ރައްޔިތުންނަށް މިލިބެނީ ހަމަ ކަރަންޓު ރަހަލާ މަސްދަޅުތަ؟

ދިވެހިރާއްޖޭގެ ސިޔާސީ އަދި އިޖުތިމާއީ މަސްރަހުގައި މިހާރު އެންމެ ބޮޑަށް ދެކެވޭ އެއް ވާހަކައަކީ ގަބޫލު ނުކުރެވޭ މިންވަރަށް ކަރަންޓާއި، ފެން ބިލުތައް ބޮޑުވާ މައްސަލަ އެވެ. ރައީސް ޑރ. މުހައްމަދު މުއިއްޒުގެ ސަރުކާރުން ރަމަޟާން މަހާ ދިމާކޮށް ރައްޔިތުންނަށް ދިން ލުއިތަކާއި، ހަދިޔާގެ ގޮތުގައި ބެހި މަސްދަޅު ކޭސްތަކަކީ ރައްޔިތުންނަށް ލިބުނު އުފަލަކަށްވުރެ ބޮޑަށް، ފަހުން އުފުލަންޖެހުނު ތަކުލީފެއްގެ ފެށުން ކަމަށް ގިނަ ބަޔަކު ގަބޫލުކުރެ އެވެ.

ރަމަޟާން މަހު ދިން ޑިސްކައުންޓަށްފަހު، ދެން ޖެހިފައި މަހު ބިލްތައް ހުރީ ކުރިން ދުވަހަކުވެސް ނާރާ މިންވަރަށް މަތީގަ އެވެ. އާންމުކޮށް 2000 ރުފިޔާ އަރާ ގޭބިސީތަކުގެ ބިލް 4000 ނުވަތަ 5000 އަށް އެރުމަކީ ގަބޫލުކުރެވޭނެ ކަމެއް ނޫނެވެ. މިމައްސަލައާ ގުޅިގެން އޭޕްރީލް މަހުގެ ތެރޭގައި ނ. ވެލިދޫ އާއި ރ. އަނގޮޅިތީމު ފަދަ ރަށްރަށުގައި ރައްޔިތުން ވަނީ ފެނަކަ އޮފީސް ދޮށަށް އެއްވެ، ''  ރައްޔިތުން ނޮޅާލައިފި ކަމަށް ބުނެ ކަމަށް ބުނެ އިހުތިޖާޖު ވެސް ކޮށްފައިވެ އެވެ.

މީގެ އިތުރުން މި މައްސަލައިގައި ރައްޔިތުންގެ ޝުއޫރުތައް ސޯޝަލް މީޑިއާއިން ވެސް ފެނިގެން ދިޔަ އެވެ. ގޭބިސީތަކުގެ ބިލްތަކުގެ ފޮޓޯ ހިއްސާކޮށް، ސަރުކާރުން ހިލޭ ދިން މަސްދަޅު ކޭހާއި، ބިލުތަކުން ދިން ޑިސްކައުންޓްގެ އަގު ބިލުން އަތުލަނީތޯ ސުވާލު އުފައްދާފައިވެ އެވެ. އަދި އެދުވަސްކޮޅު މިއަޑު ގަދަވި ނަމަވެސް ފަހުން މިއަޑާއި، ކަންބޮޑުވުންތަކުގެ އަޑު ވަނީ ކެނޑިގެން ގޮސްފަ އެވެ. 

ނަމަވެސް އަޟްހާ އީދާ ގުޅިގެން ކޮންމެ އަހަރަކު ވެސް ކުޅުދުއްފުށިން ނެރޭ ''މަށިމާލި ޕެރޭޑުން'' މިމައްސަލައާ ގުޅިގެން ރައްޔިތުންގެ މެދުގައި އޮތް ހިތްހަމަ ނުޖެހުމަށް ބަދަލެއް ނާންނަކަން މިވަނީ ހާމަވެފަ އެވެ. އެޕެރޭޑުން ދައްކާލި މާލިތަކާއި، އެކިއެކި ކެރެކްޓަރތަކުންގެ އިތުރުން އެކިކަހަލަ އެއްޗެހީގެ ތެރެއިން ގިނަ ބައެއް ސަމާލުކަން ލިބިގެން ދިޔައީ '' ކަރަންޓް ރަހަލާ މަސްދަޅަށް'' ށެވެ. 

އެ ޕެރޭޑުގައި ދައްކާލި " ކަރަންޓު ރަހަލާ މަސްދަޅު " އަކީ މިއަދު ރައްޔިތުންގެ ހާލަތު ބަޔާންކޮށްދޭ ވަރުގަދަ މިސާލެކެވެ. ސަރުކާރުން ހިލޭ އެއްޗެއް ދީފިނަމަ، އެއީ ދަންތުރައެއް ކަމާއި، އޭގެ ބަދަލު އެހެން ގޮތަކުން ރައްޔިތުންގެ އަތުން ނަގާނެ ކަމުގެ ބިރު މިއަދު ވަނީ އުފެދިފަ އެވެ.

ކަންމިހެން އޮތްއިރު، ސްޓެލްކޯ އާއި ފެނަކައިން އަދި އެމްޑަބްލިޔުއެސްސީން ވެސް މި ތުހުމަތުތައް ދޮގުކުރެ އެވެ. އަދި ބޭނުން ނުކުރާ ޚިދުމަތަކަށް ބިލު ނުކުރާ ކަމަށް އެކުންފުނިތަކުން ބުނެ އެވެ. ނަމަވެސް، ރައްޔިތުންގެ ޝަކުވާ ބޮޑުވުމުން 2024 އޯގަސްޓް މަހު ސްޓެލްކޯގެ އޭރުގެ މެނޭޖިން ޑިރެކްޓަރު ހުސައިން ފަހުމީ ވަނީ މާލޭގެ %21 ގޭބިސީގެ ބިލްތައް އާދަޔާ ހިލާފަށް ބޮޑުކަން ގަބޫލުކުރައްވާފަ އެވެ. އަދި ހަކަތައިގެ އޮޑިޓެއް ހަދަމުންދާ ކަމަށް ވިދާޅުވި ނަމަވެސް، މިއަދާ ހަމައަށް އެ އޮޑިޓުގެ އެއްވެސް ނަތީޖާ އެއް ނުވަތަ އޮޑިޓް ކުރި ކަމެއް ވެސް ނޭނގެ އެވެ. އެ އޮޑިޓް ވެސް އޮތީ ވާނުވާ ގަ އެވެ. 

އެހެންކަމުން ކުޅުދުއްފުށީގެ ރައްޔިތުން ބުނި ފަދައިން، މިއަދު ރައްޔިތުންގެ އަތަށް އަރާ ކޮންމެ މަސްދަޅަކުން ކަރަންޓު ރަހަ ލަނީ، އެއީ ހިލޭ ލިބޭ އެއްޗެއް ނޫންކަން އަމަލީ ގޮތުން ފެންނާތީއޭ ބުނެވިދާނެއްނުންތޯ އެވެ.