އޮސްޓްރިއާ ބަލިކޮށް، ތާރީޚީ މޮޅާ އެކު ސްޕެއިން ގަދަ 16 އަށް
އެގޮތުން މިއީ 2010 ވަނަ އަހަރުގެ ވަރލްޑް ކަޕް ކާމިޔާބު ކުރި ފަހުން، މުބާރާތުގެ ނޮކްއައުޓް ބުރުގެ މެޗަކުން ސްޕެއިން މޮޅުވި ފުރަތަމަ ފަހަރު.
މެޗުގައި ލަނޑު ޖެހުމަށް ފަހު ސްޕެއިންގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވަރލްޑް ކަޕްގައި އޮސްޓްރިއާއާ ދެކޮޅަށް ކުޅުނު މެޗުން މޮޅުވެ، ސްޕެއިން އިން މުބާރާތުގެ ގަދަ 16 އިން ޖާގަ ހޯދައިފި އެވެ.
ބުރާސްފަތި ދުވަހުގެ ރޭ ދަންވަރު ކުޅުނު މެޗު ސްޕެއިން އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ސްޕެއިން އިން އެއް ލަނޑު ޖެހިިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި އެވެ.
މެޗު ފަށައިގެން ރަނގަޅަށް ކުޅެމުން ދިޔަ ސްޕެއިން އިން ވަނީ 36 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. އެ ލަނޑު ސްޕެއިން އަށް ޖަހައިދިނީ މިކޭލް އޮޔާޒަބާލް އެވެ. އެއީ މާކް ކުކުރޭލާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
އޭގެ ފަހުން މެޗުގެ 66 ވަނަ މިނެޓުގައި ސްޕެއިންގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ޕެޑްރޯ ޕޯރޯ އެވެ. މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ސްޕެއިންގެ ތިން ވަނަ ލަނޑު ޖެހީ އޮޔާޒަބާލް އެވެ. އެ ލަނޑު ޖަހަން ވެސް އޮޔާޒަބާލް އަށް ފުރުސަތު ތަނަވަސްކޮށްދިނީ ކުކުރޭލާ އެެވެ.
މޮޅާ އެކު ސްޕެއިން އިން މުބާރާތުގެ ގަދަ 16 އިން ޖާގަ ހޯދިއިރު، މިއީ ސްޕެއިން އަށް ތާރީޚީ މޮޅެކެވެ. އެގޮތުން މިއީ 2010 ވަނަ އަހަރުގެ ވޯލްޑް ކަޕް ކާމިޔާބު ކުރި ފަހުން، މުބާރާތުގެ ނޮކްއައުޓް ބުރުގެ މެޗަކުން ސްޕެއިން މޮޅުވި ފުރަތަމަ ފަހަރެވެ. 2014 ވަނަ އަހަރުގެ މުބާރާތުން ސްޕެއިން ކެޓީ ގުރޫޕު ސްޓޭކުންނެވެ.
އޭގެ ފަހުން 2018 ވަނަ އަހަރު ރަޝިޔާގައި އޮތް މުބާރާތް އަދި 2022 ވަނަ އަހަރު ޤަތަރުގައި އޮތް މުބާރާތުން ސްޕެއިން ކަޓާފައި ވަނީ ގަދަ 16 އިންނެވެ. ދެ އަހަރު ވެސް ސްޕެއިން ކަޓާފައި ވަނީ ޕެނަލްޓީގައި ނާކާމިޔާބު ވެގެންނެވެ.
