އެމެރިކާާ އާއި އީރާން އިން އެއްބަސްވުމަކަށް އަތުވެއްޖެ، ހުކުރު ދުވަހު ރަސްމީކޮށް ސޮއި ކުރަނީ

އެމެރިކާ އާއި އީރާންއާ ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އާދެވިފައިވާ ކަމަށް ޕާކިސްތާން އިން ހާމަ ކޮށްފި އެވެ. 

ޕާކިސްތާންގެ ބޮޑު ވަޒީރު ޝެހްބާޒް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، ސުލްހައިގެ އެއްބަސްވުމަކަށް ވާސިލުވެފައިވާ ކަމަށާއި، ރަސްމީކޮށް އެއްބަސްވުމުގައި ސޮއި ކުރުމުގެ ރަސްމިއްޔާތު ޖޫން މަހުގެ 19 ވާ ހުކުރު ދުވަހު ސްވިޒަލެންޑުގައި އޮންނާނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ވެސް ވިދާޅުފައި ވަނީ، އީރާން އާއެކު އެއްބަސްވުމެއް ޤާއިމު ކުރުމަށް ކުރަމުން އައި މަސައްކަތް ނިމިފައިވާ ކަމަށެވެ. އެއާ އެކު ޓްރަމްޕް ވިދާޅުވީ، ހޮރްމޫޒް ކަނޑު އޮޅި ފުރިހަމަ އަށް ހުޅުވާލާނެ ކަމަށާއި، އެ ކަނޑު އޮޅީގައި އެމެރިކާ އިން އަޅާފައިވާ ދަތި ކުރުމުގެ ފިޔަވަޅުތައް ވެސް އުވާލާނެ ކަމަށެވެ. ޓްރަމްޕް ވިދާޅުވީ ހޮރްމޫޒް ކަނޑު އޮޅިން ބޯޓު ތަކަށް ފުރިހަމަ އަށް ދަތުރު ކުރެވޭނެ ކަމަށާއި، ތެލުގެ ދަތުރުތައް ވެސް އެ ކަނޑު އޮޅިން ކުރެވޭނެ ކަމަށެވެ. 

އީރާން އިން ވެސް ވަނީ، އެމެރިކާ އާއެކު އެއްބަސްވުމަކަށް އައިސް، ހަނގުރާމަ ނިމިފައިވާ ކަމަށް ހާމަ ކޮށްފައި އެވެ. އީރާންގެ ފޮރިން މިނިސްޓްރީގެ ނައިބު ވިދާޅުވީ، ލުބުނާން ހިމެނޭހެން ހުރިހާ ހަނގުރާމަ ތަކެއް ދާއިމީ ގޮތެއްގައި ވަގުތުން ހުއްޓުމަކަށް ގެނައުމަށް އިއުލާާން ކޮށްފައިވާ ކަމަށެވެ. މީގެ ކުރިން އީރާން އިން ވަނީ، ލުބުނާންގެ ވެރި ރަށް ބެއިރޫތަށް އަމާޒުކޮށް އިޒްރޭލް އިން ދީފައިވާ ހަމަލާ ތަކުގެ ބަދަލު ނުހިފައި ދޫކޮށް ނުލާނެ ކަމަށް ބުނެފައި އެވެ. 

ހަނގުރާމަ ހުއްޓާލައި، ސުލްޙަ ޤާއިމު ކުރުމަށް އެމެރިކާ އާއި އީރާން އިން އެއްބަސްވުމާ އެކު، ޕާކިސްތާންގެ ބޮޑު ވަޒީރު ޝެހްބާޒް ވިދާޅުވީ ހަނގުރާމަ އަށް ސިޔާސީ ޙައްލެއް ހޯދުމުން އެމެރިކާ އާއި އީރާން އަށް ޝުކުރު އަދާ ކުރައްވާ ކަމަށެވެ. މީގެ އިތުރުން މި މަރުޙަލާގައި މެދުވެރިންގެ ގޮތުގައި މަސައްކަތް ކުރި ޤަތަރާއި، ސައުދީ އަރަބިއްޔާ އަދި ތުރުކީ އަށް ވެސް ޕާކިސްތާންގެ ބޮޑު ވަޒީރު ވަނީ ޝުކުރ އަދާ ކުރައްވައިފަ އެވެ.