންބަރު ނާޒިލް ވިދާޅުވީ ވެރިކަމުގެ ފުރަތަމަކޮޅު ބޮޑެތި ހަރަދުތައް ކޮށްގެން ބޭރުގެ އެކި ގައުމުތަކުގެ އިކޮނޮމިކް ފޯރަމްތަކުގައި ބައިވެރިވެފައިވާ ކަމަށާއި، ނަމަވެސް މިއަދާ ހަމައަށް އޭގެ ނަތީޖާއެއް ނުފެންނަ ކަމަށެވެ.
މީގެ ކުރިން ބޭރުގެ ގައުމުތަކުން އެހީތެރިކަން ލިބުނު ނަމަވެސް މިސަރުކާރުގެ މިހާތަނަށް ބޭރުގެ އެހީ ނުލިބޭ ކަމަށް އޭނާ ވިދާޅުވި އެވެ. އަދި ވިދާޅުވީ 2024 ވަނަ އަހަރުގެ ބެޖެޓުން ފެށިގެން 2026 ވަނަ އަހަރުގެ ބަޖެޓުގައި ވެސް ބޭރުގެ ސަޕޯޓު ނުލިބޭ ކަމަށެވެ.
މީގެ އިތުރުން މެންބަރު ނާޒިލް ވިދާޅުވީ ބޭރުގެ އެހީ ނުލިބުނު ނަމަވެސް ރައްޔިތުން ހަވާލު ކުރާ ފައިސާއިން ވެސް ރައްޔިތުންނަށް ލުއިވާ ގޮތަށް އެއްވެސް ކަމެއް މިސަރުކާރަށް ކުރެވިފައިނުވާ ކަމަށެވެ. މިއީ ޕީއެންސީގެ ފައިސާ ނޫން ކަމަށާއި، ރައްޔިތުންގެ ހަޒާނާގެ ފައިސާ ބޭނުންކުރަން ޖެހޭނީ ރައްޔިތުންގެ ދިރިއުޅުން ފަސޭހަ ކޮށްދޭން ކަމަށް މެންބަރު ނާޒިލް ވިދާޅުވި އެވެ.
އެއްގޮތަކަށް ވެސް ސަރުކާރުގެ ނޫނިއްޔާ ޕީއެންސީގެ ބޭފުޅުންގެ ފައީސާއެއް ނޫން. ދިވެހި ރައްޔިތުންގެ ފައިސާ މިނަގަނީ ދިވެހި ދައުލަތުގެ ހަޒާނާއިން. ރައްޔިތުންގެ ޓެކްސް ފައިސާއިން. ނަގާފައި މިހަވާލު ކުރަނީ ރައްޔިތުންނަށް ރަނގަޅަށް ކަންތައްތައް ކުރުމަށް ރައްޔިތުންނަށް ރަނގަޅަށް ކަންތައްތައް ކޮށްދޭން މި ހަވާލުުރެވެނީ. ރައްޔިތުންނަށް ހޮވާފައި ތިބި ސަރުކާރުގެ ވެރީންނަށް މިހަވާލު ކުރެވެނީ. އެބޭފުޅުން އެކަންތައްތައް ރައްޔިތުންނަށް ކޮށްނުދެއްވާތީ ރައްޔިތުންގެ ކަންބޮޑުވުން މިއަންނަނީ. އޭގެ ތެރޭގައި އެބަޖެޓަށް ބޭރުގެ ގައުމުތަކުން އެސަޕޯޓު ނުލިބެނީ ހަގީގަތުގައި ފޮރިން ޕޮލިސީ އެންމެ އެކަށީގެންވާ ފޮރިން ޕޮލިސީއަށް ނުވާތީ. ބޭރުގެ ގައުމުތަކާ ރަނގަޅު ގުޅުމެއް ނެތް. ބޮޑެތި ގައުމުތަކާއި. ޗައިނާ އިންޑިއާ މިއީ އެންމެ ގިނައިން އެހީ އަރަބި ގައުމުތަކާއި، ސައުދީ އަރަބިއްޔާ އާއި ގަތަރާއި.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް
މީގެ އިތުރުން މެންބަރު ނާޒިލް ވިދާޅުވީ ރައީސް މުއިއްޒަކީ އެމަނިކުފާނު ބޭނުންފުޅުވާ ގޮތަށް ކަންތައްތައް ކުރައްވާ ބޭފުޅެއް ކަމަށާއި، ވަޒީރުންގެ މަޖިލީހުގައި މަޝްވަރާ ކުރެއްވި ނަމަވެސް އެގޮތަށް އެކަންކަން ކުރިއަށް ނުދާ ކަމަށް މައުލޫމާތު ލިބޭ ކަމަށެވެ.
އެގޮތުން ރިސޯޓުތަކުން ޑޮލަރު މާރު ކުރުމުގެ ސިޔާސަތު ގެނައީ ހަމައެކަނި ރައީސް މުއިއްޒު ބޭނުންފުޅު ވެގެން ކަމަށް މެންބަރު ނާޒިލް ވިދާޅުވި އެވެ. އަދި ވިދާޅުވީ ނަތީޖާއެއް ގޮތުން މިއަދު ރައްޔިތުންނަށް ޑޮލަރު ލިބެނީ 21 ރުފިޔާ އަށް ކަމަށެވެ.
އޭގެ ހެއްކެއް ކަންނެންގެ އަޅުގަނޑުމެންނަށް ރިސޯޓުތަކުގެ އާމްދަނީ މާރުކުރަން ޖެހޭ މިންވަރެއް ކަނޑައަޅާ އެކަންތަކާ ގުޅިގެން ވަރަށް އަވަސްކޮށް ނިމިގެންދިޔައީ. އޭރު 20 ޕަސެންޓް އަޅުގަނޑު ހަނދާންވާ ގޮތުގައި. ރިސޯޓުތަކުގެ އޯނަރުންނާއި، ރިސޯޓުތައް ހިންގާ އޯނަރުން އޭރު ސަރުކާރުގެ ސީދާ ރައީސުލްޖުމްހޫރިއްޔާގެ ލެވަލްއިން ވާހަކަތަކެއް ދެކެވެމުން އައީ. އެ ޕަސެންޓޭޖްތަކާ ގުޅޭގޮތުން. އަދި އިތުރަށް ވިސްނާ މަޝްވަރާ ކުރެވިގެން އައީ.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް
މެންބަރު ނާޒިލް ވިދާޅުވީ ރައީސް މުއިއްޒުގެ ސަރުކާރާއެކު ރައްޔިތުންނަށް ލިބުނު ހެޔޮ ކަމެއް ނުވަތަ ފަސޭހައެއް ނެތް ކަމަށް. އަދި މިއީ ހުރިހާ ކަމެއްގައި ނާގާބިލް ސަރުކާރެއް ކަމަށް.
