ޑިފެންސް މިނިސްޓަރު ކޮބާ؟ ކީއްވެ އިޙުސާން؟

ރާއްޖޭގައި ގެއްލިގެން އުޅޭ އިޓަލީގެ ފަތުރުވެރިން ތަކެއް ހޯދުމަށް، އެމްއެމްޑީއެފް އިން ކުރިއަށް ގެންދިޔަ އޮޕަރޭޝަންގައި ޙަރަކާތްތެރި ވަމުން އައި އެމްއެމްޑީއެފްގެ ބޭފުޅަކު ނިޔާވެއްޖެ އެވެ. އެއީ ކުޑަ ކަމެއް ނޫނެވެ. އާދައިގެ ކަމެއް ވެސް ނޫނެވެ. "ރިސްކު" ނަގައިގެން އެ އޮޕަރޭޝަން ކުރިއަށް ގެންދިޔައިރު، އެކަމަށް ބޭނުންވާ ވަސީލަތްތަކެއް ރާއްޖެ އަކު ނެތެވެ. އެކަމުގެ ޤާބިލު ކަމެއް ވެސް ނެތެވެ. އަމުދުން، މޫސުން ގޯސް ދުވަސްވަރެއްގައި އެއީ ކުރަން ރަނގަޅު ކަމެއް ނޫން ކަމަށް އެތައް ބަޔަކު ފާހަގަ ކޮށްފައިވެ އެވެ.

އެ ވާހަކަ މިވަގުތު ދައްކާކަށް ނެތީ އެވެ. މިވަގުތު ދައްކަން މި އުޅެނީ ޒިންމާދާރު މަގާމު ތަކުގައި ތިއްބެވި ވެރިންގެ ވާހަކަ އެވެ. މިވަރުގެ ބޮޑު ކަމެއް ހިނގައިގެން އުޅޭއިރު، ޑިފެންސް މިނިސްޓަރު ކޮބައި ހެއްޔެވެ؟ އައު ޑިފެންސް މިނިސްޓަރުގެ މަގާމަށް ޙަސަން ރަޝީދު އައްޔަން ކުރެއްވިތާ މިވީ، އެއް މަސް ދުވަހާއި، ހަަތަރު ދުވަހެވެ. އެމްއެމްޑީއެފް އިން ކުރިއަށް ގެންދިޔަ މިވަރުގެ ބޮޑު އޮޕަރޭޝަނެއްގެ ތެރެއިން، އެމްއެމްޑީއެފްގެ ބޭފުޅަކު ނިޔާވީއިރު، ޑިފެންސް މިނިސްޓަރުގެ ބަހެއް ނެތެވެ.

މިއީ އަނިޔާ އެކެވެ. އިހުމާލެކެވެ. ގެއްލިގެން އެ ދިޔައީ ދިވެހި ދައުލަތަށާއި، ދިވެހި އަސްކަރިއްޔާ އަށް ވަފާތެރި ކަމާ އެކު ޚިދުމަތް ކުރެއްވުމުގައި ދެމި ހުންނެވި ދިވެހި ދަރިޔެކެވެ. ދިވެހި މަންމަ އަކާއި ބައްޕައެއްގެ ދަރި އެކެވެ. ފިރިއެކެވެ. ދަރިން ތަކެއްގެ ބައްޕަ އެކެވެ. ހިތްދަތިކަމާއި، ވޭނާއިި، ކެކުޅުން ތަހަންމަލު ކުރާނީ އެ އާއިލާ އިންނެވެ. ހިތްދަތި ކަމުގައި އުޅެން ޖެހޭނީ އެ އާއިލާގެ މެމްބަރުންނެވެ. މަގާމު ތަކުގައި ތިއްބެވި ވެރިންނަށް މިކަމުގެ ހިތްދަތިކަން އިޙުސާން ނުކުރެވިދާނެ އެވެ. 

ޑިފެންސް މިނިސްޓަރުގެ ޒިންމާ އާއި، ބެލުމުގެ ދަށުގައި އޮތް މުއައްސަސާއެއްގައި މަސައްކަތް ކުރައްވަން ހުންނެވި ބޭފުޅަކު ނިޔާވެގެން އުޅޭއިރު، ޑިފެންސް މިނިސްޓަރު އެއްޗެއް ވިދާޅު ނުވެ ހުންނެވުމަކީ ލަދުވެތި ކަމެކެވެ. ވެރިންގެ އަމުރަށް، އެންގެވުމަށް ނުވަތަ އޯޑަރަށް މަސައްކަތް ކުރަން ތިބި ސިފައިންގެ ތެރެއިން، ކަމުގެ އެންމެ މޮޅު އެއް ބޭފުޅާ ނިޔާވެގެން ދިޔައީ ވެރިންނަށް ވެސް ހެދުނު ގޯހަކުންނެވެ. ވަސީލަތް ނެތްކަން އިނގޭއިރު، އެވަރުގެ ޤާބިލުކަން ނެތްކަން އަމުދުން އެނގި ތިބެ، ރިސްކެއް ނަގަން ޖެހުނީ ކީއްވެ ހެއްޔެވެ؟ އެ ރިސްކު ނުނެގި ނަމަ، މިއަދު މި ވާހަކަ މިހެން ދައްކަން ޖެހުނީސް ހެއްޔެވެ؟

