އިންގްލެންޑު އަތުން ބަލިވެ ކެޓި މެޗަށް ފަހު، ކޮންކޯގެ ކޯޗަށް ލިބުނީ ބައްޕަގެ މަރުގެ ޚަބަރު!

މިހާރު ކުރިއަށްދާ ފީފާ ވޯލްޑް ކަޕްގައި އިންގްލެންޑު އަތުން ބަލިވެ ކޮންގޯ މުބާރާތުން ކެޓި މެޗަށް ފަހު، އޭނާގެ ބައްޕަ މަރުވެފައިވާ ކަމުގެ ޚަބަރު ކޮންގޯގެ ކޯޗު ސެބަސްޓިއަން ޑެސަބްރޭ އަށް ލިބުމާ އެކު ނޫސްވެރިންގެ ބައްދަލުވުން ދޫކޮށްލައިފި އެވެ.

ބުދަ ދުވަހުގެ ރޭ ކުޅުނު މެޗުގައި އިންގްލެންޑުން ވަނީ 2-1 އިން ކޮންގޯ ބަލިކޮށްފައި އެވެ. ނަމަވެސް، ކޮންގޯ އިން އެ މެޗުގައި ތަފާތު ހިތްވަރެއް ދެއްކި އެވެ. މެޗުގެ ފުރަތަމަ ހަތް މިނެޓުގެ ތެރޭގައި ކޮންގޯ އިން ލީޑު ނެގިިއިރު، އެ ޓީމުން އިތުރު ލަނޑު ޖަހަން ވެސް ފުރުސަތު ހޯދި އެވެ. ނަމަވެސް، 15 މިނެޓުގެ ތެރޭގައި ހެރީ ކޭން ޖެހި ދެ ލަނޑާ އެކު ކޮންގޯ ވަނީ ކަޓައިފަ އެވެ.

އެ މެޗަށް ފަހު ކުރިއަށް ދިޔަ ނޫސްވެރިންގެ ބައްދަލުވުމުގައި ކޮންގޯގެ ކޯޗު ޑެސަބްރޭ ވަނީ ބައިވެރިވެފައި އެވެ. އަދި ވަކި ހިސާބަކުން ޕްރެސްގައި ހިމެނޭ އެހެން މީހަކު ވަނީ، ޑެސަބްރޭގެ ބައްޕަ މަރުވެފައިވާ ކަމުގެ ވާހަކަ އިއުލާން ކޮށްފައި އެވެ. އަދި އެއާ އެކު ނޫސްވެރިންގެ ބައްދަލުވުން މެދު ކަނޑާލުމަށް ވެސް ވަނީ އެދިފައި އެވެ. 

އެ ޚަބަރު ލިބުމާ އެކު، އެ ތަނުގައި ތިބި ނޫސްވެރިންނާ މުޚާތަބުކޮށް "ޝުކުރިއްޔާ" ބުނުމަށް ފަހު ޑެސަބްރޭ ވަނީ ނޫސްވެރިންގެ ބައްދަލުވުން ދޫކޮށް ގޮސްފައި އެވެ. ޑެސަބްރޭގެ ބައްޕަ މަރުވި ކަމުގެ ޚަބަރާ އެކު، ކޮންގޯގެ ސަޕޯޓަރުން އަންނަނީ އޭނާގެ އާއިލާ އަަށް ތައުޒިޔާ ފޮނުވަމުންނެވެ. 

އުމުރުން 49 އަހަރުގެ ޑެސަބްރޭ އަކީ ފްރާންސް އަށް ނިސްބަތްވާ މީހެކެވެ. ބައްޕަ މަރުވި ޚަބަރާ އެކު، ޑެސަބްރޭ ވަނީ ވަގުތުން އެނބުރި ޤައުމަށް ގޮސްފައި އެވެ. ކޮންގޯގެ ކޯޗަކަށް އޭނާ ހަމަޖައްސާފައި ވަނީ 2022 ވަނަ އަހަރު އެވެ. މިއީ ކޮންގޯ އިން އަލަށް ވޯލްޑް ކަޕްގައި ވާދަ ކުރި ފަހަރު ކަމަށްވާއިރު، އެ ޓީމުން ވަނީ ހައިރާން ކުރުވަނިވި ނަތީޖާ ތަކެއް ނެރެފައި އެވެ.