އެމްބާޕޭގެ ދެ ލަނޑުން ސްވިޑެން ބަލިކޮށް، ފްރާންސް ގަދަ 16 އަށް
މޮޅާ އެކު ފްރާންސް އިން މުބާރާތުގެ ގަދަ 16 އިން ޖާގަ ހޯދިއިރު، ގަދަ 16 ގައި ފްރާންސް ނިކުންނާނީ ޕެރަގުއޭއާ ދެކޮޅަށް. ޕެރަގުއޭ އިން ވަނީ ޕެނަލްޓީގައި ވަރުގަދަ ޖަރުމަނު ކަޓުވާލައި، ގަދަ 16 އިން ޖާގަ ހޯދާފައި.
މެޗުގައި ލަނޑު ޖެހުމަށް ފަހު ފްރާންސްގެ ކެޕްޓަން ކީލިއަން އެމްބާޕޭ އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވާރލްޑް ކަޕްގައި ސްވިޑެންއާ ދެކޮޅަށް ކުޅުނު މެޗުން މޮޅުވެ، ފްރާންސް އިން މުބާރާތުގެ ގަދަ 16 އިން ޖާގަ ހޯދައިފި އެވެ.
އަންގާރަ ދުވަހުގެ ރޭ ދަންވަރު ކުޅުނު މެޗު ފްރާންސް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ފްރާންސް އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި އެވެ.
މެޗުގެ ފުރަތަމަ ހާފުގެ 45 ވަނަ މިނެޓުގައި ފްރާންސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ފްރާންސް އަށް ޖަހައިދިނީ ކެޕްޓަން ކީލިއަން އެމްބާޕޭ އެވެ. އެއީ އޮސްމާން ޑެމްބެލޭ ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ.
ފްރާންސް އިން ރަނގަޅަށް ކުޅުނު މެޗުގައި، ދެ ވަނަ ހާފު ފަށައިގެން އަށް ވަނަ މިނެޓުގައި އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ބްރާޑްލޭ ބާކޮލާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މައިކަލް އޮލައިސޭ އެވެ.
އޭގެ ފަހުން މެޗުގެ 74 ވަނަ މިނެޓުގައި އެމްބާޕޭ ވަނީ ފްރާންސްގެ ތިން ވަނަ ލަނޑު ޖަހައިފަ އެވެ. އެ ލަނޑު ޖަހަން އެމްބާޕޭ އަށް ވެސް ފުރުސަތު ތަނަވަސްކޮށްދިނީ އޮލައިސޭ އެވެ. އަނެއްކޮޅުން މިއީ މިފަހަރުގެ ވޯލްޑް ކަޕްގައި އެމްބާޕޭ ޖެހި ހަ ވަނަ ލަނޑެވެ.
މޮޅާ އެކު ފްރާންސް އިން މުބާރާތުގެ ގަދަ 16 އިން ޖާގަ ހޯދިއިރު، ގަދަ 16 ގައި ފްރާންސް ނިކުންނާނީ ޕެރަގުއޭއާ ދެކޮޅަށެވެ. ޕެރަގުއޭ އިން ވަނީ ޕެނަލްޓީގައި ވަރުގަދަ ޖަރުމަނު ކަޓުވާލައި، ގަދަ 16 އިން ޖާގަ ހޯދައިފަ އެވެ.
