އިނގިރޭސިވިލާތުގެ ކޯޓުތަކުގައި ޖަމާވެފައި ހުރި މައްސަލަތައް ނިންމަން 300 އަހަރު ނަގާނެ

އިނގިރޭސިވިލާތުގެ ކޯޓުތަކުގައި ނުނިމި ހުރި މައްސަލަތައް ނިންމުމަށް 300 އަހަރު ނަގައިފާނެ ކަމަށް ބެލެވޭ ކަމަށް އެ ގައުމުގެ ކޯޓުތަކާ ބެހޭ ވަޒީރު ސާރާ ސެކްމަން ވިދާޅުވެއްޖެ އެވެ. އިނގިރޭސި ސަރުކާރުން މިހާރު މަސައްކަތް ކުރަމުންދަނީ މި މައްސަލަތައް އަވަސްކުރުމަށްޓަކައި، ޖޫރީން ބައިވެރިވެގެން ކުރިއަށްގެންދާ ޝަރީއަތްތައް އުވާލުމަށެވެ.

ޖަސްޓިސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި، އިނގިރޭސިވިލާތުގެ ކްރައުން ކޯޓުތަކުގައި ނުނިމި 80,061 މައްސަލަ އެބައޮތެވެ. އަދި މެޖިސްޓްރޭޓް ކޯޓުތަކުގައި 370,722 މައްސަލަ ނުނިމި އެބައޮތް އިރު، މިއީ މިދިޔަ އަހަރާ އަޅާބަލާއިރު ކްރައުން ކޯޓުތަކުގައި 5 އިންސައްތަ އަދި މެޖިސްޓްރޭޓް ކޯޓުތަކުގައި 11 އިންސައްތައިގެ އިތުރުވުމެކެވެ. މީގެ ތެރެއިން ކްރައުން ކޯޓުގެ 6,000 އެއްހާ މައްސަލަ ދެ އަހަރަށްވުރެ ގިނަ ދުވަސްވެފައިވާއިރު، ރޭޕްގެ 2,000 މައްސަލައެއް ވަނީ އަހަރަކަށްވުރެ ގިނަ ދުވަހު މަޑުޖެހިފަ އެވެ.

ކޯޓުތަކުގައި މައްސަލަތައް މިހާ ބޮޑަށް އިތުރުވެގެން ދިޔައީ ކޮވިޑް-19 އާ ގުޅިގެން އެޅި ފިޔަވަޅުތަކުގެ ސަބަބުން ކޯޓުތަކާއި ސަރުކާރުގެ އިދާރާތައް ބަންދުކުރުމާ ގުޅިގެންނެވެ. މީގެ ސަބަބުން 2020 ވަނަ އަހަރުން ފެށިގެން ކްރައުން ކޯޓުގައި ނުނިމި ހުރި މައްސަލަތަކުގެ އަދަދު ވަނީ ދެގުނަ އިތުރުވެފަ އެވެ.

ހުކުރު ދުވަހު ސްކައި ނިއުސްއަށް ދެއްވި އިންޓަވިއުއެއްގައި ސެކްމަން ވިދާޅުވީ، ވެރިކަންކުރާ ލޭބަރ ޕާޓީން މި މައްސަލަތައް ހައްލުކުރުމަށް މަސައްކަތް ފަށާފައިވާ ކަމަށެވެ. ނަމަވެސް މިހާރު މައްސަލަތައް ނިންމަމުންދާ ދުވެލީގައި، ޕެންޑެމިކްގެ ކުރިން މައްސަލަތައް ހުރި މިންވަރަށް އަދަދުތައް ތިރިކުރުމަށް ގާތްގަނޑަކަށް 300 އަހަރު ނަގާނެ ކަމަށް އޭނާ ވިދާޅުވި އެވެ.

