ވެނެޒުއޭލާ ބިންހެލުމުގައި ތުއްތު ދަރިފުޅު ސަލާމަތް ކޮށްދިނުމުގެ ތެރޭގައި ޒުވާން މަންމަ މަރުވެއްޖެ

ވެނެޒުއޭލާއަށް އައި ބާރުގަދަ ބިންހެލުންތަކުގައި، އަމިއްލަ ދަރިފުޅުގެ ފުރާނަ ސަލާމަތްކޮށްދިނުމުގެ ތެރޭގައި ތުއްތު ކުއްޖާގެ މަންމަ މަރުވެއްޖެ ކަމަށް އޭނާގެ ފިރިމީހާ، ފުޓްބޯޅަ ކުޅުންތެރިޔާ ހެކްޓަރ ބެއްލޯ އާއި އެ ގައުމުގެ މީޑިއާތަކުން ރިޕޯޓްކޮށްފި އެވެ.

ފުޓްބޯޅަ ކުޅުންތެރިޔާ ހެކްޓަރ ބެއްލޯގެ އިންސްޓަގްރާމްގައި އޭނާ ބުނެފައިވަނީ، އޭނާގެ "ލޯބިވާ އަނބިމީހާ"، ވެނެޒުއޭލާ އަށް ފުލުފުލުގައި އައި ދެ ބިންހެލުމުގެ ތެރޭގައި އެމީހުންގެ ތުއްތު ދަރިފުޅުގެ ފުރާނަ ސަލާމަތްކޮށްދީފައިވާ ކަމަށެވެ.

ބެއްލޯ އޭނާގެ ޕޯސްޓުގައި ލިޔެފައިވަނީ، "ލޯބިވާ އަނބިމީހާ އެވެ. ތިބާ ދަރިފުޅުގެ ފުރާނަ ސަލާމަތްކޮށްދިން ގޮތުގެ ވާހަކަ އަހަރެން ދަރިފުޅަށް ކިޔައިދޭނަމެވެ. ދަރިފުޅަށްޓަކައި އަމިއްލަ ފުރާނަ ގުރުބާންކުރި ގޮތާއި، އެންމެ ފަހު ނޭވާއާ ހަމައަށްވެސް ދަރިފުޅު ދޫކޮށްނުލައި ތިބާ ދެއްކި ހިތްވަރުގަދަ ކަމުގެ ވާހަކަ ކިޔައިދޭނަމެވެ."

ވެނެޒުއޭލާގެ ވެރިރަށް ކަރާކަސް ކައިރިއަށް އައި ދެ ބިންހެލުމުގައި މިހާތަނަށް މަދުވެގެން 589 މީހުން މަރުވެ، 3،000 އެއްހާ މީހުން ޒަޚަމްވެފައިވާއިރު، އިމާރާތްތަކުގެ ބައިތަކުގެ ދަށުގައި ތިބި މީހުން ހޯދުމުގެ މަސައްކަތް ރެސްކިއު ޓީމުތަކުން ދަނީ މެދުނުކަނޑައި ކުރަމުންނެވެ.

ބެއްލޯ ކުރި ސިލްސިލާ ޕޯސްޓުތަކެއްގައި ބުނެފައިވަނީ، އޭނާގެ ދަރިފުޅު އެޑްމިޓްކޮށްފައި އޮތް ކަރާކަސްގެ ހޮސްޕިޓަލަށް އޭނާ މިހާރު ގޮސްފައިވާ ކަމަށެވެ.

ހުކުރު ދުވަހުގެ ރޭ ދަންވަރު އޭނާ ކުރި ޕޯސްޓެއްގައި ބުނެފައިވަނީ، "ދަރިފުޅާއި އޭނާގެ ބޮޑުދައިތަގެ ހާލު ރަނގަޅެވެ." 

އިންސްޓަގްރާމްގެ ވަކި ސްޓޯރީއެއްގައި ބެއްލޯ ލިޔެފައިވަނީ، "ދަރިފުޅުގެ ފުރާނަ ސަލާމަތްކުރަން އުޅުމުގެ ތެރޭގައި ތިބާގެ ފުރާނަ ގެއްލުނު ގޮތާއި، އެ ވަގުތު އެހީތެރިވާން އަހަރެން އެތަނުގައި ނެތް ސަބަބު ދަރިފުޅަށް ކިޔައިދޭނީ ކިހިނެއް ހެއްޔެވެ؟ އަހަރެން އެކަން ކިޔައިދޭނީ ކިހިނެއް ހެއްޔެވެ؟ އަހަރެންނަށް ކެތްތެރިކަން ދެއްވާށެވެ."

ވެނެޒުއޭލާގެ ފުޓްބޯޅަ ކުޅުންތެރިންގެ ޕްރެސް އެންޑް ޕަބްލިސިޓީ އޯގަނައިޒޭޝަނެއް ކަމަށްވާ 'ކުމަނާ ޑި ކެމްޕިއޯނެސް' އިން ވެސް ވަނީ އަންދްރެއާގެ މަރުގެ ޚަބަރު ހިއްސާކޮށްފަ އެވެ. އެ ޖަމިއްޔާއިން ބުނެފައިވަނީ، "ފުޓްބޯޅަ ކުޅުންތެރިޔާ ހެކްޓަރ ބެއްލޯ ގެ ބައިވެރިޔާ، ބިންހެލުމުގައި ވެއްޓުނު އިމާރާތުގެ ދަށުން މަރުވެފައި އޮއްވާ ފެނިފައިވާކަން ހިތާމައާއެކު ހާމަކުރަމެވެ."

އެމެރިކާގެ ސްޕެނިޝް ބަހުން ޚަބަރު ފަތުރާ 'ޔުނިވިޝަން' އިން ވެސް ވަނީ ބެއްލޯގެ އަންހެނުން މަރުވިކަން ކަށަވަރުކޮށްދީފަ އެވެ. ބުދަ ދުވަހު އައި މި ބިންހެލުމުގައި މަރުވި މީހުންގެ އަދަދު އިތުރުވަމުންދާއިރު، މަރުވި މީހުން ދެނެގަތުމުގެ މަސައްކަތް ދަނީ ކުރަމުންނެވެ. އަދިވެސް ގިނަ ބަޔަކު ވީނުވީއެއް ނޭނގި ވަނީ ގެއްލިފަ އެވެ.

ވެނެޒުއޭލާ ފުޓްބޯލް ފެޑެރޭޝަން (އެފް.ވީ.އެފް) އާއި ކްލަބްތަކުން ބުނާ ގޮތުގައި، މި ހާދިސާގައި ދެ ފުޓްބޯޅަ ކުޅުންތެރިއަކު ވެސް ވަނީ މަރުވެފަ އެވެ.

މީގެއިތުރުން، ކުރީގެ މިސް ވެނެޒުއޭލާ ގިސެލް ރޭއެސް އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، ލާ ގުއައިރާގައި އޭނާގެ މަންމަ ދިރިއުޅުނު އިމާރާތް ބިންހެލުމުގައި އެއްކޮށް ބިންމާ ހަމަވުމުގެ ސަބަބުން އޭނާގެ މަންމަ ވެސް މަރުވެފައިވާ ކަމަށެވެ.