އީރާން އާއެކު ކުރާ މަޝްވަރާ ތަކުގައި ޓްރަމްޕްގެ ސަރުކާރުން ހާމަ ކަމެއް ނުގެން ގުޅޭ، ރައްޔިތުން ތިބީ ޖަވާބު ބޭނުން ވެފައި: ޝޫމާ

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އީރާން އާއެކު ކުރަމުން އަންނަ މަޝްވަރާ ތަކުގައި އެއްވެސް ކަހަލަ ހާމަ ކަމެއް ނެތް ކަމަށާއި، އެމެރިކާގެ ރައްޔިތުން ތިބީ ޖަވާބު ބޭނުން ވެފައި ކަމަށް އެމެރިކާ ސެނެޓުގެ ޑިމޮކްރެޓިކް ޕާޓީގެ ލީޑަރު ޗަކް ޝޫމާ ވިދާޅުވެއްޖެ އެވެ. 

ޝޫމާ ވިދާޅުވީ އެމެރިކާ ސަރުކާރުގެ އޮފިޝަލުން އެކަމުގެ މައުލޫމާތު ސެނެޓާ ހިއްސާ ކޮށްފައިވާ ކަމަށެވެ. ނަމަވެސް، ސެނެޓަށް މައުލޫމާތު ދިނުން ލަސްވެފައިވާ ކަމަށާއި، އަދި މައުލޫމާތު ދިނުމުގައި ތަފްސީލުތަކެއް ނެތް ކަމަށް ވެސް އޭނާ ވިދާޅުވި އެވެ. 

މީގެ އިތުރުން ޝޫމާ ވިދާޅުވީ އެމެރިކާ އިން އިންތިހާ އަށް ޚަރަދު ކުރަން ޖެހުނު ހަނގުރާމަ އަކަށް އެ ޤައުމު ވަދެފައިވާއިރު، އެކަމުގެ ސަބަބުން އެމެރިކާ އަށް ހާސިލު ކުރެވުނު އެއްވެސް ކަމެއް ޓްރަމްޕްގެ ސަރުކާރަށް ބުނެދެވިފައި ނުވާ ކަމަށެވެ. އޭގެ ބަދަލުގައި، އީރާން އަށް ތެލުގެ ވިޔަފާރިން އެތައް ބިލިއަން ޑޮލަރެއް ލިބޭ ކަމަށާއި، ހުރްމުޒް ކަނޑު އޮޅީގައި ނުރައްކާތެރި ބާރުވެރި ކަމެއް އޮތް ކަމަށް އޭނާ ވިދާޅުވި އެވެ. 

އެކަން ފާހަގަ ކުރައްވައި ޝޫމާ ވިދާޅުވީ، އެއީ އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ހިއްސާ ކުރައްވާފައިވާ މައުލޫމާތު ތަކެއް ކަމަށެވެ. މިއީ ފޮރުވިގެން ތިބެ އަމިއްލަ ސަރުކާރު ދިފާއު ކުރުން ކަމަށް ވާ ނަމަ، ރޫބިއޯ އެކަން ހާމަ ކުރައްވަން ޖެހޭ ކަމަށް ވެސް ޝޫމާ ވިދާޅުވި އެވެ. އަދި ފޮރިން ރިލޭޝަން ކޮމެޓީ އަށް ހާޒިރުވެ، އެ މައުލޫމާތުތައް ފުރިހަމަ އަށް ހިއްސާ ކުރައްވަން ޖެހޭނެ ކަމަށް ވެސް އޭނާ ވިދާޅުވެފައިވެ އެވެ. 

ޓްރަމްޕް އަށް ވަރަށް ބޮޑަށް ފާޑު ވިދާޅުވަމުން ޝޫމާ ވިދާޅުވީ، ޓްރަމްޕްގެ ހަނގުރާާމައިގެ އަގު ދައްކަން ޖެހިފައި ވަނީ އެމެރިކާގެ ރައްޔިތުންނަށް ކަމަށެވެ. އެހެންކަމުން އެމެރިކާގެ ރައްޔިތުންނަށް އެކަމުގައި ޖަވާބު ތަކެއް ލިބިގެން ޖެހޭ ކަަމަށް ވެސް ޝޫމާ ވަނީ ވިދާޅުވެފައި އެވެ. އޭގެ ބަދަލުގައި "ނުކުޅެދުންތެރި ކަމުގެ" ބަހަނާ ތަކެއް ދައްކައިގެން ނުވާނެ ކަމަށް ވެސް އޭނާ ވިދާޅުވި އެވެ، 

ޝޫމާގެ މި ވާހަކަ ތަކުން ހާމަ ވަނީ އީރާންއާ ދެކޮޅަށް އެމެރިކާ އިން ކުރިއަށް ގެންދާ އޮޕަރޭޝަންއާ ގުޅޭ މައުލޫމާތު ޓްރަމްޕްގެ ސަރުކާރުން ހާމަ ކުރަމުން ނުދާ ކަމެވެ. އަދި ޤާނޫނު ހަދާ މަޖިލީހަށް ވެސް އެކަމުގެ ފުރިހަމަ މައުލޫމާތު ނުދިނުމުގެ ސަބަބުން، އިދިކޮޅު ޑިމޮކްރަޓިކް ޕާޓީ އިން ކަންބޮޑުވާން މިންވަރެވެ.