އިނގިރޭސިވިލާތުގެ ބޮޑުވަޒީރު ކިއަރ ސްޓާމަރ ވަނީ އިންޓަނެޓް މެދުވެރިކޮށް ހިޖުރަވެރިންނާ ދެކޮޅަށް ޝުއޫރު ފާޅުކުރި އެތައް ސަތޭކަ ބަޔަކަށް ދައުވާކުރުމަށް ބާރުއަޅުއްވައި، ކޯޓުތަކުގެ ބުރަބޮޑުކަން އިތުރުކުރައްވާފަ އެވެ. މީގެ އިތުރުން "ޕަލެސްޓައިން އެކްޝަން" ޖަމާއަތަކީ މަނާ ޖަމާއަތެއްގެ ގޮތުގައި ކަނޑައެޅުމާ ގުޅިގެން 3,300 އަށްވުރެ ގިނަ މީހުން ހައްޔަރުކޮށް ދައުވާ އުފުލާފައިވެ އެވެ.

މީގެ އިތުރުން، ބަސްމަގުގެ ސަބަބުން ކުށްވެރިވާ މީހުންނަށް ޖަލުން ޖާގަ ހޯދައިދިނުމަށްޓަކައި، ނުރައްކާތެރި ކުށްވެރިން ޖަލުން ދޫކޮށްލުމަށް ސްޓާމަރ ވަނީ ނިންމަވާފަ އެވެ. އެގޮތުން 2024 ވަނަ އަހަރުގެ ކުރީކޮޅު 1,000 އަށްވުރެ ގިނަ ކުށްވެރިން ދޫކޮށްލާފައިވާއިރު، މިއަންނަ ސެޕްޓެމްބަރު މަހު އިތުރު 7,000 މީހުން ދޫކޮށްލުމަށް ވަނީ ހަމަޖެހިފަ އެވެ. މީގެ ތެރޭގައި މީހުން މެރުމާއި ރޭޕްކުރުން ފަދަ ބޮޑެތި ކުށްތައް ކޮށްފައިވާ މީހުން ހިމެނޭނެ ކަމަށް ބުނެ ކޮންޒަވޭޓިވް ޕާޓީން ވަނީ ކަންބޮޑުވުން ފާޅުކޮށްފަ އެވެ.

ސްޓާމަރގެ ސަރުކާރުން ބުނާ ގޮތުގައި، ކޯޓުތަކުގެ މައްސަލަތައް އަވަސްކުރެވޭނީ އިންވެސްޓްމަންޓް އިތުރުކޮށްގެންނާއި، މައްސަލަތައް އަވަހަށް ނިންމޭ މެޖިސްޓްރޭޓް ކޯޓުތަކަށް ގިނަ މައްސަލަތައް ފޮނުވައިގެންނެވެ.

ނަމަވެސް، ބޮޑުވަޒީރު މި ދަނޑިވަޅުގެ ބޭނުން ހިއްޕަވައިގެން ޔޫކޭގެ އަދުލު އިންސާފުގެ ނިޒާމަށް ބޮޑެތި ބަދަލުތަކެއް ގެންނަން ވަނީ ފައްޓަވާފަ އެވެ. އެގޮތުން މިއަހަރު ހުށަހެޅި ބިލެއްގައިވާ ގޮތުން، މީހުން މެރުމާއި ރޭޕްކުރުން ފަދަ އެންމެ ނުރައްކާތެރި ކުށްތައް ފިޔަވައި އެހެން މައްސަލަތަކުގައި ޖޫރީން ބައިވެރިވެގެން ކުރިއަށްގެންދާ ޝަރީއަތްތައް އުވާލުމަށް ވަނީ ހިމަނާފަ އެވެ. މި ބިލަށް ގާނޫނީ ވަކީލުންނާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ދަނީ ފާޑުކިޔަމުންނެވެ. ބާ ކައުންސިލުން މި ބަދަލަކީ އެކަށީގެންވާ ހެކި ނެތް ބަދަލެއްގެ ގޮތުގައި ސިފަކޮށްފައިވާއިރު، ސޮސައިޓީ އޮފް އޭޝިއަން ލޯޔާސްއިން ބުނެފައިވަނީ ޖޫރީންނަކީ ދައުލަތުން ބާރުގެ ބޭނުން ނަހަމަ ގޮތުގައި ހިފުން ހުއްޓުވުމަށް އޮތް މުހިންމު ނިޒާމެއް ކަމަށެވެ.