ވޯލްޑް ކަޕުން އީރާން ކެޓުމާ ގުޅިގެން އެމެރިކާގެ ހޯމްލޭންޑް ސެކިއުރިޓީ ސެކްރެޓަރީ އުފަލުން ނަށައިފި

ވޯލްޑް ކަޕުން އީރާން ކެޓުމާ ގުޅިގެން އުފާފާޅުކުރައްވައި އެމެރިކާގެ ހޯމްލޭންޑް ސެކިއުރިޓީ ސެކްރެޓަރީ މާކްވޭން މުލިން "ހެޕީ ޑާންސެއް" ނުވަތަ އުފާވެރި ނެށުމެއް ނެށި ކަމަށް ސްޕޯޓްސް ބިޒްނަސް ޖާނަލް (އެސް.ބީ.ޖޭ) އިން ހޯމަ ދުވަހު ރިޕޯޓްކޮށްފި އެވެ.

މި މުބާރާތުގެ ނޮކްއައުޓް ބުރަށް ދިއުމަށް އީރާން ޓީމަށް ވަނީ ވަރަށް ހަނި ފުރުސަތަކުން ނާކާމިޔާބީއާ ކުރިމަތިލާން ޖެހިފަ އެވެ. ގްރޫޕް ޖީގައި އީރާން ކުޅުނު ތިން މެޗުވެސް އެއްވަރުވިއިރު، އެ ޓީމު މުބާރާތުން ވަކިވާން ޖެހުނީ ގްރޫޕްގެ ތިންވަނަ ހޯދި ޓީމުތަކުގެ ތެރެއިން ނުވަވަނަ ޓީމުގެ ގޮތުގަ އެވެ. އެއީ ގްރޫޕް ސްޓޭޖުގެ ފަހު މެޗުގައި އަލްޖީރިއާ އަތުން އޮސްޓްރިއާ ފަހު ވަގުތު ލަނޑެއް ޖަހައި މޮޅުވުމާ ގުޅިގެންނެވެ. މުބާރާތުގެ ގަވާއިދު އޮންނަ ގޮތުން 32 ޓީމު ކުޅޭ ބުރަށް ދަތުރުކުރަނީ ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު އަށް ޓީމެވެ.

އީރާން މުބާރާތުން ކެޓި ޚަބަރާއެކު މުލިން ހުންނެވީ އޭނާގެ އުފާވެރިކަން ފޮރުވައިގެންނެއް ނޫނެވެ. އެސް.ބީ.ޖޭ އިން ރިޕޯޓްކޮށްފައިވާ ގޮތުގައި، ވޮޝިންގޓަންގައި ބޭއްވި ވޯލްޑް ކަޕްގެ ސަލާމަތީ ކަންކަމާ ބެހޭ ބައްދަލުވުމެއްގައި ވާހަކަދައްކަވަމުން މުލިން ވިދާޅުވީ، އީރާން ޓީމު މުބާރާތުން ދިއުމުން ވަރަށް ބޮޑަށް އުފާވާ ކަމަށެވެ. އަދި އެ ޓީމު އެނބުރި ގައުމަށް ދާތީ ވަރަށް ބޮޑަށް ހިތްހަމަޖެހޭ ކަމަށާއި، އެއީ އެހެން އެއްވެސް ޓީމަކަށްވުރެ ބޮޑަށް އެމެރިކާއިން މުއާމަލާތްކުރަން ޖެހުނު ޓީމަކީ އެއީ ކަމަށްވާތީ ކަމަށްވެސް އޭނާ ވިދާޅުވި އެވެ.

