ޕާކިސްތާނުގައި މަގުމަތީގައި ދިން ދެ ބޮމުގެ ހަމަލާއެއްގައި މަދުވެގެން ހަތް މީހުން މަރުވެއްޖެ
ޕާކިސްތާނުގެ ބަންނޫ ޑިސްޓްރިކްޓްގައި ދިން ދެ ބޮމުގެ ހަމަލާގެ ޒިންމާ އެއްވެސް ޖަމާއަތަކުން އުފުލާފައި ނުވި ނަމަވެސް، މިއީ ހަނގުރާމަވެރި ޓީޓީޕީން ދިން ހަމަލާތަކެއް ކަމަށް ބެލެވޭ. މިފަދަ ހަމަލާތައް އިތުރުވަމުންދާތީ ޕާކިސްތާނުން އަފްޣާނިސްތާނަށް ތުހުމަތުތަކެއް ކުރަމުންދާއިރު، މީގެ ސަބަބުން ދެ ގައުމުގެ ގުޅުން ގޯސްވެ އަސްކަރީ ކުރިމަތިލުންތަކަކަށް ވަނީ މަގުފަހިވެފައިވޭ. ނަމަވެސް އަފްޣާން ސަރުކާރުން ވަނީ އެ ގައުމުގެ ބިން ހަނގުރާމަވެރިން ބޭނުންކުރާ ކަމަށް ބުނާ ވާހަކަތައް ތަކުރާރުކޮށް ދޮގުކޮށްފައި.
ޕާކިސްތާނުގެ އަސްކަރީ މަރުކަޒުތައް ހުންނަ ރާވަލްޕިންޑީގެ ކާރޫބާރޫ ބޮޑު ބަސް ޓާމިނަލެއްގެ ކައިރީގައި، 2020 ވަނަ އަހަރުގެ ޑިސެމްބަރު މަހުގެ 4 ވީ ހުކުރު ދުވަހު މަގުމަތީގައި ހަރުކޮށްފައިވާ ބޮމެއް ގޮއްވާލުމާ ގުޅިގެން، އެ ސަރަހައްދުގައި ޕާކިސްތާނުގެ ތަހުގީގީ އިދާރާތަކުން ހަރަކާތްތެރިވަމުންދަނީ. މި ބޮމުގެ ހަމަލާގައި ބައެއް މީހުން މަރުވެ، އިތުރު ބަޔަކު ޒަޚަމްވެފައިވާ ކަމަށް އެ ގައުމުގެ ފުލުހުން ވަނީ ބުނެފައި. | އޭޕީ
ޕާކިސްތާނުގެ ހުޅަނގު އުތުރުގެ ޚައިބަރު ޕަޚްތުންޚުވާ ޕްރޮވިންސްގައި މަގުމަތީގައި ދިން ދެ ބޮމުގެ ހަމަލާއެއްގައި މަދުވެގެން ހަތް މީހުން މަރުވެފައިވާ ކަމަށް އެ ގައުމުގެ ފުލުހުން ހޮނިހިރު ދުވަހު ބުނެފިއެވެ.
ބަންނޫ ޑިސްޓްރިކްޓްގެ ފުލުހުންގެ އޮފިސަރެއް ކަމަށްވާ ޔާސިރު އަފްރީދީ ވިދާޅުވީ، އާންމުން ގޮވައިގެން ދަތުރުކުރި ޕިކަޕަކަށް އަމާޒުކޮށް ފުރަތަމަ ހަމަލާ ދީފައިވަނީ ރިމޯޓް ކޮންޓްރޯލް އައިއީޑީއެއް ބޭނުންކޮށްގެން ކަމަށެވެ. އަދި އެ ހަމަލާގައި އަނިޔާވި މީހުން ކާރެއްގައި ހޮސްޕިޓަލަށް ގެންދަނިކޮށް، ދެވަނަ އައިއީޑީއެއް ގޮއްވާލާފައިވާ ކަމަށާއި، މި ހާދިސާގައި އިތުރު ތިން މީހަކު ޒަޚަމްވެފައިވާ ކަމަށްވެސް އޭނާ ވިދާޅުވިއެވެ.
މި ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައި ނުވި ނަމަވެސް، އެ ސަރަހައްދަކީ ހަނގުރާމަވެރި ޖަމާއަތެއް ކަމަށްވާ ތަހްރީކޭ ތާލިބާން ޕާކިސްތާން (ޓީޓީޕީ) ވަރަށް ބޮޑަށް ހަރަކާތްތެރިވާ ސަރަހައްދެކެވެ.
ޕާކިސްތާނުން ތުހުމަތުކުރާ ގޮތުގައި އެ ގައުމުގައި ހަމަލާތައް އިތުރުވަމުންދަނީ އަވަށްޓެރި އަފްޣާނިސްތާނުގެ ސަބަބުންނެވެ.
ނަމަވެސް، އަފްޣާނިސްތާނުގެ ބިން ހަނގުރާމަވެރިންގެ ހާއްޔެއްގެ ގޮތުގައި ބޭނުންކުރަމުންދާ ކަމަށް ބުނެ ޕާކިސްތާނުން ކުރާ ތުހުމަތުތައް ކާބުލްގައި އޮތް ތާލިބާން ސަރުކާރުން ތަކުރާރުކޮށް ދޮގުކުރެއެވެ.
މި ދެ ގައުމުގެ ދެމެދުގައި އޮތް ގުޅުން ގޯސްވެ، ފާއިތުވި މަސްތަކުގައި ވަނީ ނުރައްކާތެރި ހަތިޔާރު އެޅި ކުރިމަތިލުންތަކަކަށް ބަދަލުވެފައެވެ. މީގެ ތެރޭގައި ޕާކިސްތާނުން އަފްޣާނިސްތާނުގެ ބައެއް ސިޓީތަކަށް ދިން ވައިގެ ހަމަލާތައްވެސް ހިމެނެއެވެ.
