އީރާން އިން އިޒްރޭލް އަށް ދޭ ސައިބާ ހަމަލާތައް ތިން ގުނަ އަށް އިތުރު ވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ފަށާފައިވާ އޮޕަރޭޝަންގެ ފަހުން، އީރާން އިން އިޒްރޭލް އަށް ދެމުން އަންނަ ސައިބާ ހަމަލާ ތަކުގެ އަދަދު ވަރަށް ބޮޑަށް އިތުރުވެފައިވާ ކަމަށް އިޒްރޭލްގެ ސީނިއާ ސެކިއުރިޓީ އޮފިޝަލަކު ވިދާޅުވެއްޖެ އެވެ. 

އިޒްރޭލްގެ ނޭޝަނަލް ސައިބާ ޑައިރެކްޓޮރޭޓްގެ ޑިރެކްޓަރ ޖެނެރަލް ޔޮސީ ކަރާދީ ހޯމަ ދުވަހު ޖަރުމަނުގެ އަޚްބާރަކަށް ދެއްވި އިންޓަވިއުއެއްގައި ވިދާޅުވެފައި ވަނީ، 2025 ވަނަ އަހަރުގެ ޖޫން މަހު އިޒްރޭލް އިން އީރާންއާ ދެކޮޅަށް އަސްކަރީ އޮޕަރޭޝަންތައް ކުރިއަށް ގެންދަނިކޮށް، އިޒްރޭލްގެ އިދާރާ ތަކުން ގާތްގަނޑަކަށް 1،600 ސައިބާ ހަމަލާއެއް ރަޖިސްޓްރީ ކުރި ކަމަށެވެ. އޭގެ ފަހުން 2026 ވަނަ އަހަރުގެ ޖޫން މަހުގެ ތެރޭގައި އެ އަދަދު 4،800 އަށް އިތުރުވެފައިވާ ކަމަށް އޭނާ ވިދާޅުވިއެވެ.

ކަރާދީ ވިދާޅުވީ، ބައެއް ގުރޫޕު ތަކަށް ވަރަށް މޮޅު ހުނަރުވެރި ކަމެއް ލިބިފައިވާ ކަމަށާއި، އިޒްރޭލް އަށް އެ ހަމަލާތައް ހިންގާ ފަރާތްތަކާ ކުރިމަތިލުމުގެ ގާބިލުކަން އޮތް ނަމަވެސް، އެކަމަށް ސީރިއަސްކޮށް ބަލަން ޖެހޭ ކަމަށެވެ. އަސްކަރީ ހަނގުރާމައިގެ ދާއިރާއާ ތަފާތުކޮށް، ސައިބާ ދާއިރާ އިން ދެމުން އަންނަ ހަމަލާ ތަކަށް ހުއްޓުމެއް ނެތް ކަމަށް ވެސް އޭނާ ވިދާޅުވި އެވެ. 

މީގެ އިތުރުން ކަރާދީ ވިދާޅުވީ، އީރާން އިން ދެމުން އަންނަ ހަމަލާތައް އިޒްރޭލްގެ މުހިއްމު އިންފްރާސްޓްރަކްޗަރ ސިސްޓަމް ތަކާއި، މަރުކަޒީ ޖަމިއްޔާ ތަކާއި، ކުދި އަދި މެދު ފަންތީގެ ކުންފުނި ތަކާއި، އާންމު ރައްޔިތުންނަށް ހިދުމަތް ދޭ ތަންތަނަށް ދެމުން އަންނަ ކަމަށެވެ. ހަމަލާތައް ދެމުން އަންނަ ކުދި ތަންތަނުގެ ތެރޭގައި ގާނޫނީ އެހީތެރިކަން ދޭ ތަންތަނާއި، އެކައުންޓިން ކުންފުނިތައް ހިމެނޭ ކަމަށް އޭނާ ވިދާޅުވި އެވެ.

މިހާތަނަށް މުހިއްމު އިންފްރާސްޓްރަކްޗާ އަށް ދެމުން އަންނަ ހަމަލާތައް ފަހަތަށް ޖެއްސުމުގައި ކާމިޔާބު ވެފައިވާ ކަމަށާއި، މިކަން މިގޮތަށް ދެމިގެން ދިއުމަކީ އުންމީދު ކުރާ ކަމެއް ކަމަށް ކަރާދީ ވިދާޅުވި އެވެ. ހަމަލާ ތަކަށް ފަސޭހަކަމާ އެކު ހުށަހެޅިދާނެ ކުންފުނިތަކުގެ ކޮމްޕިއުޓަރު ސިސްޓަމްތައް މުޅިން ވައިޕް ކޮށްލެވިފައިވާ ކަމަށް އޭނާ ވިދާޅުވި ނަމަވެސް، އެފަދަ ކުންފުނި ތަކުގެ ނަމެއް ހާމަ ކޮށްފައި ނުވެ އެވެ.