އެމެރިކާއާއި އީރާނާ ދެމެދު އޮތް އަސްކަރީ އަދި ސިޔާސީ ހަމަނުޖެހުންތަކާ ގުޅިގެން، ވޯލްޑް ކަޕްގެ ތެރޭގައި އެމެރިކާ ސަރުކާރުން ވަނީ އީރާން ފުޓްބޯޅަ ޓީމުގެ ހަރަކާތްތަކަށް ހުރަސްތަކެއް ކުރިމަތިކޮށްފަ އެވެ. މުބާރާތް ފެށުމުގެ ކުރިން އީރާނުން އެރިޒޯނާގެ ޓޫސަންގައި ކުރިއަށް ގެންދަން ރޭވި ތަމްރީނު ކެމްޕޭން މެކްސިކޯގެ ޓިހުއާނާއަށް ބަދަލުކުރަން ޖެހުނެވެ. މީގެ އިތުރުން، ކޮންމެ މެޗެއްގެ ކުރިން އެމެރިކާގައި އީރާން ޓީމަށް ހޭދަކުރެވޭނެ ވަގުތު އެމެރިކާއިން މަދުކުރިއިރު، މެޗު ނިމުމާއެކު ވަގުތުން ގައުމުން ފޭބުމަށްވެސް އެމެރިކާއިން ވަނީ މަޖުބޫރުކޮށްފަ އެވެ.

ހޯމަ ދުވަހުގެ ބައްދަލުވުމަށްފަހު ނޫސްވެރިންނާ ވާހަކަދައްކަވަމުން މުލިން ވިދާޅުވީ، އީރާން ޓީމުގެ ކަންތައް ނިމި، އެމީހުން އެނބުރި ނާންނާނެތީ އުފާކުރާ ކަމަށެވެ. އަދި އެމީހުންގެ ވިސާ ކެންސަލްކޮށް، އެމެރިކާގެ ފަސްގަނޑުން ފުރައިގެން ދާން ބުނެވުމުން ވަރަށް ބޮޑު ހިތްހަމަޖެހުމެއް ލިބުނު ކަމަށާއި، އެކަމުގެ އުފަލުގައި ލަވައެއް ކިޔައި ނުވަތަ އުފާވެރި ނެށުމެއްވެސް ނެށުނު ކަމަށް އޭނާ ވިދާޅުވި އެވެ.

މުލިން ތުހުމަތުކުރެއްވި ގޮތުގައި، ވޯލްޑް ކަޕަށް އެމެރިކާއަށް ގެންދަން އީރާނުން ބޭނުންވި މީހުންގެ ތެރެއިން ގާތްގަނޑަކަށް ދެބައިކުޅަ އެއްބައި މީހުންނަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އާ ސީދާ ގުޅުން އޮންނަ މީހުންނެވެ. ނަމަވެސް އީރާން ފެޑަރޭޝަނުން ވަނީ މިއީ އެއްވެސް ހެއްކެއް ނެތް ދޮގު ވާހަކައެއް ކަމަށް ބުނެފަ އެވެ.

އީރާން ޓީމުގެ ކޯޗު އާމިރު ގަލެނޯއީ ބުނީ، މުބާރާތުގެ ތެރޭގައި އޭނާގެ ޓީމާ މެދު އަމަލުކުރީ ވަރަށް ބޭއިންސާފުން ކަމަށެވެ.

ސިއެޓްލްގައި ހުކުރު ދުވަހު މިސްރާ ވާދަކޮށް 1-1 އިން އެއްވަރުވި މެޗަށްފަހު ވާހަކަދައްކަމުން ގަލެނޯއީ ބުނީ، މުބާރާތް ބާއްވާ ގައުމުން އީރާނާ މެދު ކަންތައް ކުރީ ވަރަށް އިހާނެތިކޮށް ކަމަށެވެ. އަދި ކުރިއަށް އޮތް ތަނުގައި މުބާރާތް ބާއްވާ ގައުމުތަކުން ޓީމުތަކާއި ކުޅުންތެރިންނާ މެދު މިފަދަ ގޮތަކަށް އަމަލުކުރުމުގެ ފުރުސަތު ނުދިނުމަށް ފީފާއަށް ގޮވާލާ ކަމަށާއި، ފީފާގެ ރައީސް އިންފަންޓީނޯ މިފަދަ ކަންކަމާ ދެކޮޅަށް ތެދުވެވަޑައިގަންނަވާނެ ކަމަށް އުންމީދުކުރާ ކަމަށްވެސް އޭނާ ބުންޏެވެ.

