އެއާ އިންޑިއާގެ ފްލައިޓެއް ޕާކިސްތާނުގެ ވައިގެ ސަރަހައްދަށް ވަދެވުނު މައްސަލައެއްގައި ޕައިލެޓް ވަޒީފާއިން ސަސްޕެންޑްކޮށްފި

އިންޑިއާގެ ވެރިރަށް ދިއްލީން ފުރައިގެން އެ ގައުމުގެ އުތުރުގެ ސިޓީއެއް ކަމަށްވާ އަމްރިތުސާރަށް ދަތުރުކުރި އެއާ އިންޑިއާގެ ފްލައިޓެއް، ޕާކިސްތާނުގެ ވައިގެ ސަރަހައްދަށް ވަދެވުނު މައްސަލައެއްގައި އެ ފްލައިޓުގެ ޕައިލެޓް ވަޒީފާއިން ސަސްޕެންޑްކޮށްފި އެވެ.

މިދިޔަ ޖޫން މަހުގެ 22 ވަނަ ދުވަހުގެ ރޭ އެއާބަސް އޭ321 މަރުކާގެ ބޯޓު އަމްރިތުސާރަށް ޖައްސަން ތައްޔާރުވަމުން ދަނިކޮށް، ރަންވޭގައި އޮތް ބޯޓެއްގައި ދޫންޏެއް ޖެހިފައިވާ ކަމުގެ ރިޕޯޓަކާ ގުޅިގެން ރަންވޭ ބަލައި ފާސްކުރުމަށްޓަކައި މަޑުކުރުމަށް ޕައިލެޓަށް އެންގި ކަމަށް އިންޑިއާގެ ސިވިލް އެވިއޭޝަން ރެގިއުލޭޓަރު، ޑީޖީސީއޭ އިން ބުނެފައިވެ އެވެ.

މިގޮތަށް މަޑުކޮށްގެން އުޅުމަށްފަހު، އެ ރޭގެ 10:08 ހާއިރު ބޯޓު ތިރިކުރަން އުޅުމުގެ ތެރޭގައި ނޭނގި ނަމަވެސް ކުޑަ ވަގުތުކޮޅަކަށް ޕާކިސްތާނުގެ ވައިގެ ސަރަހައްދަށް ވަނީ ވަދެވިފަ އެވެ. ޑީޖީސީއޭ އިން ބުނި ގޮތުގައި ރޭޑާ ވެކްޓަރިންގެ އެހީގައި ބޯޓު ތިރިކުރަން ފެށި ވަގުތު ޕާކިސްތާނުގެ ވައިގެ ސަރަހައްދަށް ވަދެވުނު ނަމަވެސް، އެކަން ކުރިއަށް ދިޔައީ ޕާކިސްތާނުގެ އެއާ ޓްރެފިކް ކޮންޓްރޯލް (އޭޓީސީ) އާ ގުޅިގެންނެވެ. އަދި އެންމެ ފަހުން އެ ބޯޓު ވަނީ އަނބުރާ ދިއްލީއަށް ގޮސް ރައްކާތެރިކަމާއެކު ޖައްސާފަ އެވެ.

މި ހާދިސާ ރިޕޯޓްކޮށްފައި ނުވާތީ، ފްލައިޓް ކުރޫންނާއި އަމްރިތުސާގެ އެއާ ޓްރެފިކް ކޮންޓްރޯލަރާ މެދު ޑިސިޕްލިނަރީ ފިޔަވަޅު އަޅާފައިވާ ކަމަށް ވެސް ޑީޖީސީއޭ އިން ބުނެފައިވެ އެވެ. ފާހަގަކޮށްލެވޭ ގޮތުގައި، ދެ ގައުމުގެ ދެމެދުގައި އުފެދުނު ސިޔާސީ ނުތަނަވަސްކަމާ ގުޅިގެން ހަތަރު ދުވަހުގެ ކުރިމަތިލުމަކަށް ދިޔަ ހާދިސާއަށް ފަހު، މިދިޔަ އަހަރުގެ އޭޕްރިލް މަހުން ފެށިގެން ޕާކިސްތާނުން ވަނީ އިންޑިއާގެ އެއާލައިންތަކަށް އެ ގައުމުގެ ވައިގެ ސަރަހައްދު ބަންދުކޮށްފަ އެވެ.

