އެމެރިކާގެ ވަފުދެއް ޤަތަރަށް ވަޑައިގަންނަވާނެ ކަމަށް ޓްރަމްޕް ވިދާޅުވެއްޖެ

އެމެރިކާގެ ވަފުދެއް އަންގާރަ ދުވަހު ޤަތަރަށް ވަޑައިގަންނަވާނެ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޤަތަރުގައި ކުރިއަށްދާ ބައްދަލުވުމެއްގައި ބައިވެރިވެ ވަޑައިގެންނެވުމަށް އެމެރިކާގެ ވަފުދެއް އެ ޤައުމަށް ވަޑައިގަންނަވާނެ ކަމަށާއި، ފަހަރުގައި އެއީ މުހިންމު ބައްދަލުވުމަކަށް ވެސް ވެދާނެ ކަމަށް ޓްރަމްޕް ވިދާޅުވި އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސް އިން ބުނެފައި ވަނީ ހަނގުރާމަ ހުއްޓާލުމުގެ އެއްބަސްވުމާ ގުޅޭ ވާހަކަތައް މެދު ކެނޑުމެއް ނެތި ކުރިއަށް ދާނެ ކަމަށެވެ. އެމެރިކާ އިން ބުނެފައި ވަނީ، އެމެރިކާ އާއެކު ދާއިމީ އެއްބަސްވުމަކަށް އައުމަށް އީރާން އަށް ވަގުތު ދީފައި ވާނެ ކަމަށެވެ. އެގޮތުން އޯގަސްޓު މަހާ ހަމައަށް ދާއިރު، އެއްބަސްވުމަކަށް އާދެވެން ވާނެ ކަމަށް ވެސް ބުނެފައިވެ އެވެ. 

ދާދި ފަހުން ހުރްމުޒް ކަނޑު އޮޅީގެ ސަރަހައްދުގައި ދީފައިވާ ހަމަލާ ތަކުގެ ސަބަބުން، މި ސަރަހައްދުގައި ހަނގުރާމަ އަލުން ފެށިދާނެ ކަމުގެ ބިރު ވަނީ ބޮޑުވެފައި އެވެ. އަދި ބައިނަލްއަޤުވާމީ މުޖުތަމައުން އަންނަނީ އެކަމުގެ ކަންބޮޑުވުން ވެސް ފާޅު ކުރަމުންނެވެ. މި ކަނޑު އޮޅި އަކީ ދުނިޔޭގެ ތެލުގެ ވިޔަފާރީގެ ވަރަށް މުހިންމު މަގަކަށް ވާތީ، މި ސަރަހައްދުގައި ހަނގުރާމައިގެ ޙާލަތު އިތުރު ވުމަކީ ދުނިޔޭގެ އިގްތިސާދަށް ނުރައްކާތެރި ކަމެކެވެ.

ޓްރަމްޕް ވިދާޅުވީ އެމެރިކާ އިން ބޭނުން ވަނީ ސުލްޙަވެރި ގޮތެއްހައި މައްސަލަ ޙައްލު ކުރަން ކަމަށެވެ. ނަމަވެސް، އެމެެރިކާގެ ސަލާމަތާއި ރައްކާތެރި ކަމަށް ނުރައްކާ ވެއްޖެ ނަމަ، ކޮންމެ ފިޔަވަޅެއް ވެސް އެޅުއްވުމަށް ތައްޔާރަށް ހުންނެވި ކަމަށް ޓްރަމްޕް ވިދާޅުވި އެވެ. މީގެ ކުރިން ވެސް ޓްރަމްޕް ވަނީ، އެކި ފަހަރު މަތިން އީރާން އަށް އިންޒާރު ދެއްވައިފަ އެވެ. 

އެެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ކުރަމުން އަންނަ މަސައްކަތުގައި ޤަތަރަކީ ވެސް ބައިވެރިވާ ޤައުމެކެވެ. ޕާކިސްތާން އާއެކު ޤަތަރުން ވެސް މި މަސައްކަތުގައި ބައިވެރިވާއިރު، ދެ ޤައުމުގެ ދެ މެދުގައި މިހާރު އޮތީ އެއްބަސްވުމެއްގައި ސޮއި ކުރެވިފައި އެވެ. 

އަންގާރަ ދުވަހު ޤަތަރަށް އެމެރިކާގެ ވަފުދެއް ދަތުރު ކުރައްވާނެ ކަމަށް ޓްރަމްޕް ވިދާޅުވިއިރު، އީރާން އިން ވެސް ވަނީ އެ ޤައުމުގެ އޮފިޝަލުން އަންގާރަ ދުވަހު ޤަތަރަށް ވަޑައިގަންނަވާނެ ކަމަށް ހާމަ ކޮށްފައި އެވެ. ނަމަވެސް، އެއީ އެމެރިކާއާ ގުޅުން ހުރި ކަމެއް ނޫން ކަމަށާއި، އެމެރިކާއާ އެކު މަޝްވަރާ ކުރުމަށް ނޫން ކަމަށް ވެސް އީރާން އިން ވަނީ ބުނެފައި އެވެ.