ހުރަސްތައް ނައްތާލި ފަހުން، އީރާން އިން 40 މިލިއަނަށް ވުރެ ގިނަ ތެޔު ފީފާ ބޭރު ކޮށްފި
ޣަލިބާފް ހާމަކުރެއްވި ގޮތުގައި ބަނދަރު ތަކަށް ކުރިމަތި ކޮށްފައި އޮތް ހުރަސްތައް ނައްތާލި ދުވަހުން ފެށިގެން، މިއަދާ ހަމައަށް އީރާން އިން ވަނީ 40 މިލިއަނަށް ވުރެ ގިނަ ތެޔޮ ފީފާ ބޭރު ކޮށްފައި. ނަމަވެސް، އޭގެ ކުރިން ދިޔަ 50 އާއި 60 އާ ދެމެދުގެ ދުވަސް ތަކުގައި، އެމެރިކާގެ ބްލޮކޭޑް ނުވަތަ ބަނދަރުތައް ބަންދު ކުރުމުގެ ސަބަބުން އެންމެ ތެޔޮ ފީފާއެއް ވެސް ބޭރު ކުރުމުގެ ޤާބިލުކަން އީރާންގެ ކިބައިގައި ނެތް ކަމަށް އޭނާ ފާހަގަ ކުރެއްވި.
އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް. | ގެޓީ އިމޭޖަސް
އެމެރިކާ އިން އީރާންގެ ބަނދަރުތައް ބަންދުކޮށް ހުރަސްތައް ކުރިމަތި ކުރުވި ދުވަސްވަރު، އެ ޤައުމުން އެންމެ ތެޔޮ ފީފާއެއް ވެސް ބޭރު ކުރެވިފައި ނުވާ ކަމަށް އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެ އެވެ.
އަންގާރަ ދުވަހު ދައުލަތުގެ ޓީވީ އަށް ދެއްވި ބަސްދީގަތުމެއްގައި ޣަލިބާފް ވިދާޅުވީ، އެ ދަތިކުރުމުގެ ފިޔަވަޅުތަކަށް ފަހު މިހާރު އީރާންގެ ތެޔޮ އެކްސްޕޯޓް ވަރަށް ބޮޑަށް އިތުރުވެފައިވާ ކަމަށެވެ.
ޣަލިބާފް ހާމަކުރެއްވި ގޮތުގައި ބަނދަރު ތަކަށް ކުރިމަތި ކޮށްފައި އޮތް ހުރަސްތައް ނައްތާލި ދުވަހުން ފެށިގެން، މިއަދާ ހަމައަށް އީރާން އިން ވަނީ 40 މިލިއަނަށް ވުރެ ގިނަ ތެޔޮ ފީފާ ބޭރު ކޮށްފައި އެވެ. ނަމަވެސް، އޭގެ ކުރިން ދިޔަ 50 އާއި 60 އާ ދެމެދުގެ ދުވަސް ތަކުގައި، އެމެރިކާގެ ބްލޮކޭޑް ނުވަތަ ބަނދަރުތައް ބަންދު ކުރުމުގެ ސަބަބުން އެންމެ ތެޔޮ ފީފާއެއް ވެސް ބޭރު ކުރުމުގެ ޤާބިލުކަން އީރާންގެ ކިބައިގައި ނެތް ކަމަށް އޭނާ ފާހަގަ ކުރެއްވި އެވެ.
އެމެރިކާ އާއެކު އޮތް ގުޅުމާ ބެހޭ ގޮތުން ވާހަކަ ދައްކަވަމުން ޣަލިބާފް ވިދާޅުވީ، އީރާން އިން އެންމެ އިސްކަމެއް ދެނީ ޑިޕްލޮމެޓިކް އުސޫލުން މަޝްވަރާ ކޮށްގެން ކަންކަން ހައްލު ކުރުމަށް ކަމަށެވެ. އެހެން ނަމަވެސް، މަޝްވަރާ ތަކުން ނަތީޖާއެއް ނުނިކުމެ، ކަންކަން ތަންފީޒު ނުކުރެވޭ ހާލަތެއްގައި ހަނގުރާމަ އަށް ވެސް އީރާން އޮތީ ތައްޔާރަށް ކަމަށް އޭނާ ވިދާޅުވި އެވެ. އަދި އެފަދަ ހާލަތެއްގައި އީރާން އިން ދޭންޖެހޭ ރައްދު ދޭނެ ކަމުގެ އިންޒާރު ވެސް އޭނާ ވަނީ ދެއްވާފައި އެވެ.
ޣަލިބާފް މިހެން ވިދާޅުވެފައި ވަނީ އީރާން އާއި އެމެރިކާގެ ވަފުދު ތަކުން ޤަތަރުގެ ވެރި ރަށް ދޯހާގައި ވަކި ވަކިން މަޝްވަރާތައް ބޭއްވުމަށް ހަމަޖެހިފައިވާ ދަނޑިވަޅެއްގައި އެވެ. މި މަޝްވަރާ ތަކަކީ ދެ ޤައުމުގެ ދެމެދުގައި އުފެދިފައިވާ ނުތަނަވަސް ކަމަށް ހައްލެއް ހޯދުމަށް ކުރިއަށްދާ މުހިންމު މަރުހަލާއެއްގެ ގޮތުގައި ބެލެވެ އެވެ.
އީރާންގެ އިޤްތިޞާދަށް ތެލުގެ އެކްސްޕޯޓް އަކީ ވަރަށް މުހިންމު ދައުރެއް އަދާ ކުރާ އެއްޗަކަށްވާ އިރު، އެމެރިކާގެ ދަތި ކުރުމުގެ ފިޔަވަޅު ތަކުގެ ސަބަބުން އެ ޤައުމުގެ އިޤްތިޞާދަށް ވަނީ ބޮޑެތި ގޮންޖެހުން ތަކެއް ކުރިމަތިވެފައި އެވެ. ނަމަވެސް، ފަހަކަށް އައިސް ތެޔޮ ބޭރުކުރާ މިންވަރު އިތުރުވުމަކީ އީރާންގެ އިޤްތިޞާދަށް ލިބުނު ބޮޑު ކުރިއެރުމެއްގެ ގޮތުގައި އެ ޤައުމުގެ ސަރުކާރުން ދެކެ އެވެ.
މަސްދަރު: އޭއެފްޕީ
