ވެނެޒުއެލާގެ ބިންހެލުމުގައި މަރުވި މީހުންގެ އަދަދު 920 އަށް، ގެއްލުނު މީހުންގެ އަދަދު 50،000 ގައި

ވެނެޒުއޭލާ އަށް ބުދަ ދުވަހުގެ ރޭ ކުރިމަތިވި ބާރު ގަދަ ދެ ބިންހެލުމުގައި މަރުވި މީހުންގެ އަދަދު 920 އަށް އަރައި، އެތައް ހާސް ބަޔަކު ގެއްލިފައިވާ ކަމަށް އެ ގައުމުގެ އޮފިޝަލުން ހާމަ ކޮށްފި އެވެ.

މި ހާދިސާގައި ގެއްލުނު މީހުން ހޯދުމުގެ މަސައްކަތް ބައިނަލްއަގުވާމީ އެހީތެރިކަމާ އެކު ކުރިއަށްދާއިރު، ސަރުކާރުގެ އިޖާބަ ލަސްވުމުގެ ސަބަބުން އާންމުންގެ މެދުގައި ވަނީ ބޮޑު ނުތަނަވަސް ކަމެއް އުފެދިފައި އެވެ.

އެކުވެރި ދައުލަތްތައް (އދ) ގެ އެހީއާ ބެހޭ އިސްވެރިޔާ ޓޮމް ފްލެޗަރ އޭއެފްޕީ އަށް މައުލޫމާތު ދެއްވަމުން ވިދާޅުވީ، އެއް މިނެޓުގެ ތެރޭގައި އައި ބާރުގަދަ ދެ ބިންހެލުމަށް ފަހު 50،000 އަށް ވުރެ ގިނަ މީހުން ވީނުވީއެއް ނޭނގި ގެއްލިފައިވާ ކަމަށެވެ. މި ބިންހެލުން ތަކުގެ ސަބަބުން ވެނެޒުއޭލާގެ އުތުރުގެ ސަރަހައްދު ތަކުގެ ގިނަ އިމާރާތް ތަކެއް ވަނީ ބިމާ ހަމަވެފައި އެވެ.

މި ކާރިސާގައި އެންމެ ބޮޑު ގެއްލުމެއް ލިބިފައިވަނީ ވެރިރަށް ކަރަކަސްއާ ކައިރީގައި އޮންނަ އައްސޭރިފަށުގެ ސަރަހައްދެއް ކަމަށްވާ ލާ ގުއައިރާ އަށެވެ. ރިކްޓަރ މިންގަނޑުން 7.2 އަދި 7.5 ގެ ބާރު މިނުގައި އައި މި ބިންހެލުން ތަކުގައި އެ ސަރަހައްދުގެ ގިނަ އަދަދެއްގެ އިމާރާތްތައް ވަނީ ފުނޑު ފުނޑު ވެފައި އެވެ. ހާލަތު އިތުރަށް ގޯސްވަމުން ދާތީ، ހުކުރު ދުވަހުގެ ރޭގަނޑު 8:00 އިން ފެށިގެން ކާރިސާ ހިނގި ސަރަހައްދު ތަކަށް ވަނުން މަނާކޮށްފައިވާ ކަމަށް ދާޚިލީ ވަޒީރު ދިއޮސްޑާޑޯ ކަބެއްލޯ ވަނީ އިއުލާން ކުރައްވާފައި އެވެ.

ލާ ގުއައިރާގައި ހުރި ހަތަރު ބުރީގެ ބޮޑު އެޕާޓްމަންޓް ކޮމްޕްލެކްސްއެއްގައި ޗިލީގެ ރެސްކިއު ޓީމަކުން މިހާރު ދަނީ ހަރަކާތްތެރި ވަމުންނެވެ. އެ ޓީމުގެ ލީޑަރު ނަޑިއޯމާ ޕޮލާންކޯ ވިދާޅުވީ، އިމާރާތްތައް މުޅިން ބިމާ ހަމަވެފައި ވާތީ މީހަކު ދިރިހުއްޓާ ފެނުމުގެ ފުރުސަތު ވަރަށް ކުޑަ ކަމަށާއި، މިހާރު ބޮޑަށް އިސްކަންދެނީ މަރުވެފައިވާ މީހުންގެ ހަށިތައް ނެގުމަށް ކަމަށެވެ.

ސަރުކާރުގެ އެހީތެރިކަން އެކަށީގެންވާ ގޮތެއްގައި ނުލިބޭތީ، ގިނަ ބަޔަކު ދަނީ އަމިއްލަ އަތުން ކޮނެގެންނާއި އާދައިގެ ވަސީލަތްތައް ބޭނުން ކޮށްގެން ކުނި ތަކުގެ ދަށުގައި ތިބި މީހުން ސަލާމަތް ކުރަން މަސައްކަތް ކުރަމުންނެވެ. މިގޮތުން 40 އަހަރުގެ މަރްޖޯސްލީ ސަލަޒާރު ކިޔާ މީހަކު ބުނީ، އޭނާގެ 16 އަހަރުގެ ދަރިފުޅު މަރުވެފައިވާ ކަމަށާއި، މިހާރު ހޯދަމުން ދަނީ ފަސް މަހުގެ ތުއްތު ދަރިފުޅާއި އޭނާގެ ދެބެންގެ ދެދަރި މީހާ ކަމަށެވެ. އޭނާ ވަނީ ބަރު މެޝިނަރީތައް ބޭނުން ކޮށްގެން މީހުން ހޯދުމަށް ސަރުކާރުގެ އެހީތެރިކަމަށް އެދި އާދޭސްކޮށްފައި އެވެ.

މި ހާދިސާއާ ގުޅިގެން އާންމުންގެ ރުޅިވެރިކަން އިންތިހާ އަށް ބޮޑު ވެފައިވާއިރު، ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް ކަރަކަސްގެ އަވަށަކަށް ޒިޔާރަތް ކުރެއްވުމުން އާންމުން ވަނީ އޭނާއާ ދެކޮޅަށް އަޑުއުފުލާފައި އެވެ. ކުނި ތަކުގެ ދަށުގައި ތިބި މީހުންގެ އާއިލާ ތަކުން ބުނަމުން ދަނީ ސަރުކާރުން ރައްޔިތުންނަށްޓަކައި އެއްވެސް މަސައްކަތެއް ކުރަމުން ނުދާ ކަމަށެވެ.