ފީފާގެ ރައީސް ޖިއާނީ އިންފަންޓީނޯއަކީ ޑޮނަލްޑް ޓްރަމްޕާ ގާތް ގުޅުމެއް އޮންނަ ބޭފުޅެކެވެ. އެގޮތުން މިދިޔަ ޑިސެމްބަރު މަހު އިންފަންޓީނޯ ވަނީ އެމެރިކާގެ ރައީސް ޓްރަމްޕަށް އަލަށް ތައާރަފުކުރި "ފީފާ ޕީސް ޕްރައިޒް" އަރުވާފަ އެވެ.

ގަލެނޯއީ އިތުރަށް ބުނީ، އެމެރިކާއިން އީރާނާ މެދު އަމަލުކުރި ގޮތް ވަރަށް ގޯސް ކަމަށާއި، މުޅި ދުނިޔެ އެކަން ބަލައިގަންނާނެ ކަމަށް އުންމީދުކުރާ ކަމަށެވެ. މި ހުރިހާ ދަތިތަކަކާއެކުވެސް އީރާން ޓީމުން ދެއްކި ކުޅުމާމެދު ދުނިޔެ ފަޚުރުވެރިވާނެ ކަމަށާއި، ކުރިމަތިކުރި ހުރަސްތަކާއެކުވެސް ހޯދުނު ނަތީޖާއަކީ އެންމެ ބޮޑު ކާމިޔާބީ ކަމަށް އޭނާ ފާހަގަކުރި އެވެ.

މުބާރާތުގެ ފަހު ދެ މެޗަށްފަހު އީރާން ޓީމުން ވަނީ ޗޭންޖިންގ ރޫމުގައި މުބާރާތް ބާއްވާ ފަރާތްތަކަށް ނޯޓެއް ބާއްވާފަ އެވެ. ޖޫން 21 ވަނަ ދުވަހު ބެލްޖިއަމާ ވާދަކޮށް އެއްވެސް ލަނޑެއް ނުޖެހި އެއްވަރުވި މެޗަށްފަހު ކެލިފޯނިއާގެ އިންގްލްވުޑްގައި ބޭއްވި ނޯޓުގައި ލިޔެފައިވަނީ: "ހާސް އަހަރުވީ ގަދީމީ ޕާޝިއާއިން ފެށިގެން މިއަދުގެ ތަހުޒީބީ އީރާނާ ހަމައަށްވެސް، އީރާނުގެ ރޫހު ދެމިއޮންނާނީ ސާބިތުކަމާއެކުގަ އެވެ. އަހަރެމެން ލޮސް އެންޖެލިސްއަށް އައީ ފަޚުރުވެރިކަމާއެކުގަ އެވެ. ވާދަކުރީ ޝަރަފުވެރިކަމާއެކުގަ އެވެ. އަދި އެނބުރި މިދަނީ ގަދަރާއި އިއްޒަތާއެކުގަ އެވެ."

ސިއާޓްލްގައި ބޭއްވި ނޯޓުގައި ލިޔެފައިވަނީ: "ފަހަރުގައި ޕޮއިންޓްތަކަކީ ތަފާތު ގޮތްގޮތަށް ހޯދިދާނެ އެއްޗެކެވެ. ފަހަރުގައި ގްރޫޕަކުން ޓީމެއް ކުރިއަށްވެސް ގޮސްދާނެ އެވެ. ނަމަވެސް ތާރީޚުގެ ކުރިމަތީގައި އިސްއުފުލާލައިގެން ހުރެވޭނީ އިންސާފާއި ޝަރަފުވެރިކަމާއެކުގަ އެވެ. ފެއާ ޕްލޭއަކީ ހަމައެކަނި ފުޓްބޯޅައިގެ ގަވާއިދު ފޮތުގައި އޮންނަ ލައިނެއް ނޫނެވެ. އެއީ ކުޅިވަރުގެ ފުރާނަ އެވެ. ސިއާޓްލްއިން ދިން މެހެމާންދާރީއަށް ޝުކުރިއްޔާ އެވެ. އަދި އީރާނަށްޓަކައި ހިތާއި، އަޑާއި، މުޅި ނަފްސު ގުރުބާންކުރި ހުރިހާ އީރާން ރައްޔިތުންނަށް ޝުކުރު ދަންނަވަމެވެ."