ފަހަތުން އަރައި ސެނެގާލް ކަޓުވާލައި، ބެލްޖިއަމް ގަދަ 16 އަށް
މެޗުގައި ސެނެގާލް އިން ދެ ލަނޑު ޖަހައިގެން ލީޑު ހޯދާފައި ވަނިކޮށް، ބެލްޖިއަމް އިން ނަތީޖާ ހަމަހަމަ ކުރީ ފަހަތުން އަރައި ދެ ލަނޑު ޖަހައިގެން.
މެޗުގައި ލަނޑު ޖެހުމަށް ފަހު ބެލްޖިއަމްގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގައި ސެނެގާލްއާ ދެކޮޅަށް ކުޅުނު މެޗުން، ފަހަތުން އަރައި މޮޅުވެ ބެލްޖިއަމް އިން މުބާރާތުގެ ގަދަ 16 އިން ޖާގަ ހޯދައިފި އެވެ.
ބުދަ ދުވަހުގެ ރޭ ދަންވަރު ކުޅުނު މެޗު ބެލްޖިއަމް އިން ކާމިޔާބު ކުރީ 3-2 އިންނެވެ. މެޗުގައި ސެނެގާލް އިން ދެ ލަނޑު ޖަހައިގެން ލީޑު ހޯދާފައި ވަނިކޮށް، ބެލްޖިއަމް އިން ނަތީޖާ ހަމަހަމަ ކުރީ ފަހަތުން އަރައި ދެ ލަނޑު ޖަހައިގެންނެވެ.
މެޗު ފަށައިގެން 26 ވަނަ މިނެޓުގައި ސެނެގާލް އަށް ލީޑު ނަގައިދިނީ ހަބީބް ޑިއާރާ އެވެ. އޭގެ ފަހުން ދެ ވަނަ ހާފު ފަށައިގެން ހަ ވަނަ މިނެޓުގައި ސެނެގާލްގެ ދެ ވަނަ ލަނޑު ޖެހީ އިސްމާއިލާ ސާރް އެވެ.
މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ރޮމެލޫ ލުކާކޫ ވަނީ ބެލްޖިއަމްގެ ފުރަތަމަ ލަނޑު ޖަހައިފަ އެވެ. އޭގެ ތިން މިނެޓު ފަހުން ޔޫރީ ޓިއެލަމަންސް ވަނީ ބެލްޖިއަމްގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްފައި އެވެ.
މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމާ އެކު، އިތުރު ވަގުތުގެ ދެ ހާފު ވަނީ ކުޅެފައި އެވެ. އިތުރު ވަގުތުގެ ދެ ވަނަ ހާފުގައި ލިބުނު ޕެނަލްޓީ ކާމިޔާބުކޮށް، މެޗުން ބެލްޖިއަމް މޮޅު ކޮށްދިނީ ވެސް ޓިއެލަމަންސް އެވެ.
މުބާރާތުގެ ގުރޫޕު ސްޓޭޖުގައި ބެލްޖިއަމް ކުޅުނު ފުރަތަމަ ދެ މެޗު އެއްވަރުވީއިރު، ފަހު މެޗުން ވަނީ މޮޅުވެފައި އެވެ.
