15 މިނެޓުގެ ތެރޭގައި ކޭން ޖެހި ދެ ލަނޑުން ކޮންގޯ ބަލިކޮށް، އިންގްލެންޑު ގަދަ 16 އަށް
މެޗުގައި ކޮންގޯ އިން ލަނޑު ޖަހައި ކުރި ހޯދާފައި ވަނިކޮށް، އިންގްލެންޑުން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފައި.
މެޗުގައި ލަނޑު ޖެހުމަށް ފަހު އިންގްލެންޑުގެ ކެޕްޓަން ހެރީ ކޭން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވަރލްޑް ކަޕްގައި ކޮންގޯއާ ދެކޮޅަށް ކުޅުނު މެޗުން، ފަހަތުން އަރައި މޮޅުވެ އިންގްލެންޑުން މުބާރާތުގެ ގަދަ 16 އިން ޖާގަ ހޯދައިފި އެވެ.ބުދަ ދުވަހުގެ ރޭ ކުޅުނު މެޗު އިންގްލެންޑުން ކާމިޔާބު ކުރީ 2-1 އިންނެވެ. މެޗުގައި ކޮންގޯ އިން ލަނޑު ޖަހައި ކުރި ހޯދާފައި ވަނިކޮށް، އިންގްލެންޑުން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފައި އެވެ.
މެޗު ފަށައިގެން ހަތް ވަނަ މިނެޓުގައި ކޮންގޯ އަށް ލަނޑު ޖަހައި ލީޑު ނެގި އެވެ. އެ ލަނޑު ކޮންގޯ އަށް ޖަހައިދިނީ ބްރިއަން ކިބާމްބޭ ސިޕެންގާ އެވެ.
ކޮންގޯ އިން ލީޑު ނެގި ފަހުން އިންގްލެންޑުން ވަނީ ނަތީޖާ ހަމަހަމަ ކުރުމަށް ވަރަށް ބޮަޑަށް މަސައްކަތް ކޮށްފައި އެވެ. ނަމަވެސް، އިންގްލެންޑުގެ ހަމަލާތައް ހުއްޓުވުމުގައި ކޮންގޯގެ ގޯލު ކީޕަރު ވަނީ ހުށިޔާރުކަން ދައްކައިފަ އެވެ.
އޭގެ އިތުރުން ކޮންގޯ އަށް ވަނީ ލީޑު ފުޅާ ކުރަން ވެސް ތަނަވަސް ފުރުސަތު ތަކެއް ލިބިފައި އެވެ. މެޗުގެ ދެ ވަނަ ހާފުގެ 75 ވަނަ މިނެޓުގައި އިންގްލެންޑުން ވަނީ ލަނޑު ޖަހައި ނަތީޖާ ހަމަހަމަ ކޮށްފައި އެވެ. އެ ލަނޑު އިންގްލެންޑަށް ޖަހައިދިނީ ކެޕްޓަން ހެރީ ކޭން އެވެ. އެއީ އެންތަނީ ގޯޑަން ތަނަވަސްކޮށްދިން ފުރުސަތެއްގައި އޭނޭ ޖެހި ލަނޑެކެވެ.
އެ ލަނޑާ އެކު އިންގްލެންޑުން އިތުރު ހިތްވަރެއް ހޯދިއިރު، މެޗުގެ 86 ވަނަ މިނެޓުގައި ކޭން ވަނީ ދެ ވަނަ ލަނޑެއް ޖަހައި އިންގްލެންޑަށް ލީޑު ނަގައިދީފައި އެވެ. އެއީ ވެސް ގޯޑަން ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ.
މޮޅާ އެކު އިންގްލެންޑުން މުބާރާތުގެ ގަދަ 16 އިން ޖާގަ ހޯދިއިރު، ގަދަ 16 ގައި ނިކުންނާނީ މުބާރާތް ބާއްވާ އެއް ޤައުމު ކަމަށްވާ މެކްސިކޯއާ ދެކޮޅަށެވެ. މެކްސިކޯ އިން ވަނީ މުބާރާތުގެ ގުރޫޕު ސްޓޭޖުގައި ކުޅުނު ތިން މެޗު އަދި ގަދަ 31 ގެ މެޗުން ވެސް މޮޅުވެފައި އެވެ.
