އީރާންގެ ވަފުދެއް ޤަތަރަށް ދަތުރު ކުރާނެ، އެކަމަކު އެއީ އެމެރިކާއާ ގުޅޭ ކަމެއް ނޫން!
ބަޣާއީ ވިދާޅުވީ، ކުރިއަށް އޮތް ދުވަސް ތަކުގައި އެމެރިކާ އާއެކު އެއްވެސް ފެންވަރެއްގައި މަޝްވަރާ ބައްދަލުވުމެއް ބޭއްވުމަށް ހަމަޖެހިފައި ނެތް ކަމަށް. އޭޭނާ ވިދާޅުވީ ޤަތަރަށް ވަޑައިގަންނަވައި އީރާންގެ ފަންނީ މާހިރުންގެ ވަފުދުގެ ބޭނުމަކީ ދެ ޤައުމުގެ ދެ މެދުގައި ސޮއި ކޮށްފައިވާ އެއްބަސްވުން ތަންފީޒު ކުރުމުގެ ކަންކަން ކުރިއަށްދާ ގޮތް ބެލުން ކަމަށް.
އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ. | ގެޓީ އިމޭޖަސް
އީރާންގެ އޮފިޝަލުން ޤަތަރުގެ ވެރި ރަށް ދޯހާ އަށް ދަތުރެއް ކުރައްވާނެ ކަމަށާއި، ނަމަވެސް އެއީ އެމެރިކާގެ އޮފިޝަލުންނާ ބައްދަލު ކުރުމަށް ކުރާ ދަތުރެއް ނޫން ކަމަށް އީރާން އިން ބުނެ އެވެ.
އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އީރާންގެ މަންދޫބުން ޤަތަރަށް ކުރައްވާ ދަތުރާ އެމެރިކާއާ އެއްވެސް ގުޅުމެއް ނެތް ކަމަށެވެ. ބަޣާއީ މިހެން ވިދާޅުވިއިރު، މީގެ ކުރިން އީރާންގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވެސް ވަނީ އެމެރިކާ އާއެކު މަޝްވަރާ ކުރުމަށް އީރާން އިން ޤަތަރަށް ދާ ވާހަކަ އަކީ ދޮގެއް ކަމަށް ވިދާޅުވެފައި އެވެ.
މިހަފްތާގައި އީރާނުން ދޯހާގައި އެމެރިކާއާ މަޝްވަރާކުރާ ޚަބަރަކީ ދޮގެއް
މީގެ އިތުރުން ބަޣާއީ ވިދާޅުވީ، ކުރިއަށް އޮތް ދުވަސް ތަކުގައި އެމެރިކާ އާއެކު އެއްވެސް ފެންވަރެއްގައި މަޝްވަރާ ބައްދަލުވުމެއް ބޭއްވުމަށް ހަމަޖެހިފައި ނެތް ކަމަށެވެ. އޭޭނާ ވިދާޅުވީ ޤަތަރަށް ވަޑައިގަންނަވައި އީރާންގެ ފަންނީ މާހިރުންގެ ވަފުދުގެ ބޭނުމަކީ ދެ ޤައުމުގެ ދެ މެދުގައި ސޮއި ކޮށްފައިވާ އެއްބަސްވުން ތަންފީޒު ކުރުމުގެ ކަންކަން ކުރިއަށްދާ ގޮތް ބެލުން ކަމަށެވެ.
ބަޣާއީ ވިދާޅުވި ގޮތުގައި އީރާންގެ މިހާރުގެ އެންމެ ބޮޑު އިސްކަމަކީ، އެމެރިކާ އާއެކު ވެފައިވާ އެއްބަސްވުންތައް އޭގެ އެންމެ ފުރިހަމަ ގޮތުގައި ތަންފޯޒުވަމުންދާކަން ކަށަވަރު ކުރުން ކަމަށެވެ. އަދި އީރާން އިން ބޭނުންވާ ކަންކަން ޙާސިލު ކުރުމަށް ސީރިއަސްކަމާ އެކު މަސައްކަތް ކުރަމުންދާ ކަމަށް ވެސް އޭނާ ފާހަގަ ކުރެއްވި އެވެ.
މީގެ އިތުރުން، އެއްބަސްވުމުގެ 10 ވަނަ މާއްދާގެ ދަށުން އީރާންގެ ތެޔޮ އެކްސްޕޯޓް ކުރުމުގައި އެމެރިކާ އިން ދީފައިވާ ލުއިތައް ތަންފީޒު ވަމުންދާ ގޮތް ބަލަމުންދާ ކަމަށް ބަޣާއީ ވިދާޅުވި އެވެ. ހަމައެއާ އެކު، އެއްބަސްވުމުގެ 11 ވަނަ މާއްދާގެ ދަށުން، އެކި ޤައުމު ތަކުގައި ހިފަހައްޓާފައިވާ އީރާންގެ ފައިސާ ދޫކޮށްލުމުގެ ކަންކަން ވެސް އީރާންގެ އޮފިޝަލުން ދަނީ ފޮލޯއަޕް ކުރަމުން ކަމަށް ބަޣާއީ ވިދާޅުވި އެވެ.
މީގެ ކުރިން އީރާނުގެ އޮފިޝަލުން ހާމަ ކޮށްފައިވާ ގޮތުގައި، އެމެރިކާ އިން ވަނީ ހިފަހައްޓާފައިވާ އީރާނުގެ 12 ބިލިއަން ޑޮލަރު ދޫކޮށްލުމަށް އެއްބަސްވެފަ އެވެ. މި ފައިސާ ދޫކުރުމަށް ހަމަޖެހިފައި ވަނީ ދެ ފިޔަވައްސަކަށް ބަހާލައިގެން، ކޮންމެ ފިޔަވައްސެއްގައި ހަ ބިލިއަން ޑޮލަރުގެ މަގުންނެވެ.
މަސްދަރު: އަލް ޖަޒީރާ
