އުޅުއްވަނީ 24 ގަޑިއިރު މަސައްކަތުގައި، އެކަމަކު ބަންދެއް ލިބޭ އިރަށް ސިންގަޕޫރަށް!

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަކީ، ރައްޔިތުންގެ ޚިދުމަތުގައި 24 ގަޑިއިރު ހުންނަވާނެ ކަމަށް ވިދާޅުވި ބޭފުޅެކެވެ. އެމަނިކުފާނާއި، މުޅި ސަރުކާރު އޮންނާނީ ޑޭޓާ ކަނޑައި ނުލާ 24 ގަޑިއިރު ރައްޔިތުންގެ ޚިދުމަތުގައި ކަމަށް ވިދާޅުވި އެވެ. ސަރުކާރުން މިނިސްޓަރުން ވެސް ޕޯޑިއަމް ތަކުގައި ވަރަށް ފަރިވެފައި، ނިކަން އަޑު ހަރުކޮށް އެ ވާހަކަ ވިދާޅުވެފައި އެބަ ހުއްޓެވެ. އެންމެ ފަހަރަކު ނޫނެވެ. އެތައް ފަހަރަކު އެވެ. 

އެކަމަކު، ރައީސް މުޢިއްޒު އާއި ސަރުކާރުގެ އަމަލުތައް ފެންނަނީ އެހެނެއް ނޫނެވެ. ފޯނުގެ ޑާޓާ ކަނޑައި ނުލެއްވިއެއް ކަމަކު، އަމަލުތައް ފެންނަނީ ދިމާާ އިދިކޮޅަށެވެ. ރައްޔިތުންނަށް ޚިދުމަތް ކުރުމާާއި، 24 ގަޑިއިރާއި، ފޯނުގެ ޑޭޓާއާ މިއީ މުޅިން ތަފާތު ކަންކަމެއް ނޫން ހެއްޔެވެ؟ ލޮލަށް ފެންނަ މަންޒަރު ތަކާއި، އިވޭ އަޑު ތަކުން ހިތަށް އަރަތީ ހައްތަހާ ވެސް ސުވާލެވެ. އަމަލާއި ބަހާ ދިމާ ނުވާ ރައީސް އަކާއި، ސަރުކާރެއް އޮތީމަ އެވެ. 

ރައްޔިތުންގެ ޚިދުމަތުގައި 24 ގަޑިއިރު އުޅުއްވާ ރައީސް، ބަންދެން ލިބޭ އިރަށް ވަޑައިގަންނަވަނީ ރާއްޖެ އިން ބޭރަށެވެ. ފޮން ފޮދެއް ބުއިމެއް ނެތި، ނުވިތާކަށް ފާޚަނާ ކޮށްލުމެއް ނެތި ރައްޔިތުންގެ ޚިދުމަތުގައި ހުންނަވާ ރައީސް، ބަންދެން އަންނައިރަށް ވަޑައިގަންވަނީ ސިންގަޕޫރަށެވެ. ނުވަތަ އެހެން ޤައުމެކެވެ. ސިންގަޕޫރުގެ ނަން ފާހަގަ ކޮށްލަން މި ޖެހުނީ ސަބަބެއް ނެތިއެއް ނޫނެވެ.

އާދީއްތަ ދުވަހުގެ ރޭ ރައީސް މުޢިއްޒު ސިންގަޕޫރަށް ވަޑައިގެންފި އެވެ. ނުރަސްމީ ދަތުރުފުޅެއްގައި އެ ވަޑައިގެންނެވީ ޢީދު ޗުއްޓީ އަށެވެ. ރައީސް އޮފީހުން ޚަަބަރެއް އާންމު ކޮށްފައި އޮއްވާ އަހަރެން ދުށީމެވެ. "ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ސިންގަޕޫރަށް ފުރާވަޑައިގެންފި" މިހެންނެވެ. އަހަރެން ހިތަށް އެރި އެވެ. އޭގެ ބަދަލުގައި "ޢީދު ޗުއްޓީ އަށް ރައީސުލްޖުމްހޫރިއްޔާ ސިންގަޕޫރަށް ފުރާވަޑައިގެންފި" މިހެން ލިޔުއްވިއްޔާ މާ ތާހިރުވާނެ އެވެ. 

