އެމެރިކާގެ ހެލިކޮޕްޓަރެއް އަރަބި ކަނޑަށް ކުއްލި ގޮތަކަށް ޖެއްސުމުގެ ތެރޭގައި، ސިފައިންގެ މީހަކު ގެއްލި އިތުރު ސިފައިންނަށް އަނިޔާވެއްޖެ

އެމެރިކާގެ އަސްކަރިއްޔާއިން ބުދަ ދުވަހު ބުނި ގޮތުގައި، އެ ގައުމުގެ "އެމް.އެޗް-60 އެސް ސީހޯކް" މަރުކާގެ ހެލިކޮޕްޓަރެއް އަރަބި ކަނޑަށް "ކުއްލި ހާލަތުގައި ޖައްސަން ޖެހުމާ ގުޅިގެން"، އޭގައި ތިބި ސިފައިންގެ ތެރެއިން އެކަކު ގެއްލިއްޖެ އެވެ. މި ހާދިސާގައި އިތުރު ތިން ސިފައިންނަށް އަނިޔާވެފައިވީ ނަމަވެސް، އެމީހުންގެ ހާލު މިހާރު ސްޓޭބަލް ކަމަށް އަސްކަރިއްޔާއިން މައުލޫމާތުދެއެވެ. އަދި މި ހާދިސާއަކީ ދުޝްމަނުންގެ ހަމަލާއެއްގެ ސަބަބުން ހިނގި ކަމެއް ކަމަށް ބެލެވޭނެ އެއްވެސް ނިޝާނެއް ފެންނަން ނެތް ކަމަށްވެސް އެމެރިކާއިން ބުނެފައިވެ އެވެ.

އެމެރިކާގެ ކަނޑުގެ ސިފައިންގެ ފަސްވަނަ ފްލީޓުން ނެރުނު ބަޔާނެއްގައި ބުނެފައިވަނީ، އެ ސަރަހައްދުގައި ހަރަކާތްތެރިވާ އެމެރިކާގެ ކަނޑުގެ ސިފައިންގެ ވަސީލަތްތައް ބޭނުންކޮށްގެން، ގެއްލިފައިވާ ފަޅުވެރިޔާ ހޯދުމުގެ މަސައްކަތް މިހާރު ކުރަމުންދާ ކަމަށެވެ. އަދި މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންދާ ކަމަށްވެސް އެ ބަޔާނުގައިވެ އެވެ. މި ހެލިކޮޕްޓަރަކީ "ޔޫ.އެސް.އެސް ޖޯޖް އެޗް.ޑަބްލިއު ބުޝް" އެއަރކްރާފްޓް ކެރިއަރުގައި އެ ސަރަހައްދަށް ފޮނުވާފައިވާ އުޅަނދެކެވެ.

ހެލިކޮޕްޓަރު ފަދަ މަތިން އުދުހޭ އުޅަނދުތަކަކީ އޭގެ މަތީބައި ބަރުކޮށް ހުންނަ އެއްޗެއް ކަމުން، ފެނަށް ޖައްސާ ވަގުތު ބޯކޮޅުވަތަށް ޖެހުމުގެ ފުރުސަތު ބޮޑެވެ. އެހެންކަމުން، ތަޖުރިބާކާރު ޕައިލެޓުންނަށްވެސް ކަނޑަށް ހެލިކޮޕްޓަރު ޖެއްސުމަކީ ނުރައްކާތެރި ކަމެކެވެ.

އެމެރިކާއާއި އީރާނާ ދެމެދު ހަމަލާ ބަދަލުކުރުން ހުއްޓާލާފައި އޮތް ނަމަވެސް، ދޭތެރެ ދޭތެރެއިން ހަމަނުޖެހުންތައް ހިނގަމުންދާތީ، އެ ސަރަހައްދުގައި ތިބޭ އެމެރިކާގެ ސިފައިން ތިބީ ވަރަށް ބޮޑަށް ސަމާލުވެގެންނެވެ.