އިސްތިއުފާ ދެއްވާނެކަން އިއުލާން ކުރެއްވުމަށް ފަހު، ބޮޑު ވަޒީރު ސްޓާމާ ޕޮޕް ކޯން ބެއްސެވުމުގައި

އިނގިރޭސިވިލާތުގެ ބޮޑު ވަޒީރު ކިއާ ސްޓާމާ، މިލްޓަން ކީންސްގެ ސިނަމާ އަކަށް ޒިޔާރަތް ކުރައްވައި ސްކޫލް ކުދިންނަށް ޕޮޕް ކޯން ބެއްސެވުމުގައި ޙަރަކާތްތެރިވެ ވަޑައިގެންފި އެވެ.

މިދިޔަ ބުރާސްފަތި ދުވަހު އޯޑިއަން ސިނަމާގައި ބޭއްވި މި ހަރަކާތަކީ، އެ ގައުމުގައި އަލަށް ތައާރަފްކުރި "ގްރޭޓް ބްރިޓިޝް ސަމަރ ސޭވިންގްސް" ސްކީމް އިޝްތިހާރު ކުރުމަށް ބޭއްވި ހަރަކާތެކެވެ. މި ޒިޔާރަތުގައި ބޮޑު ވަޒީރު ވަނީ ސަމަރފީލްޑް ޕްރައިމަރީ ސްކޫލްގެ ދަރިވަރުންނާ ބައްދަލު ކުރައްވައި، އެ ކުދިންނަށް ޚިދުމަތް ދެއްވުމުގައި އަމަލީ ގޮތުން ބައިވެރިވެ ވަޑައިގެންފައި އެވެ.

މިދިޔަ ހޯމަ ދުވަހު ބޮޑު ވަޒީރު ކަމުގެ މަގާމުން އިސްތިއުފާ ދެއްވާނެކަން އިއުލާނު ކުރެއްވުމަށް ފަހު، ބޮޑު ވަޒީރު ކުރެއްވި މި ޒިޔާރަތަކީ އާންމުންގެ މެދުގައި ބޮޑު ސަމާލު ކަމެއް ލިބުނު ކަމެކެވެ. ބުރާސްފަތި ދުވަހުން ފެށިގެން އަމަލު ކުރަން ފެށި މި އައު ސްކީމުގެ ދަށުން، އާއިލާ ތަކަށް ހޫނު މޫސުމުގެ ޗުއްޓީގައި ކުރާ ޚަރަދުތައް ކުޑަ ކުރުމަށްޓަކައި ގިނަ ލުއި ތަކެއް ވަނީ ދީފައި އެވެ. މީގެ ތެރޭގައި ރެސްޓޯރަންޓު ތަކުން ކުޑަކުދިންނަށް ދޭ ކެއުން ތަކުގެ އަގު ހެޔޮ ކުރުމާއި، އާއިލީ ދަތުރު ތަކަށް ހާއްސަ ޑިސްކައުންޓުތައް ހިމެނެ އެވެ.

މި ސްކީމުގެ ދަށުން އިނގިރޭސިވިލާތް، ވޭލްސް، ސްކޮޓްލޭންޑް އަދި ނޮދަން އަޔަލޭންޑްގައި ހިމެނޭ މުނިފޫހި ފިލުވުމުގެ ހަރަކާތް ތަކުން ނަގާ ވެލިއު އެޑެޑް ޓެކްސް ނުވަތަ ވެޓް ވަނީ 20 އިންސައްތަ އިން ފަސް އިންސައްތަ އަށް ދަށްކޮށްފައި އެވެ. މީގެ ސަބަބުން އާއިލާ ތަކަށް ހަފުތާ ބަންދުތަކާއި، ޗުއްޓީ ދުވަސްވަރު ބޭރަށް ގޮސް އުފާވެރި ވަގުތުތައް ހޭދަ ކުރުމަށް މާލީ ގޮތުން ބޮޑު ލުޔެއް ލިބިގެންދާނެ އެވެ.

މިކަމާ ގުޅޭ ގޮތުން ބޮޑު ވަޒީރު ސްޓާމާ ވިދާޅުވީ، ދިރިއުޅުމުގެ ޚަރަދުތައް ބޮޑުވުމަކީ ހަމައެކަނި ބިލުތައް ދެއްކުން ނޫން ކަމަށާއި، އެއީ އާއިލާ އާއެކު ހޭދަކުރާ މުހިންމު ވަގުތު ތަކަށް ކުރާ އަސަރެއް ކަމަށެވެ. ގިނަ ބެލެނިވެރިންނަށް ގޭބިސީގެ ބަޖެޓަށް އޮންނަ ފިއްތުން ތަކުގެ ސަބަބުން ސިނަމާ އަށް ދިއުމާއި، އާއިލީ ކެއުން ތަކަށް ދިއުން ފަދަ ކަންކަމަށް ހުރަސް އެޅިފައިވާ ކަމަށާއި، މި ހޫނު މޫސުމުގައި ވެޓް ކުޑަކުރަން ނިންމީ އެ ސަބަބަށްޓަކައި ކަމަށް ބޮޑު ވަޒީރު ވިދާޅުވި އެވެ.

މި ސްކީމުގެ ސަބަބުން އާއިލާ ތަކަށް ފައިދާވުމުގެ އިތުރުން، ވިޔަފާރި ތަކަށް ލިބޭ އާމްދަނީ އިތުރުވެ، އިގްތިސާދަށް ވެސް ކުރިއެރުން ލިބޭނެ އެވެ. މިހާރު ވެސް ޤައުމުގެ ބޮޑެތި ވިޔަފާރިތަކާއި ކުދި ވިޔަފާރި ތަކުން ވަނީ މި ސްކީމުގައި ބައިވެރިވެފައި އެވެ. މީގެ ތެރޭގައި މަޝްހޫރު ސިނަމާ ތަކެއް ކަމަށްވާ ވިއު، އެވްރީމަން އަދި ޕިކްޗަރހައުސްގެ އިތުރުން ބަޓްލިންސް، ވެދަރސްޕޫންސް އަދި ޝެޕަރޑް ނީމް ފަދަ ތަންތަން ހިމެނެ އެވެ.

މި ލުއި ތަކުގެ ދަށުން ރެސްޓޯރަންޓު ތަކުގެ ކުޑަކުދިންގެ މެނޫތަކާއި، ސިނަމާ، ތިއޭޓަރު، ކޮންސަރޓް އަދި މިއުޒިއަމް ފަދަ ތަންތަނުގެ ޓިކެޓު އަގުތައް ވަނީ ބޮޑު ތަނުން ހެޔޮކޮށްފައި އެވެ. މީގެ އިތުރުން، އޯގަސްޓު މަހުގެ އެއްކޮޅުން އަނެއްކޮޅަށް، އިނގިރޭސިވިލާތުގެ ކުޑަކުދިންނަށް ބަހުގައި ހިލޭ ދަތުރު ކުރެވޭނެ އިންތިޒާމު ވެސް ސަރުކާރުން ވަނީ ހަމަޖައްސާފައި އެވެ. މި ކެމްޕޭނަށް ބްރިޓިޝް ޗެމްބަރސް އޮފް ކޮމާސް އާއި ފެޑަރޭޝަން އޮފް ސްމޯލް ބިޒްނަސަސް ފަދަ މުހިންމު އިދާރާ ތަކުން ވަނީ ތާއީދު ކޮށްފައި އެވެ.