ހުރްމުޒް ކަނޑު އޮޅީގެ ނުތަނަވަސްކަމާ އެކު، ތެލުގެ އަގު އުފުލިއްޖެ

އެމެރިކާ އާއި އީރާންއާ ދެމެދު ދެމުންދާ ހަމަލާތަކާ ގުޅިގެން ހުރްމުޒް ކަނޑު އޮޅިން މުދާ އުފުލުމަށް ހުރަސް ތަކެއް ކުރިމަތިވެ، ދުނިޔޭގެ ބާޒާރުގައި ތެލުގެ އަގު އުފުލިއްޖެ އެވެ.

މަސްރަހު ދިރާސާކުރާ ފަރާތް ތަކުން ބުނާ ގޮތުގައި ތެލުގެ އަގަށް މި ބަދަލު އައީ ދެ ގައުމުގެ ދެމެދުގައި ބަދަލު ކުރަމުންދާ ހަމަލާ ތަކުގެ ސަބަބުން، ތެޔޮ ސަޕްލައި ކުރުމަށް ބުރޫ އަރާފާނެ ކަމުގެ ބިރު ބޮޑުވުމާ ގުޅިގެންނެވެ.

މާކެޓްގެ ތަފާސް ހިސާބު ތަކަށް ބަލާއިރު، ބްރެންޓް ކްރޫޑް ފިއުޗާސްގެ އަގު ވަނީ 58 ސެންޓް ނުވަތަ 0.8 އިންސައްތަ އުފުލިފައި އެވެ. މިއާ އެކު ބްރެންޓް ކްރޫޑް ފީފާއެއްގެ އަގު މިހާރު ހުރީ 72.57 ޑޮލަރުގައި އެވެ. މީގެ އިތުރުން އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑްގެ އަގު ވަނީ 88 ސެންޓް ނުވަތަ 1.3 އިންސައްތަ މައްޗަށް ގޮސްފައި އެވެ. މިއާ އެކު އެމެރިކާ ތެލުގެ ފީފާއެއްގެ އަގު ވަނީ 70.11 ޑޮލަރަށް އަރާފައި އެވެ.

ތެލުގެ އަގު މިހާރު އުފުލެން ފަށާފައި މިވަނީ، ވޭތުވެ ދިޔަ ހަފުތާގައި ތެލުގެ އަގު ވަރަށް ބޮޑަށް ދަށަށް ގޮސްފައި ވަނިކޮށެވެ. ނިމިދިޔަ ހަފުތާގައި ބްރެންޓް ކްރޫޑްގެ އަގު ވަނީ 10.6 އިންސައްތަ ދަށަށް ގޮސްފައި އެވެ. މިއީ ވިދި ވިދިގެން ތެލުގެ އަގު ދަށަށް ދިޔަ ތިން ވަނަ ހަފުތާ އެވެ.

މިދިޔަ ހަފުތާގައި އަގުތައް ދަށަށް ދިޔައީ ފެބްރުވަރީ މަހުގެ ފަހުކޮޅު އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފެށި ފަހުން، ހުރްމުޒް ކަނޑު އޮޅިން ތެޔޮ ބޭރުކުރާ މިންވަރު އެންމެ މަތީ މިންވަރަކަށް އިތުރުވުމާ ގުޅިގެންނެވެ.

ނަމަވެސް، އެމެރިކާ އާއި އީރާންއާ ދެމެދު ބަދަލު ކުރަމުންދާ ހަމަލާ ތަކުގެ ސަބަބުން މަސްރަހު އަނެއްކާ ވެސް ވަނީ ނުތަނަވަސްވެފައި އެވެ. ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑު އޮޅީގައި އުޅަނދު ފަހަރަށް ކުރިމަތި ވަމުންދާ ހުރަސް ތަކުގެ ސަބަބުން، ކުރިއަށް އޮތް ދުވަސް ތަކުގައި ވެސް ތެލުގެ އަގަށް ބަދަލު ތަކެއް އަތުވެދާނެ ކަމަށް އިގްތިސާދީ މާހިރުން ލަފާ ކުރެ އެވެ.