އީރާނުގެ މަޖިލީސް ރައީސް: ޝަހީދުންގެ ހައްގުގައި މަސައްކަތްކުރާނަން

އެމެރިކާ އާއި އިސްރާއީލުން ދިން ނުރައްކާތެރި ހަމަލާތަކާ ގުޅިގެން އުފެދިފައިވާ ހަމަނުޖެހުންތައް ނިމުމަކަށް ގެނައުމަށްޓަކައި، ޕާކިސްތާނު މެދުވެރިވެގެން ސޮއިކޮށްފައިވާ އެއްބަސްވުމުގެ ކަންކަން ކުރިއަށް ގެންދިއުމަށް ސްވިޒަލޭންޑަށް ކުރައްވާ ދަތުރުފުޅުގައި، އެ ހަމަލާތަކުގައި ޝަހީދުވި މީހުންގެ ހައްގުގައި މަސައްކަތްކުރުމުގައި ދެމިހުންނަވާނެ ކަމުގެ ޔަގީންކަން އީރާނުގެ މަޖިލީހުގެ ރައީސް ދެއްވައިފިއެވެ.

އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް މިހެން ވިދާޅުވީ، އިރާން އާއި އެމެރިކާއާ ދެމެދު ދާދިފަހުން ސޮއިކުރި އެއްބަސްވުމުގައިވާ ކަންކަން ތަންފީޒުކުރުމާ ގުޅޭގޮތުން މަޝްވަރާކުރެއްވުމަށް ހޮނިހިރު ދުވަހު ޒިއުރިކަށް ވަޑައިގެން، އެކްސްގައި ކުރެއްވި ޕޯސްޓެއްގައެވެ. މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނުގެ ދެކުނުގެ ސިޓީއެއް ކަމަށްވާ މިނާބަށް ދިން ހަމަލާތަކުގައި ސްކޫލް ކުދިން ހިމެނޭހެން 168 މީހުން ޝަހީދުވި ހާދިސާއަށް އިޝާރާތްކުރައްވައި ގާލީބާފް ވިދާޅުވީ، މިނާބުގެ މައުސޫމް ކުދިންނާއި އީރާނުގެ އެންމެހައި ޝަހީދުންނަކީ އެމަނިކުފާނުގެ އަމަލުތަކާއި އުޅުއްވުން އަބަދުވެސް ބައްލަވަން ތިއްބެވި ފަރާތްތަކެއް ކަމުގައި ދެކެވަޑައިގަންނަވާ ކަމަށެވެ.

އެމަނިކުފާނު އިތުރަށް ވިދާޅުވީ، އެ ޝަހީދުން އަޅުގަނޑުމެންގެ އަމަލުތައް ބައްލަވާ ކަމަށާއި، އަދި އަޅުގަނޑުމެންގެ ފަރާތުން އުންމީދުތަކެއް ކުރާ ކަމަށެވެ. އަދި މާތްﷲގެ އިރާދަފުޅާއެކު، އެ މައުސޫމް ޝަހީދުންނާއި އީރާނުގެ ރައްޔިތުންގެ ކުރިމަތީގައި ލަދުގަންނަންޖެހޭ ފަދަ ކަމެއް ނުކުރައްވާނެ ކަމަށްވެސް ވިދާޅުވިއެވެ.

މި ޕޯސްޓާއެކު ގާލީބާފް ވަނީ، އެ ޝަހީދުންގެ ހަނދާނުގައި "މިނާބް 168" ގެ ނަމުން ނަންދީފައިވާ ވަފުދު ގޮވައިގެން ދިޔަ ބޯޓުން ފައިބައިވަޑައިގަންނަވާ ފޮޓޯއެއްވެސް ހިއްސާކުރައްވާފައެވެ.

ޚާރިޖީ ވަޒީރު އައްބާސް އަރާގްޗީ ވެސް ހިމެނިވަޑައިގަންނަވާ މި ވަފުދުން، ދެ ފަރާތުން އެއްބަސްވެފައިވާ ކަންކަން ތަންފީޒުކުރާނެ ގޮތްތަކާ ބެހޭގޮތުން މަޝްވަރާކުރާނެ ކަމަށް ބެލެވެއެވެ.

މި ދަތުރުފުޅު ފެއްޓެވުމުގެ ކުރިން ޚާރިޖީ ވުޒާރާގެ ތަރުޖަމާނު އިސްމާއީލް ބަޣާއީ ވިދާޅުވީ، މިއީ ފަހުގެ އެއްބަސްވުމަކަށް އައުމަށް ބާއްވާ އާ މަޝްވަރާތަކެއްގެ ފެށުން ކަމަށް ބަލައިގެން ނުވާނެ ކަމަށެވެ. ބަޣާއީ ވިދާޅުވީ މި ދަތުރުފުޅުގެ މައިގަނޑު ބޭނުމަކީ އަނެއް ފަރާތުން (އެމެރިކާއިން) ފުރިހަމަކުރަންޖެހޭ ކަންކަން ފުރިހަމަކުރުމަށް ބާރުއެޅުން ކަމަށާއި، ކޮންމެ އެއްބަސްވުމެއްގެ ވެސް އަސްލު ފެންނާނީ އެކަމެއް ތަންފީޒުކުރާ މަރުހަލާގައި ކަމަށެވެ.

ބަޣާއީ އިތުރަށް ވިދާޅުވީ، އެއްބަސްވުމުގެ މުހިންމު ބައެއް މާއްދާތައް ތަންފީޒުކުރަން ނުފަށަނީސް، ފަހުގެ އެއްބަސްވުމަކަށް ދިއުމުގެ މަޝްވަރާތައް ފެށޭނެ މާހައުލެއް ނެތް ކަމަށެވެ. އަދި ހިތާމައަކީ މިވަގުތު އެފަދަ މަންޒަރެއް ފެންނަން ނެތުން ކަމަށްވެސް އޭނާ ވިދާޅުވިއެވެ.

ލުބުނާނަށް އިސްރާއީލުން ދެމުންދާ އަސްކަރީ ހަމަލާތަކާ މެދު ކަންބޮޑުވުން ފާޅުކުރައްވަމުން ތަރުޖަމާނު ވިދާޅުވީ، އެ އަމަލުތަކުގެ ސަބަބުން އެއްބަސްވުމުގެ ފުރަތަމަ މާއްދާ ކަމަށްވާ، ލުބުނާނު ހިމެނޭހެން ހުރިހާ ފަރާތްތަކަކުން ހަމަލާދިނުން ހުއްޓާލުމުގެ މާއްދާއަށް ހުރަސްއެޅޭ ކަމަށެވެ.

މީގެ އިތުރުން، އެމެރިކާ އާއި އިސްރާއީލުން އެއްބަސްވުމާ ޚިލާފުވަމުންދާ ކަމަށް ބުނެ، ހޮނިހިރު ދުވަހު އީރާނުގެ މަރުކަޒީ އަސްކަރީ ކޮމާންޑުން ވަނީ ހޯރްމޫޒް ކަނޑުއޮޅިން ދަތުރުފަތުރުކުރުން ރަސްމީކޮށް ބަންދުކޮށްފައެވެ.