ވޯލްޑް ކަޕްގެ ތެރޭގައި ސޯޝަލް މީޑިއާ މެދުވެރިކޮށް ކުރާ ފުރައްސާރައިގެ 89،000 މައްސަލައެއް، މިއީ 13 އިންސައްތަ އިތުރުވުމެއް!
ފީފާގެ ސޯޝަލް މީޑިއާ ޕްރޮޓެކްސަން ސާވިސް އިން ހަ މިލިއަނަށް ވުރެ ގިނަ ޕޯސްޓު ތަކާއި، ކޮމެޓުތައް ސްކޭން ކުރުމަށް ފަހު މިކަން ހޯދާފައިވާއިރު، މިއީ 2022 ވަނަ އަހަރު ކުރި ޕޯސްޓުތަކާ ބަލާއިރު 33 އިންސައްތަ އިތުރުވުމެއް. އޭގެ ތެރެއިން 11 އިންސައްތަ އަކީ ނަސްލީ ގޮތުން ދިމާ ކުރުމުގެ މެސެޖުތައް ކަމަށް ފީފާ އިން ބުނެފައިވޭ.
ވޯލްޑް ކަޕްގެ މެޗެއް ފެށުމުގެ ކުރިން ދަނޑު މަތީގައި ފީފާގެ ލޯގޯ ފެންނަ ބެނާއެއް ބާއްވާފައި. | ރޮއިޓާސް
ފީފާ ވޯލްޑް ކަޕްގެ ގުރޫޕު ސްޓޭޖުގެ މެޗުތައް ނިމި، ދެ ވަނަ ބުރު ކުރިއަށްދާއިރު ސޯޝަލް މީޑިއާ މެދުވެރިކޮށް ކުރާ ފުރައްސާރައިގެ މެސެޖުތައް 89،000 އަށް އަރާފައިވާ ކަމަށް ފީފާ އިން ބުނެފި އެވެ.
ފީފާ އިން ބުނެފައި ވަނީ، މިއީ 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕާ އަޅާ ބަލާއިރު، 13 އިންސައްތަ އިތުރު އަދަދެއް ކަމަށެވެ.
ފީފާގެ ސޯޝަލް މީޑިއާ ޕްރޮޓެކްސަން ސާވިސް އިން ހަ މިލިއަނަށް ވުރެ ގިނަ ޕޯސްޓު ތަކާއި، ކޮމެޓުތައް ސްކޭން ކުރުމަށް ފަހު މިކަން ހޯދާފައިވާއިރު، މިއީ 2022 ވަނަ އަހަރު ކުރި ޕޯސްޓުތަކާ ބަލާއިރު 33 އިންސައްތަ އިތުރުވުމެކެވެ. އޭގެ ތެރެއިން 11 އިންސައްތަ އަކީ ނަސްލީ ގޮތުން ދިމާ ކުރުމުގެ މެސެޖުތައް ކަމަށް ފީފާ އިން ބުނެފައިވެ އެވެ.
ނަސްލީ ގޮތުން ކޮށްފައިވާ ފުރައްސާރަ އަށް ބަލާއިރު، ފީފާ އިން ބުނެފައި ވަނީ މިއީ ޤަތަރުގެ ވޯލްޑް ކަޕަށް ވުރެ ތިން އިންސައްތަ އިތުރުވުމެއް ކަމަށެވެ. އެއާ އެކު ފީފާ އިން ބުނެފައި ވަނީ، ސޯޝަލް މީޑިއާގެ އެކި އެކި ޕްލެޓްފޯމް ތަކުގައި އެންމެ ގޯސް އަދި އެންމެ ނުރައްކާތެރި ގޮތުގައި ފުރައްސާރަ ކުރަމުން ގެންދާ ކަމަށެވެ.
ފީފާ އިން ނެރެފައިވާ ބަޔާނެއްގައި ބުނެފައި ވަނީ، މުބާރާތުގައި ބައިވެރިވާ ހުރިހާ ޓީމު ތަަކަށާއި، ކުޅުންތެރިންނާއި، ކޯޗުން އަދި މެޗު އޮފިޝަލުންނަށް ޚާއްސަ ޚިދުމަތެއް ޤާއިމު ކޮށްފައި ވާނެ ކަމަށެވެ. އެގޮތުން އެ ޚިދުމަތުގެ ފަރާތުން މުބާރާތުގައި ބައިވެރިވާ ފަރާތްތަކާއި، އެ ފަރާތް ތަކުގެ ސޯޝަލް މީޑިއާގައި ހިމެނޭ ފޮލޯވަރުން ރައްކާތެރި ކުރުމުގެ ނިޒާމެއް ޤާއިމު ކޮށްފައިވާ ކަމަށް ވެސް ބުނެފައިވެ އެވެ.
މި ޚިދުމަތުގައި އެންމެ ފަހުގެ ޒަމާނީ ވަސީލަތްތަކާއި، އިންސާނީ މޮޑަރޭޝަން އެއްކޮށް ބޭނުން ކުރުމަށް ފަހު، ނަސްލީ ގޮތުން އަންނަ ހަމަލާތަކާއި، ތަފާތު ކުރުމުގެ މެސެޖުތައް އަދި ބިރު ދެއްކުމުގެ މެސެޖުތައް ބަލައި ފިލްޓާކޮށް އަދި ބްލޮކް ކުރެވޭނެ އެވެ.
މީގެ އިތުރުން ފީފާ އިން ބުނެފައި ވަނީ 225،000 ޕޯސްޓު އިންސާނީ ރިވިއު އަށް ފޮނުވާފައިވާ ކަމަށެވެ. އަދި އޭގެ ތެރެއިން މޮޑަރޭޓަރުން ހަމަލާ ދޭ ގޮތަށް 89،000 ޕޯސްޓު ކަށަވަރު ކޮށްފައިވާ ކަމަށާއި، އެކަމަށް ފިޔަވަޅު އެޅުމުގެ މަސައްކަތް ކުރަމުން އަންނަ ކަމަށް ވެސް ބުނެފައިވެ އެވެ. އަދި މިހާތަނަށް 1000 އެކައުންޓު ތަހުގީގަށް ފޮނުވާފައިވާ ކަމަށް ވެސް ފީފާ އިން ބުނެފައިވެ އެވެ.
ފީފާ އިން ބުނެފައި ވަނީ 2022 ވަނަ އަހަރު ޤަތަރުގައި ބޭއްވި މުބާރާތުގައި 23 ޓީމު ބައިވެރިވި ނަމަވެސް، މި ފަހަރުގެ މުބާރާތުގެ 48 ޓީމު ބައިވެރިވާއިރު، މުބާރާތާ ގުޅިގެން ކުރާ ޕޯސްޓުތައް ވެސް އިންތިހާ އަށް އިތުރުވެފައިވާ ކަމަށެވެ.