މިއީ ވެރިކަމުގެ ދެ އަހަރާއި ބައިގެ ތެރޭގައި ރައީސް މުޢިއްޒު ސިންގަޕޫރަށް ވަޑައިގެންނެވި އަށް ވަނަ ފަހަރެވެ. 2024 ވަނަ އަހަރު ނުރަސްމީ ހަތަރު ދަތުރުފުޅު ސިންގަޕޫރަށް ކުރެއްވި އެވެ. 2025 ވަނަ އަހަރު ސިންގަޕޫރަށް ދެ ފަހަރު ވަޑައިގެންނެވިއިރު، އެއް ދަތުރުފުޅަކީ ނުރަސްމީ އެވެ. އަނެއް ދަތުރުފުޅަކީ ރަސްމީ އެވެ. 2026 ވަަނަ އަހަރު އެ ވަޑައިގެންނެވީ ނުރަސްމީ ދަތުރުފުޅެއްގައި ދެ ވަނަ ފަހަރަށެވެ. އަހަރެން ހިތަށް އެރި އެވެ. އެހާ ވަރަކުން ފުރަ ފުރައިގެން ސިންގަޕޫރަށް އެ ވަޑައިގަންނަވަނީ ކޮން ބޭނުމެއްގައި ހެއްޔެވެ؟

ގައިމު ރައްޔިތުންގެ ޚިދުމަތުގައި އަވަދި ނެތި އުޅުއްވާ ބޭފުޅެއް ނަމަ، އިރުއިރުކޮޅާ ފުރަ ފުރައިގެން ސިންގަޕޫރަށް ވަޑައިގަންނަވަން އެހާ ވަގުތު އޮންނާނެ ހެއްޔެވެ؟ 

ހަމައެކަނި ޤައުމުން ބޭރަށް ވަޑައިގެންނެވުމެއް ނޫނެވެ. ޤައުމުގައި ހުންނަވާއިރު ވެސް، ޙާލަކީ މިއީ އެވެ. ހަފުތާގެ ގިނަ ދުވަސްތައް ހޭދަ ކުރައްވަނީ ރިޔާސީ ރަށް، އާރަށުގަ އެވެ. ގިނަ ރޭރޭ އާރަށުގައި އުޅުއްވަނީ ފުޓްސަލް ކުޅުއްވުމާއި، މަޖާ ކުރެއްވުމުގަ އެވެ. އަރިހުގައި ސަރުކާރުގެ މިނިސްޓަރުންނާއި، އަރިސް ބޭފުޅުން ވެސް ގެންދަވަ އެވެ. ރިޔާސީ ލޯންޗު ކޮޅު އެ އޮންނާނީ، މާލެ އާއި އާރަށާ ދޭތެރޭގައި ބުރު ޖަހައި ޖަހައި ބަރުބަލިވެފަ އެވެ. 

ރައީސް އަމިއްލަފުޅަށް ވިދާޅުވެފައި އޮންނާނެ އެވެ. ހަފުތާ އަކު ތިން ރޭ އާރަށުގައި ވަރަށް ފިޒިކަލްކޮށް ފުޓްސަލް ކުޅުއްވާ ވާހަކަ އެވެ. ރައްޔިތުން ޚިދުމަތުގައި ރެޔާއި ދުވާލު އުޅުއްވާ ބޭފުޅާ އާއި، އެ ބޭފުޅާގެ އަރިހުގައި އުޅުއްވާ ބޭފުޅުންނަށް، ފުޓްސަލް ކުޅުއްވުމާއި، މަޖާ ކުރެއްވުމަށް މިހާ ވަގުތު އޮވޭ ހެއްޔެވެ؟ ސިންގަޕޫރަށް ވަޑައިގަންނަވަން އެހާ ވަގުތު އޮވޭ ހެއްޔެވެ؟ މި ހުރިހާ ކަމެއްގައި ހަމަ ޖެހިލައިގެން އުޅުއްވާ ވަރަށް، ޤައުމުގެ ކަންކަން އޮތީ ހަމަ މަގުގައި ހެއްޔެވެ؟