ޤަތަރުގައި އެމެރިކާ އިން ކުރިއަށް ގެންދާ މަޝްވަރާތައް ކާމިޔާބު ކަމަށް އެ ޤައުމުން ބުނެފި

އީރާންއާ ދެމެދު އުފެދިފައިވާ ނުތަނަވަސްކަން ކުޑަ ކުރުމަށް ޤަތަރުގެ ވެރި ރަށް ދޯހާގައި ކުރިއަށްދާ މަޝްވަރާ ތަކުގައި ބައިވެރިވާ އެމެރިކާގެ މަންދޫބުން ކަމަށްވާ ޖެރާޑް ކުޝްނާ އާއި ސްޓީވް ވިޓްކޮފް ސަރަހައްދީ ލީޑަރުންނާ އެކު އުންމީދީ ބައްދަލުވުން ތަކެއް ބާއްވާފައިވާ ކަމަށް އެމެރިކާ ސަރުކާރުގެ އިސް އޮފިޝަލަކު ވިދާޅުވެއްޖެ އެވެ.

މި މަޝްވަރާ ތަކަކީ ދެ ގައުމުގެ ދެމެދުގައި އޮތް ނާޒުކު ހަނގުރާމަ ހުއްޓާލުމުގެ އެއްބަސްވުމަށް ބުރޫ އަރާފާނެ ފަދަ ހަމަލާ ތަކެއް ދާދި ފަހުން ބަދަލުކުރުމާ ގުޅިގެން، ދާއިމީ ސުލްހައެއް ގާއިމު ކުރުމަށް ކުރިއަށް ގެންދާ ނުސީދާ ވާހަކަ ތަކެކެވެ.

މި މަހުގެ ކުރީ ކޮޅު ސޮއި ކުރި ވަގުތީ އެއްބަސްވުމުގެ ދަށުން 60 ދުވަހުގެ މުއްދަތަށް މަޝްވަރާތައް ކުރިއަށް ގެންދަން ނިންމާފައިވީ ނަމަވެސް، ހުރްމުޒް ކަނޑު އޮޅީގައި ހިނގި ކުރިމަތިލުން ތަކުގެ ސަބަބުން މި މަސައްކަތަށް ވަނީ ހުރަސް ތަކެއް ކުރިމަތިވެފައި އެވެ.

ނަމަވެސް، އެމެރިކާ އާއި އީރާން އިން އަލުން ހަމަލާ ބަދަލު ކުރުން ހުއްޓާލުމަށް އެއްބަސްވުމާ ގުޅިގެން، ކުޝްނާ އާއި ވިޓްކޮފް ވަނީ އަލުން ޤަތަރަށް ވަޑައިގެން މަޝްވަރާތައް ފައްޓަވާފައި އެވެ. ޤަތަރުގެ އޮފިޝަލުން ވިދާޅުވި ގޮތުގައި، އެމެރިކާގެ ރައީސް ޑޮނަލްޑް ޓްރަމްޕްގެ މަންދޫބުން، އީރާންގެ މަންދޫބުންނާ ސީދާ ބައްދަލެއް ނުކުރައްވާނެ އެވެ. އެހެން ނަމަވެސް، ދަށް ފަންތީގެ މަންދޫބުންގެ މެދުގައި ކުރިއަށްދާ ފަންނީ މަޝްވަރާ ތަކުން ކުރިއެރުން ލިބެމުންދާ ކަމަށް އެމެރިކާގެ އޮފިޝަލު ވިދާޅުވި އެވެ.

ވޯލް ސްޓްރީޓް ޖާނަލް އިން ރިޕޯޓު ކޮށްފައިވާ ގޮތުގައި، އީރާންއާ ދެކޮޅަށް ފުޅާ ދާއިރާއެއްގައި އަސްކަރީ ކެމްޕޭނެއް އަލުން ފެށުމަށް ޓްރަމްޕް ވަނީ ދެކޮޅު ހައްދަވާފައި އެވެ. އަދި މަޝްވަރާތައް އަންނަ އޯގަސްޓް މަހުގެ 18 ވަނަ ދުވަހަށް ވުރެ އިތުރަށް ދެމިގެން ދިޔަ ނަމަވެސް، އެންމެ ރަނގަޅު ކަމަށް ޓްރަމްޕް ވަނީ އޭނާގެ މުވައްޒަފުންނަށް އަންގަވާފައި އެވެ.

ދާދި ފަހުން ޑިފެންސް ސެކްރެޓަރީ ޕީޓް ހެގްސެތު އަދި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑެން ކޭންއާ އެކު އިތުރު ހަމަލާ ތަކެއް ދިނުމާ ގުޅޭ ގޮތުން ޓްރަމްޕް މަޝްވަރާ ކުރެއްވި ނަމަވެސް، މިވަގުތަށް ޑިޕްލޮމެޓިކް މަގު އިޚްތިޔާރު ކުރެއްވުމަށް އޭނާ ވަނީ ނިންމަވާފައި އެވެ.

މި މަޝްވަރާ ތަކުގައި އަދިވެސް ހައްލު ނުވެ ހުރި މުހިންމު ކަންތައްތަކުގެ ތެރޭގައި، ފްރީޒް ކޮށްފައިވާ އީރާންގެ އެތައް ބިލިއަން ފައިސާއެއް ދޫކުރުމާއި، ހުރްމުޒް ކަނޑު އޮޅި ބެލެހެއްޓުމުގެ ކަންކަން ހިމެނެ އެވެ.

ދުނިޔޭގެ ތެލާއި ގޭހުގެ ފަސްބައިކުޅަ އެއްބައި އުފުލާ މި ކަނޑު އޮޅިން ދަތުރުކުރާ އުޅަނދު ތަކުން ފީއެއް ނެގުމުގެ ފުރުސަތު އޮންނަން ޖެހޭނެ ކަމަށް އީރާން އިން ބުނަމުންދާއިރު، އެމެރިކާ އާއި ވިލާތުގެ ގައުމު ތަކުގެ އިތުރުން ގަލްފުގެ ގައުމު ތަކުން ދަނީ އެކަމާ ވަރަށް ބޮޑަށް ދެކޮޅު ހަދަމުންނެވެ. ވަގުތީ އެއްބަސްވުމުގައި 60 ދުވަހުގެ މުއްދަތަށް ފީ ނުނެގުމަށް އޮތް ނަމަވެސް، އޭގެ ފަހުން ކަންތައް ކުރަން ޖެހޭ ގޮތެއް ސާފެއް ނުވެ އެވެ. 

މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އަރައި، ތެލާއި ގޭހުގެ އަގު ވަނީ އުފުލިފައި އެވެ. ނަމަވެސް، ހަނގުރާމަ ހުއްޓާލުމުގެ އުންމީދު ބޮޑުވުމާ އެކު އޭޝިއާގެ ބާޒާރުގައި ތެލުގެ އަގު ވަނީ ކުޑަކޮށް ދަށަށް ޖެހިލާފައި އެވެ. އެމެރިކާގެ އިސް އޮފިޝަލު ވިދާޅުވި ގޮތުގައި، މިހާރު ހުރްމުޒް ކަނޑު އޮޅިން ދަތުރުކުރާ އުޅަނދު ތަކުގެ އަދަދު ދަނީ އިތުރުވަމުންނެވެ. މިއީ ދުނިޔޭގެ އިގްތިސާދަށް ލިބޭނެ ބޮޑު ހިތްހަމަ ޖެހުމެއް ކަމަށް މާހިރުން ދެކެ އެވެ.