މިކަމުގައި ސަރުކާރުން ދައްކާ ވާހަކަ ވެސް ދިމަލެއް ނުވެ އެވެ. ސަރުކާރުގެ އިސް ތަރުޖަމާނު ބައިނަލްއަޤުވާމީ މީޑިއަ ތަކަށް ދީފައިވާ މައުލޫމާތަކީ ޞައްޙަ މައުލޫމާތު ނޫން ކަމަށް އެތައް ބަޔަކު އެބަ ބުނެ އެވެ. އަޅުގަނޑު ކަހަލަ އާދައިގެން ރައްޔިތުންނެއް ނޫނެވެ. ޑައިވް ކުރުމުގެ ތަޖުރިބާ އާއި، އެ ދާއިރާ އިން އެތައް ކަމެއް ހާސިލު ކޮށްފައިވާ ފަރާތް ތަކުން ސޯޝަލް މީޑިއާގައި އެ ވާހަކަ އެ ގެންދަނީ ދައްކަމުންނެވެ. ވީއިރު، ޑިފެންސް މިނިސްޓަރާއި، ޗީފް އޮފް ޑިފެންސް ފޯސް އާއި ދެން ވެސް ތިއްބެވި ވެރިން މިކަމުގެ ފުރިހަމަ މައުލޫމާތު ރައްޔިތުންނަށް ދީ، ވެގެން ދިޔަ ގޮތް ސާފުކޮށް ބުނެ ދެއްވައި، ހަގީގަތާ ކުރިމަތިލާންވީ ނޫންތޯ އެވެ؟

އެމްއެންޑީއެފް އިން ކުރިއަށް ގެންދިޔަ އޮޕަރޭޝަނެއްގައި މިވަރުގެ ހާދިސާއެއް ހިނގައިގެން ދިޔައީމާ، އެކަމުގައި ވާހަކަ ދައްކަން އެންމެ އައުލާކަން ބޮޑީ ޑިފެންސް މިނިސްޓަރު ނޫން ހެއްޔެވެ؟ އެކަމަކު، ޑިފެންސް މިނިސްޓަރުގެ ބަދަލުގައި ސޯޝަލް މީޑިއާގައި ލިޔުއްވި އެއްޗެއް ލިޔުއްވާފައި އޮތީ ހޯމް މިނިސްޓަރު އަލީ އިޙުސާން އެވެ. އަޅުގަނޑު ހިތަށް އެރި އެވެ. ޑިފެންސް މިނިސްޓަރު ކޮބައިބާ އެވެ؟ އިޙުސާން ކީއްވެ ހެއްޔެވެ؟

ހޯމް މިނިސްޓަރު އިޙުސާން އަކީ މީގެ ކުރިން އެމްއެންޑީއެފްގައި ކިތަންމެ ގިނަ ދުވަހަކު މަސައްކަތް ކޮށްފައި ހުންނެވި ބޭފުޅަކަށް ވީ ނަމަވެސް، އެމްއެންޑީއެފްގެ ބެލުމުގެ ދަށުން ހިނގި ކަމެއްގައި ބަސް ބުނުމުގެ ހައްގެއް އިޙުސާން އަކަށް ނޯންނާނެ އެވެ. އެކަން ވީ ގޮތާއި، އެކަމުގައި ހިނގައި ދިޔަ ކަންތަކާއި، އެމްއެންޑީއެފް އިން ކުރި މަސައްކަތާއި އަދި ދެން ވެސް ދޭން ޖެހޭ މައުލޫމާތު ދޭން ޖެހޭނީ ޑިފެންސް މިނިސްޓަރު ޙަސަން ރަޝީދު އެވެ. އެ ބޭފުޅާ ބަހެއް ވިދާޅު ނުވެ، އިޙުސާން ޕޯސްޓު ތަކެއް ކުރެވުމަކީ، އުނދުޅި ދިގުވުން ނޫން ދެން ކޮން ކަމެއް ހެއްޔެވެ؟ 

ކޮންމެ ވުޒާރާ އަކަށް މެންޑޭޓު ތަކެއް ކަނޑައަޅައި، މިނިސްޓަރުންނަށް މަސްއޫލިއްޔަތު ތަކެއް ދީފައި އޮންނަނީ ކަމެއް ވެގެންނެވެ. އެ ވުޒާރާއެއްގެ ކަމެއްގައި ވާހަކަ ދައްކަވަން ވާނީ، އެތަނެއްގައި ހުންނަވާ މިނިސްޓަރެކެވެ. ކޮންމެ މައްސަލައެއްގައި، ކޮންމެ ކަމެއްގައި ހޯމް މިނިސްޓަރު ބަސް ވިދާޅުވާކަށް ވެސް ނުޖެހޭނެ އެވެ. މިވަގުތު ވާހަކަ ދައްކަވަން ޖެހޭނީ ޑިފެންސް މިނިސްޓަރު ޙަސަން ރަޝީދު އެވެ.

ރައްޔިތުންގެ ޓެކްސް ފައިސާ އިން ކޮންމެ މަހަކު ބޮޑު މުސާރަ ނަންގަވައި، ރައްޔިތުންގެ ޓެކްސް ފައިސާ އިން ކާރު ކޮޅު ދެއްވައި އަދި ނުވިތާކަށް ރައްޔިތުންގެ ޓެކްސް ފައިސާ އިން ސެކިއުރިޓީ އިން ދީފައި ތިބެނީ ރީއްޗަކަށް ނޫނެވެ. ޒާތްކޮޅު ފުރިހަމަ ކުރާކަށް ވެސް ނޫނެވެ. ރައްޔިތުންނަށް ޚިދުމަތްް ކުރުމަށެވެ. ރައްޔިތުން ކަންބޮޑުވާ ކަންކަމުގައި ޖަވާބު ދިނުމަށެވެ. އިހުމާލުތައް ބެލުމަށެވެ. ޒިންމާ ނެގުމަށެވެ. އެ ނޫން ނަމަ، އިސްތިއުފާ ދެއްވާފައި ވަޑައިގަންނަވަންވީ ގެޔަށެވެ. ހަގީގަތުގައި އެކަން ކުރަން ލަސް ވެސް ވެއްޖެ އެވެ.