ބޮސްނިއާ ބަލިކޮށް، އެމެރިކާ ވެސް ގަދަ 16 އަށް

ފީފާ ވަރލްޑް ކަޕްގައި ބޮސްނިއާއާ ދެކޮޅަށް ކުޅުނު މެޗުން މޮޅުވެ، އެމެރިކާ އިން މުބާރާތުގެ ގަދަ 16 އިން ޖާގަ ހޯދައިފި އެވެ.

ބުރާސްފަތި ދުވަހުގެ ހެނދުނު ކުޅުނު މެޗު އެމެރިކާ އިން ކާމިޔާބު ކޮށްފައި ވަނީ 2-0 އިންނެވެ. މެޗުގެ ފުރަތަމަ ހާފުގައި އެމެރިކާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗުގެ ފުރަތަމަ ހާފުގެ 45 ވަނަ މިނެޓުގައި އެމެރިކާ އަށް ލީޑު ނަގައިދިނީ ފްލޯރިއަން ބަލޮގަން އެވެ. ނަމަވެސް، ދެ ވަނަ ހާފުގެ 64 ވަނަ މިނެޓުގައި ބަލޮގަން އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އޭނާ އަށް ރަތް ކާޑު ދެއްކީ ވީޑިއޯ އެސިސްޓެންޓް ރެފްރީ (ވީއޭރާއު) އިން ވެސް ބެލުމަށް ފަހު އެވެ.

އެއް ކުޅުންތެރިޔަކު މަދުކޮށް ކުޅެން ޖެހުނު ނަމަވެސް، އެމެރިކާ އިން ވަނީ 82 ވަނަ މިނެޓުގައި ދެ ވަނަ ލަނޑެއް ޖަހައިފަ އެވެ. އެ ލަނޑު އެމެރިކާ އަށް ޖަހައިދިނީ މަލިކް ޓިލްމަން އެވެ. އޭގެ ކުރިން އެމެރިކާ އިން ޖެހި ލަނޑު ރެފްރީ ވަނީ ބަލައި ނުގަންނަން ނިންމައިފަ އެވެ.

މުބާރާތުގެ ގުރޫޕު ސްޓޭޖުގައި ކުޅުނު ފުރަތަމަ ދެ މެޗުން މޮޅުވި ނަމަވެސް، ފަހު މެޗުގެ ފަހު ވަގުތުގައި އެމެރިކާ ވަނީ ބަލިވެފައި އެވެ. ގަދަ 32 ގެ ބުރުގައި ބޮސްނިއާ ބަލިކޮށް އެމެރިކާ އިން ގަދަ 16 އަށް ދިޔައިރު، ގަދަ 16 ގައި އެމެރިކާ ނިކުންނާނީ ބެލްޖިއަމްއާ ދެކޮޅަށެވެ.