އެއާ އިންޑިއާ އިން ވެސް ވަނީ އެހެން ގައުމެއްގެ ވައިގެ ސަރަހައްދަށް ވަދެވުނުކަން ކަށަވަރުކޮށްދީފަ އެވެ. އެ އެއާލައިނުން ނެރުނު ބަޔާނެއްގައި ބުނެފައިވަނީ، ޖޫން 22 ވަނަ ދުވަހު ދިއްލީން އަމްރިތުސާރަށް ދަތުރުކުރި އޭއައި479 ފްލައިޓް، އަމްރިތުސާ އެއާޕޯޓަށް ޖައްސަން އުޅުމުގެ ތެރޭގައި "ގޯ-އަރައުންޑް" އެއް ހެދުމުގެ ތެރޭގައި ޕާކިސްތާނުގެ ވައިގެ ސަރަހައްދަށް ކުޑަކޮށް ވަދެވިފައިވާ ކަމަށެވެ. އަދި މި ހާދިސާ ކަމާބެހޭ ފަރާތްތަކަށް ރިޕޯޓްކޮށް، އެތެރޭގެ ތަހުގީގެއް ހިންގަމުންދާ ކަމަށް ވެސް އެ އެއާލައިނުން ބުނެފައިވެ އެވެ.

ހިންދުސްތާން ޓައިމްސް އިން ރިޕޯޓްކޮށްފައިވާ ގޮތުގައި، ބޯޓު އަނބުރާލި ވަގުތު ޕާކިސްތާނުގެ ވައިގެ ސަރަހައްދުގެ ތެރެއަށް ގާތްގަނޑަކަށް ތިން މޭލަށް ވަދެފައިވެ އެވެ. އެ ނޫހުން އޮފިޝަލަކާ ހަވާލާދީ ބުނެފައިވަނީ، މި ހާދިސާ ހިނގުމުގެ ކުރިން ހަވީރު 4:29 ގައި އަމްރިތުސާރަށް ޖެއްސި 6އީ 5028 ފްލައިޓުގައި ދޫންޏެއް ޖެހުނު ކަމަށް ރިޕޯޓްކުރުމާ ގުޅިގެން، އެ ސަރަހައްދަށް އައި ފަސް ފްލައިޓަކަށް މަޑުކުރުމަށް އެންގި ކަމަށެވެ.

އަދި ދިއްލީން އައި އެއާ އިންޑިއާގެ މި ފްލައިޓަކީ ޖައްސަން ކިއޫގައި އޮތް ހަތަރުވަނަ ފްލައިޓް ކަމަށް ވެސް އޭނާ އިތުރަށް ބުންޏެވެ.

އެއާޕޯޓް އޮފިޝަލުން ބުނި ގޮތުގައި، މި ހާދިސާ ހިނގާފައިވަނީ އަމްރިތުސާ އެއާޕޯޓުގެ އެޕްރޯޗް ސަވައިލަންސް ޚިދުމަތް ދޭ ގަޑިތަކުން ބޭރުގަ އެވެ. ބޯޓު ދެވަނަ ފަހަރަށް ޖައްސަން މަސައްކަތް ކުރި ނަމަވެސް، ތެޔޮ މަދުވަމުންދާ ކަމަށް ކުރޫން ރިޕޯޓްކުރުމާ ގުޅިގެން ބޯޓު ވަނީ އަނބުރާ ދިއްލީއަށް މިސްރާބު ޖަހާފަ އެވެ.

އެ ބޯޓު ދިއްލީއަށް ރައްކާތެރިކަމާއެކު ޖައްސާފައިވަނީ އެ ރޭގެ 11:27 ގައެވެ.

އޮފިޝަލުން ވިދާޅުވި ގޮތުގައި، އޭގެ އިރުކޮޅެއް ފަހުން އެ ބޯޓު އަލުން ފުރުވާލައި، އަމްރިތުސާރަށް ކުރަންޖެހޭ ދަތުރު ވަނީ ފުރިހަމަކޮށްފަ އެވެ.