ކައުންސިލަރުންގެ މުސާރަ ބޮޑުކުރަން ޕީއެންސީ އިން ދެކޮޅު ހަދައިފި
ކައުންސިލަރުންގެ މުސާރަ ބޮޑުކުރުމަށް ގޮވާލައި އިދިކޮޅު އެމްޑީޕީން މަޖިލީހަށް ހުށަހެޅި ގަރާރަށް، ސަރުކާރު ހިންގާ ޕީއެންސީގެ މެންބަރުން ދެކޮޅު ހައްދަވައިފި. މި ބަހުސްގައި ޕީއެންސީގެ މެންބަރުން ވިދާޅުވީ ކައުންސިލަރުންގެ މުސާރަ ބޮޑުކުރުމަށް އުސޫލެއްގެ ގޮތުން ތާއީދުކުރި ނަމަވެސް، މިވަގުތަކީ އެކަމަށް އެންމެ އެކަށީގެންވާ ވަގުތު ނޫން ކަމަށާއި މި ދައުރުގެ ތެރޭގައި އެ ބަދަލު ގެންނާނެ ކަމަށް. ނަމަވެސް، އިގުތިސާދީ ދަތިކަމުގެ ވާހަކަ ސަރުކާރުން ދައްކާއިރު، ސިޔާސީ މަގާމުތަކަށް މީހުން އައްޔަންކުރަމުންދާތީ އާންމުންގެ ފާޑުކިޔުން ވަނީ އަމާޒުވެފަ.
ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާއު: އެނާ މަޖިލީހުގައި ވިދާޅުވީ ކައުންސިލަރުންގެ މުސާރަ ބޮޑުކުރުމަށް ރާއްޖޭގެ އިގްތިސާދީ ހާލަތު ތަން ނުދޭ ކަމަށް. | ރާއްޖެއެމްވީ ގްރެފިކްސް
ރާއްޖޭގެ މިހާރުގެ އިގުތިސާދީ ހާލަތަށް ބަލާއިރު ކައުންސިލަރުންގެ މުސާރަ ބޮޑުކުރުމަކީ ކުރެވެން އޮތް ކަމެއް ނޫން ކަމަށް ބުނެ، ރައްޔިތުންގެ މަޖިލީހުގެ ސުޕަ މެޖޯރިޓީ އޮންނަ ޕީއެންސީގެ މެންބަރުން އެކަމަށް ދެކޮޅު ހަދައިފި އެވެ.
ޕީއެންސީ މެމްބަރުން މިކަން ހާމަކުރެއްވީ ކައުންސިލަރުންގެ މުސާރަ ބޮޑުކުރުމަށް ގޮވާލައި ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް ހުށަހެޅުއްވި ގަރާރަށް މަޖިލީހުގައި ކުރި ބަހުސްގެ ތެރެއިންނެވެ.
މިދިޔަ މެއި މަހުގެ 11 ވަނަ ދުވަހު މީކާއިލް ހުށަހެޅުއްވި ގަރާރުގައި ފާހަގަކުރެއްވީ، ކައުންސިލުތަކުގެ ރައީސުންގެ މުސާރަ ސެކްރެޓަރީ ޖެނެރަލުންގެ މުސާރައަށް ވުރެ ކުޑަ ކަމަށާއި، ނައިބުންގެ މުސާރަ އެގްޒެކްޓިވުންގެ މުސާރައަށް ވުރެ ކުޑަ ކަމަށެވެ. އަދި ކައުންސިލަރުންގެ މުސާރަ ބައެއް މުވައްޒަފުންގެ މުސާރައަށް ވުރެ ވެސް ކުޑަ ކަމަށް އެ ގަރާރުގައި ވެއެވެ. ލާމަރުކަޒީ ގާނޫނަށް އެކިފަހަރު މަތިން ގެނައި އިސްލާހުތަކުގެ ސަބަބުން ކައުންސިލަރުންގެ ޒިންމާތައް އިތުރުވެފައިވާތީ، އެކަށީގެންވާ އުޖޫރައެއް ދިނުމަކީ ދައުލަތުގެ ޒިންމާއެއް ކަމަށް ގަރާރުގައި ބުނެފައިވެ އެވެ.
