ޑިޕްލޮމަސީގެ މަގު ފެއިލް ވެއްޖެ ނަަމަ، އެމެރިކާ އަށް ގިނަ އޮޕްޝަން ތަކެއް އެބަ އޮތް: އެމެރިކާގެ ނައިބު ރައީސް ވޭންސް

އީރާންގެ ނިއުކްލިއަރ މައްސަލައިގައި ޑިޕްލޮމެޓިކް މަގުން ކުރިއަށްދާ މަޝްވަރާ ތަކުން ކާމިޔާބު ހައްލެއް ނުލިބިއްޖެ ހާލަތެއްގައި، އެމެރިކާގެ ސަރުކާރުން އިޚްތިޔާރު ކުރާނެ ގިނަ ގޮތް ތަކެއް އެބަހުރި ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ވޭންސް މިހެން ވިދާޅުވީ އެމެރިކާގެ މީޑިއާ އަކަށް ދެއްވި ޚާއްސަ ބަސްދީގަތުމެއްގައި އެވެ.

އެމެރިކާގެ ނައިބު ރައީސް ވޭންސް ވިދާޅުވި ގޮތުގައި، އީރާން އާއެކު ކުރިއަށްދާ މަޝްވަރާ ތަކަކީ ސަރަހައްދީ ހަމަޖެހުމަށް މުހިންމު ކަމެކެވެ. ނަމަވެސް، އެ މަޝްވަރާ ތަކުން އެދެވޭ ނަތީޖާއެއް ނުފެނި، ޑިޕްލޮމެޓިކް މަގުން މައްސަލަ ހައްލު ނުކުރެވިއްޖެ ނަމަ، އެމެރިކާގެ ގައުމީ މަސްލަހަތު ހިމާޔަތް ކުރުމަށްޓަކައި އަޅަން ޖެހޭ ކޮންމެ ފިޔަވަޅެއް އެޅުމަށް އެމެރިކާ އޮތީ ތައްޔާރަށެވެ. މިގޮތުން އެމެރިކާގެ އަތުގައި ބޭނުން ކުރެވިދާނެ ގިނަ ސިޔާސަތު ތަކާއި، އުސޫލު ތަކެއް އެބަހުރި ކަމަށް އޭނާ ފާހަގަ ކުރެއްވި އެވެ.

މީގެ އިތުރުން ވޭންސް ވިދާޅުވީ، އީރާންގެ ނިއުކްލިއަރ ޕްރޮގްރާމްއާ ގުޅޭ ގޮތުން އެމެރިކާ އިން ގެންގުޅޭ ސިޔާސަތަކީ ވަރަށް ސާފު ސިޔާސަތެއް ކަމަށެވެ. އަދި އެމެރިކާގެ ސަރުކާރުން އަބަދުވެސް އިސްކަން ދޭނީ ސުލްހަވެރި ހައްލަކަށް ކަމަށްވީ ނަމަވެސް، އެއީ ހަމައެކަނި އޮތް ގޮތް ނޫން ކަމަށް އޭނާ ވަނީ ވިދާޅުވެފައި އެވެ. އީރާން އިން ބައިނަލްއަގުވާމީ މިންގަނޑު ތަކަށް އިހުތިރާމް ކުރަން ޖެހޭނެ ކަމަށް ވެސް ވޭންސް ވިދާޅުވި އެވެ.

މި ބަސްދީގަތުމުގައި ވޭންސް ވަނީ، މެދު އިރުމަތީގެ މަސްރަހާ ގުޅޭ ގޮތުން ވެސް ވާހަކަ ދައްކަވާފައި އެވެ. އޭނާ ވިދާޅުވި ގޮތުގައި އެމެރިކާގެ އަމާޒަކީ ސަރަހައްދީ ރައްކާތެރިކަން ކަށަވަރު ކުރުމެވެ. އަދި އީރާންގެ ފަރާތުން ކުރިމަތި ވެދާނެ ކޮންމެ ނުރައްކަލަކުން ސަލާމަތްވުމަށްޓަކައި އެމެރިކާގެ ބައިވެރިންނާ އެކު ގާތުން މަސައްކަތް ކުރަމުންދާނެ ކަމަށް ވެސް ވޭންސް ވިދާޅުވެފައިވެ އެވެ. 

އެމެރިކާގެ ނައިބު ރައީސް ވޭންސްގެ މި ވާހަކަތަކާ ގުޅިގެން ބައިނަލްއަގުވާމީ ސިޔާސީ މައިދާނުގައި މިހާރު ވަނީ ބަހުސްތައް ފެށިފައި އެވެ. ޚާއްސަކޮށް އީރާން އާއެކު އޮތް ނުތަނަވަސްކަން އިތުރު ވެފައިވާ ދަނޑިވަޅެއްގައި، އެމެރިކާގެ ފަރާތުން މިފަދަ ވަރުގަދަ އިންޒާރެއް އައުމަކީ ސަރަހައްދީ މަސްރަހަށް ބަދަލު ތަކެއް އަތުވެދާނެ ކަމެއް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.