ހިތްދަތި ގޮތަކަށް ކްރޮއޭޝިއާ ކަޓުވާލައި ޕޯޗުގަލް ގަދަ 16 އަށް، ވާދަކުރަން ޖެހެނީ ސްޕެއިންއާ
3 ޖުލައި 2026 | ހުކުރު 06:11މެޗުގައި ކްރޮއޭޝިއާ އިން ލަނޑު ޖަހައި ކުރި ހޯދާފައި ވަނިކޮށް، ޕޯޗުގަލް އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފައި.
މެޗުގައި ލަނޑު ޖެހުމަށް ފަހު ޕޯޗުގަލްގެ ކެޕްޓަން ރޮނާލްޑޯ އުފާ ފާޅު ކުރަނީ. | ރޮއިޓާސް
ފީފާވަރލްޑް ކަޕްގައި ކްރޮއޭޝިއާއާ ދެކޮޅަށް ކުޅުނު މެޗުން ފަހަތުން އަރައި މޮޅުވެ، ޕޯޗުގަލް އިން މުބާރާތުގެ ގަދަ 16 އިން ޖާގަ ހޯދައިފި އެވެ.
ހުކުރު ދުވަހުގެ ފަތިހު ކުޅުނު މެޗު ޕޯޗުގަލް އިން ކާމިޔާބު ކޮށްފައި ވަނީ 2-1 އިންނެވެ. މެޗުގައި ކްރޮއޭޝިއާ އިން ލަނޑު ޖަހައި ކުރި ހޯދާފައި ވަނިކޮށް، ޕޯޗުގަލް އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފައި އެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ލަނޑު ޖަހަން ވެސް ފުރުސަތު ތަކެއް ލިބުނެވެ. ފުރަތަަމަ ހާފާ ޚިލާފަށް، ދެ ވަނަ ހާފު ފަށައިގެން އަށް ވަނަ މިނެޓުގައި ކްރޮއޭޝިއާ އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ އިވާން ޕެރިސިޗް އެވެ.
އޭގެ ފަހުން މެޗުގެ 68 ވަނަ މިނެޓުގައި ޕޯޗުގަލް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ރެފްރީ ދިން ޕެނަލްޓީ އެކެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގޮންޒާލޯ ރާމޯސް ވަނީ ޕޯޗުގަލްގެ ދެ ވަނަ ލަނޑު ޖަހައި ލީޑު ނަގައިފަ އެވެ.
ޕޯޗުގަލް އިން ލީޑު ނެގި ނަމަވެސް، ކްރޮއޭޝިއާގެ ޖޮސްކޯ ގްވާޑިއޯލް ވަނީ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދީފައި އެވެ. ނަމަވެސް، ފަހުން ރެފްރީ ވަނީ އޮފްސައިޑުގައި ހުރި ކަމަށް ނިންމައި، އެ ލަނޑު ބަލައި ނުގަންނަން ނިންމައިފަ އެވެ. އެއާ އެކު، ޕޯޗުގަލް ވަނީ މެޗުން މޮޅުވެފައި އެވެ.
މެޗުން މޮޅުވެ ޕޯޗުގަލް އިން މުބާރާތުގެ ގަދަ 16 އިން ޖާާގަ ހޯދިއިރު، ގަދަ 16 ގައި ޕޯޗުގަލް ނިކުންނާނީ ސްޕެއިންއާ ދެކޮޅަށެވެ.
