އެކުއެޑޯ ބަލިކޮށް، ފުރިހަމަ ރެކޯޑާ އެކު މެކްސިކޯ ގަަދަ 16 އަަށް
މެޗުން މޮޅުވެ މެކްސިކޯ އިން މުބާރާތުގެ ގަދަ 16 އިން ޖާގަ ހޯދިއިރު، އެ ޓީމުން ވަނީ ގުރޫޕު ސްޓޭޖުގައި ކުޅުނު ތިން މެޗުން ވެސް މޮޅުވެފައި. މުބާރާތުގެ ގަދަ 16 ގައި މެކްސިކޯ ބައްދަލު ކުރަން ޖެހޭނީ އިންގްލެންޑާއި ކޮންގޯ ބައްދަލު ކުރާ މެޗުން މޮޅުވާ ޓީމަކާ ދެކޮޅަށް.
މެޗުގައި ލަނޑު ޖެހުމަށް ފަހު މެކްސިކޯގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވާރލްޑް ކަޕްގައި އެކުއެޑޯއާ ދެކޮޅަށް ކުޅުނު މެޗުން މޮޅުވެ، މެކްސިކޯ އިން އެ ޓީމުގެ ފުރިހަމަ ރެކޯޑާ އެކު މުބާރާތުގެ ގަދަ 16 އިން ޖާގަ ހޯދައިފި އެވެ.
ބުދަ ދުވަހުގެ ހެނދުނު ކުޅުނު މެޗު މެކްސިކޯ އިން ކާމިޔާބު ކުރީ 2-0 އިންނެވެ. މެޗުގައި މެކްސިކޯ އިން އެ ޓީމުގެ ދެ ލަނޑު ވެސް ޖެހީ މެޗުގެ ފުރަތަމަ ހާފުގައި އެވެ. ވިއްސާރައިގެ ސަބަބުން މި މެޗު ފެށުން ލަސްކޮށްފައިވެ އެވެ.
މެޗު ފަށައިގެން 22 ވަނަ މިނެޓުގައި މެކްސިކޯ އިން ލަނޑު ޖަހައި ލީޑު ނެގި އެވެ. އެ ލަނޑު މެކްސިކޯ އަށް ޖަހައިދިނީ ހޫލިއަން ކުއިނޯންސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ރޮބާޓޯ އަލްވާޑޯ އެވެ. އޭގެ ފަހުން މެޗުގެ 31 ވަނަ މިނެޓުގައި މެކްސިކޯގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ރައުލް ހިމިނޭޒް އެވެ. އެއީ ކުއިނޯންސް ތަނަވަސްކޮށްދިން ފުރުސަތެއްގައި ހިމިނޭޒް ޖެހި ލަނޑެކެވެ.
މެޗުން މޮޅުވެ މެކްސިކޯ އިން މުބާރާތުގެ ގަދަ 16 އިން ޖާގަ ހޯދިއިރު، އެ ޓީމުން ވަނީ ގުރޫޕު ސްޓޭޖުގައި ކުޅުނު ތިން މެޗުން ވެސް މޮޅުވެފައި އެވެ. މުބާރާތުގެ ގަދަ 16 ގައި މެކްސިކޯ ބައްދަލު ކުރަން ޖެހޭނީ އިންގްލެންޑާއި ކޮންގޯ ބައްދަލު ކުރާ މެޗުން މޮޅުވާ ޓީމަކާ ދެކޮޅަށެވެ.