މި މައްސަލައާ ގުޅިގެން ވާހަކަދައްކަވަމުން ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވީ، ކައުންސިލަރުންގެ މުސާރަ ބޮޑުކުރުމަށް ޕީއެންސީން ޖުމްލަ ގޮތެއްގައި ތާއީދު ކުރި ނަމަވެސް، އެމްޑީޕީ އިން މި ގަރާރު ހުށަހެޅުއްވީ ހެޔޮ ނިޔަތެއްގައި ނޫން ކަމަށެވެ. އެހެންކަމުން މި ގަރާރަށް ޕީއެންސީން ތާއީދު ނުކުރާނެ ކަމަށް ޝުޖާއު ވިދާޅުވި އެވެ. މިކަމަށް ގައުމުގެ އިގުތިސާދީ ހާލަތު މިވަގުތު ތަންނުދޭ ކަމަށް ވިދާޅުވެ، މި ދައުރު ނިމުމުގެ ކުރިން ކައުންސިލަރުންގެ މުސާރަ އަށް ބަދަލު ގެންނާނެ ކަމުގެ ޔަގީންކަން ޝުޖާއު ވަނީ ދެއްވާފަ އެވެ.
މި ބަހުސްގައި ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވިދާޅުވީ، އެމްޑީޕީގެ ވެރިކަމުގައި ރާއްޖޭގެ އިގުތިސާދު ވަރަށް ބޮޑަށް ދަށަށް ގޮސްފައިވާ ކަމަށާއި، މި ސަރުކާރުން މަސައްކަތްކުރަނީ އެ ހާލަތުން ގައުމު ސަލާމަތްކުރުމަށް ކަމަށެވެ. އެމްޑީޕީން މިފަދަ ގަރާރުތައް ހުށަހަޅަނީ އިގުތިސާދު އިތުރަށް ހަލާކުކޮށްލުމަށް ކަމަށް އޭނާ ތުހުމަތު ކުރެއްވި އެވެ. މީގެ އިތުރުން އައިބީ ވިދާޅުވީ، ކައުންސިލުތަކުގައި އެންމެ ބުރަކޮށް މަސައްކަތްކުރަނީ ސިވިލް ސާވަންޓުން ކަމަށެވެ. ނަމަވެސް ކައުންސިލަރުންގެ މުސާރަ ރަނގަޅުކުރަން މި ސަރުކާރުން މަސައްކަތްކުރާ ކަމަށް ވެސް އައިބީ ވިދާޅުވި އެވެ.
މިލަންދޫ ދާއިރާގެ މެންބަރު ހަސަން މުފީދު ވަނީ އެމްޑީޕީގެ ވެރިކަމުގެ ދެ ދައުރުގައި ކައުންސިލަރުންގެ މުސާރަ ބޮޑު ނުކުރީ ކީއްވެތޯ ސުވާލު އުފައްދަވާފަ އެވެ. ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވެސް ވިދާޅުވީ، ކައުންސިލަރުންނަށް އެކަށީގެންވާ މުސާރައެއް ދިނުމަށް ތާއީދު ކުރެއްވި ނަމަވެސް، މިހާރުގެ އިގުތިސާދީ ހާލަތަށް ބަލާއިރު އެކަމަށް އެންމެ އެކަށޭނަ ވަގުތު މިއީ ނޫން ކަމަށެވެ.
ކައުންސިލަރުންގެ މުސާރަ ބޮޑުކުރަން ޕީއެންސީން ދެކޮޅު ހަދާއިރު، ގައުމުގެ އިގުތިސާދީ ހާލަތަށް ބެލުމެއްނެތި ހިތްހުރި ގޮތަކަށް މިހާރު ވެސް މި ސަރުކާރުން ސިޔާސީ މަގްސަދުތައް ހާސިލްކުރުމަށް ވަޒީފާތައް ބަހަމުންދާ ކަމަށް ގިނަ ބަޔަކު ތުހުމަތު ކުރެ އެވެ.
