އެމެރިކާ އާއި އީރާންގެ އެއްބަސްވުމާ ގުޅޭ ގޮތުން ޕާކިސްތާންގެ ބޮޑު ވަޒީރު ކުރެއްވި ފުރަތަމަ ޕޯސްޓު ޑިލީޓު ކުރައްވައިފި

އެމެރިކާ އާއި އީރާންގެ ރައީސުން ތާރީޚީ އެއްބަސްވުމެއްގައި ސޮއި ކުރެއްވި ކަމަށް ވިދާޅުވެ، ޕާކިސްތާންގެ ބޮޑު ވަޒީރު ޝެހްބާޒް ޝަރީފް އެންމެ ފުރަތަމަ ކުރެއްވި ޕޯސްޓު ޑިލީޓު ކުރައްވާފައިވާ ކަމަށް ފާހަގަ ކުރެވިއްޖެ އެވެ. 

ޕާކިސްތާންގެ ބޮޑު ވަޒީރު ޝެހްބާޒް ޝަރީފް ފަހުން ކުރެއްވި ޕޯސްޓުގައި ރަސްމީ ގޮތުން ސޮއި ކުރުމުގެ ރަސްމިއްޔާތު ބާއްވަން ހަމަޖެހިފައިވާ ކަމަށް ވިދާޅުވެފައިވާ ބަސްތައް ވަނީ ފޮހެލައްވައިފަ އެވެ. ފަހުން ބޮޑު ވަޒީރު ޝެހްބާޒް ކުރެއްވި ޕޯސްޓުގައި ސޮއި ކުރުމުގެ އެފަދަ ރަސްމިއްޔާތެއް ބާއްވާނެ ކަމަށް ބުނެފައި ނުވެ އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އެއްބަސްވުމުގައި ޑިޖިޓަޕް ގޮތުން ސޮއި ކުރެވިފައިވާތީ ސްވިޒަލޭންޑުގައި ސޮއި ކުރުމުގެ ރަސްމިއްޔާތެއް ބާއްވަން ނުޖެހޭ ކަމަށެވެ. އެހެން ނަމަވެސް ބަޣާއީ ވިދާޅުވީ ހުކުރު ދުވަހު ސްވިޒަލޭންޑުގެ ޖެނީވާގައި ދެ ގައުމުގެ ވާހަކަ ދެއްކުމުގެ ޓީމުތައް އެއްވެ ފޮލޯއަޕް ވާހަކަތައް ކުރިއަށް ގެންދާނެ ކަމަށެވެ.

އެމެރިކާ އާއި އީރާންއާ ދެމެދު ވެވުނު މި ތާރީހީ އެއްބަސްވުމަކީ ދެ ގައުމުގެ ގުޅުން ތަކަށް މުހިންމު ބަދަލެއް އަންނަ އެއްބަސްވުމެއްގެ ގޮތުގައި ބައިނަލްއަގުވާމީ މީޑިއާ ތަކުން ސިފަ ކުރަމުން ގެންދެ އެވެ. މި އެއްބަސްވުމުގައި އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން މުހިންމު ކަންކަން ހިމެނޭ ކަމަށް ރިޕޯޓުތައް ބުނެ އެވެ.

ޕާކިސްތާންގެ ބޮޑު ވަޒީރުގެ ފުރަތަމަ ޕޯސްޓު ޑިލީޓު ކުރެއްވުމުން، މި އެއްބަސްވުމާ ގުޅޭ ގޮތުން ބައެއް ސުވާލުތައް އުފެދިފައިވެ އެވެ. ބައެއް މީޑިއާ ތަކުން ބުނާ ގޮތުގައި މި އެއްބަސްވުމުގެ ތަފްސީލުތައް އާންމު ކުރުމުގައި ބައެއް ޤައުމު ތަކުން ވަރަށް ސަމާލުކަމާ އެކު ކަންތައް ކުރަމުން އަންނަ ކަމަށެވެ.

އީރާން އާއި އެމެރިކާގެ ގުޅުން ވަރަށް ގިނަ އަހަރު ތަކެއް ވަންދެން އޮތީ ދަށު ދަރަޖައެއްގައި އެވެ. މި އެއްބަސްވުމަކީ ދެ ގައުމުގެ ގުޅުން ރަނގަޅު ކުރުމަށް ނެގި މުހިންމު ފިޔަވަޅެއްގެ ގޮތުގައި ބައިނަލްއަގުވާމީ ސިޔާސީ ތަޖުރިބާކާރުން އަންނަނީ ފާހަގަ ކުރަމުންނެވެ.